معلش نعيد الكلام تانى ونسد الفراغات اللى موجودة بينى وبينك دى
اولا الامر مش سيان وفية فرق بين التزوير وانهم خللوكى تختارى الاخوان ودا لان مش كل الناس تفكيرها زيك وانا بتكلم من وجهة نظر عامة مش لشخص واحد واية هى وجهة النظر دى ان العسكر عمل انتخابات نزيهة واحنا كناس او اغلبية اخترنا مرسى واللى كان فى صراع شديد مع شفيق على كرسى الرئاسة واللى بنقول علية مرشح العسكرى والنظام القديم وكسب مرسى فى الاخر وكسبت مصر مرشح الثورة وبقى دا محسوب كأهم مكسب من مكاسب الثورة
صح ولا غلط كلامى ؟؟؟؟ صح اكيد وكل الناس بتتكلم عن النقطة دى وان الثورة انتصرت بفوز مرسى وكلة ماشى تمام واللى اتفقت علية القوى الثورية والتفت حولة هو اللى كسب حتى لو كانوا مرغمين والواضح ان القوى الثورية اللى بنتكلم عنها ميتعدوش اللى بيقفوا فى الميدان يوم مليونية ويجو كام الف مش اكتر اما الباقى فدا بس كمالة صورة مش اكتر واذا كانوا بينزلوا مرة مبينزلوش التانية ولو فية مليونية هتلاقيهم كتير بس بينزلوا لاغراض مختلفة وكل واحد ولية مطالبة ومش متحدين والكل بيدور على مصالحة
نيجى بقى لحتة الاخوان والعسكر وهو العسكر عايز شفيق ومضطر لمرسى ولو احنا هندخل فى مصطلحات هقولك العسكر مش عايزين شفيق لاننا دلوقتى فى وضع مختلف ولو كان شفيق كسب لا كان الاخوان هيسكتوا ولا الشارع سكت عالكلام دا كلة رغم ان شفيق كان لية مؤيدين بتاع 12 مليون وزيادة بس اللى انتخبوة سهل اقناعهم وتغيير فكرتهم عن شفيق والاغلبية منهم ثقافتهم السياسية ضعيفة وبياخدوا القشور فى كل حاجة فبالتالى هم كان بودهم شفيق لكن الوضع دلوقتى يخلليهم عايزين مرسى لان شفيق هيبقى مش فى مصلحتهم ابدا عشان بقا ورقة محروقة فبالتالى خلاص نشوف خطة تانية ودى سياسة مصالح والولاء مش لشخص ولكن للى هيحققلى مصالحى فبالتالى الاخوان هم اختيارهم الامثل فانا بتكلم عن اللى بيشتغلوا علية دلوقتى واللى هم عايزينة وهو مرسى
اما حتة المقارنة بين شفيق ومرسى فأنا بقولك لو شفيق كان كسب كنت اقولك ماشى لكن دلوقتى مش هتلاقى حد هيعترض وكلة هيقولك ربنا يكون فى عونة وجاى مستلم البلد فى حالة ما يعلم بيها الا ربنا وادولة فرصة وكمان كتر النزول للميادين خللى الاعتراض والاعتصام على اى حاجة تفقد الثورة قيمتها فسيبك من الكلام دا علشان مش موجود الا عندك انتى بس او عدد قليل
كمان شارع اية اللى هو الفيصل اللى انتخب شفيق 5 مليون وعمرو موسى 3 مليون
متخلليش ثقتك فى الشارع كبيرة اوى كدا اصل الشارع دا بينساق لاى حاجة وبيجرى ورا القرش ولقمة العيش وبيتلعب بية بسهولة فمتثقيش فى اختيارة لكن حاولى تحطية على بداية الطريق اللى يوصلك انك تعتمدى علية وتؤمنى بأختيارة ودا اللى معملوش المجلس العسكرى فبالتالى كل اللى اتبنى علية بعد كدا غلط ومليان عيوب وزى ما قولتلك الاتفاق موجود علشان لو ما اتفقوش لا كان المجلس العسكرى هينوبة حاجة ولا الاخوان هينوبهم حاجة وكان الطرفين طلعوا خسرانين ولمرشحين التانيين هم اللى هيكسبوا يبقى اية المانع انهم يعملوا اتفاقيات ؟؟؟؟؟؟؟؟
كمان انا مش عارف انتى لية مش مقتنعة ان نزول شفيق مهم لحبك التمثيلية دى كلها كمرشح للعسكرى والكلام اللى انا قولتهولك قبل كدا وانة نزولة مهم ومفيش استغناء عنة علشان لو مكنش موجود لا كان حصل تفتيت لاصوات ولا كان صعد مع الاخوان فى الاعادة ولو كان حد تانى كان خدها من الاخوان
هو انتى مقرتيش تصريح مرسى من يومين واللى بيقول المجلس العسكرى حمى الثورة وادى دورة على اكمل وجة ووصل بالبلد لبر الامان ؟؟؟؟ دا يخلليكى تقولى اية غير ان دا بيلمع فى دا وبيمهدلة لخروج امن دا اذا خرجوا اساسا وتفتكرى لو حازم ابو اسماعيل كان كسب كان ساب العسكر ؟؟؟
يا شيخة دا فرق شاسع والله وانا مكنتش مؤيد ابو اسماعيل بس اتضحلى انة كان اكتر المرشحين مصداقية وواضح من الاول موقفة ومش متلون علشان كدا اتشال من سكتهم
مفيش اساسا ناس انتخبت شفيق لتوجية المعارضة علية ولكن علشان الاخوان بس هم مكنوش شايفين النقطة دى الا قليل منهم كمان هم مين الاخوان دول اللى معاهم الورق اللى يثبت الجنسية بتاعة والدة ابو اسماعيل وكمان مش موجود مع الداخلية
انتى عايزة تقوليلى ان الداخلية بجلالة قدرها متقدرش تطلعلك ورق الصبح وتقولك انك يهودية لو كان وجودك عقبة فى مصالح العسكرى وامريكا واسرائيل ؟؟؟
دول يطلعولك ورق من الصبح وكمان خيرت الشاطر مكنش عارف انة ترشيحة مش ممكن علشان الاحكام العسكرية اللى علية ولا هو ميعرفش الا ابو اسماعيل وبس
يا ستى دول نزلوا خيرت الشلطر وعمر سليمان كأسماء تقيلة علشان تطلع مع ابو اسماعيل ويقولوا محدش احسن من حد والقانون بيتطبق عالكل
فهمتينى يا ست الكل ؟؟ وعالعموم احنا هنتكلم فى اية
بكرة هتشوفى اذا كان مرسى هيعمل حاجة ولا لا ولا ممكن يتشال بمليونية زى ما كان بيقول ولا لا ؟؟