النهارده هكلمكم عن طريقه كتابه السيره الذاتيه زي المحترفين (cv) ودي شوية ملاحيظ ونصايح مهمه تفيدك وانت بتكتبها اول حاجه لازم نعرفها ان السيرة الذاتيه بتاعتك هي وسيله الاعلان عن نفسك يبقي لازم تهتم بكتابتها جدا عشان الاعلان يحقق اهدافه! ولازم تتكتب بإحترافيه وتنظيم و ماتزيدش عن اربع صفحات والهدف منها اني اشجع القارئ انه يدعوني للقاء(interview) عشان اتأهل للوظيفه و طبعا السيرة الذاتيه لازم يبقي فيها اي شئ مثير للإهتمام خلال دراستك وحياتك الوظيفيه خاصة الاشياء المتعلقه بالوظيفه اللي انت متقدم ليها.
ودلوقتي نتكلم عن الحاجات اللي نعملها في السيرة الذاتية و الحاجات اللي منعملهاش.
-نبدأ بالحاجات اللي نعملها:-
إذا كان ال cv ردا علي اعلان معين من الشركة فرا جع الاعلان كويس و حاول تذكر كلمات فيه من الاعلان زي متطلبات العمل والخبره وهكذا.
لازم يبقى عندك اكتر من نموذج للسيره الذاتيه بتاعتك
اكتب معلومات كتير عنك عشان تشجع القارئ بس في نفس الوقت ميملش من كتر المعلومات
بمعني انه كل ما المعلومات تبقي واضحه و صريحه والكلمات محدده من غير تزويق كل ما فرصة قراءة السي في كامل تبقي احسن
دايما ماتخليش السي في اكتر من صفحات ولو في صفحه واحده يبقي احسن برضه
اعرف دايما ان كل كلمه بتكتبها بتعبر عن حاجه والقارئ يباخدها من منطلق معين عشان كده تختصر الكلام اللي ملوش لازمه
ابعد عن انك تقول رأيك في نفسك
بعد كتابه السي في اديه لحد يقراه يشوف الاخطاء اللغويه و اسلوب الكلام اللي انت مش هتلاحظه لانك انت اللي كاتبه!
اول جزء من السي في تكتب فيه عنوانك و معلومات الاتصال بيك بعد كده مؤهلاتك الدراسيه وشهاداتك
الجزء التاني يبقي فيه خبراتك و الوظائف السابقه والحاليه من الحاضر للماضي يعني تكتب الوظيفه الحاليه اولا ثم السابقه
كل وظيفه او مكان اشتغلت فيه ممكن تكتب جنبه ملحوظه صغيره زي انجاز مثلا اوتميز معين في المهنه دي
اي تدريب في مكان ما او عمل تطوعي مثلا برضه ممكن تكتبه
اي كورسات خدتها او لغات تتقنها لازم تتذكر
السي في بتاعك لازم تحدثه اول باول عشان لو اللي بيقراه حس انه قديم مش متحدث يعني وظائفك الحاله مش موجوده مثلا ممكن تبقي سبب لإستبعادك
-دلوقتي بقى نتكلم عن الحاجات اللي منعملهاش ونتجنبها في كتابه السيره الذاتيه:-
متكتبش كلام كتيير عن الوظائف السابقه لك في السنيين الماضيه علي قد ما تقدر اختصر
متكتبش اي حاجه قومت بيها مش كامله او كان فيها خطأ مثال كورس مثلا و ماخدتش الشهاده بتاعته
متكتبش العنوان السيره الذاتيه CV ,curriculum vitae او اي حاجه زي كده فقط اكتب اسمك بالكامل!
متستخدمش الإختصارات او الكلمات الدارجه او الكلمات العاميه
متكتبش مرتبك كام الافضل ان السؤال ده يتسإلك في الانترفيو (اللقاء)
متكتبش معلومات شخصيه عنك مالهاش لازمه زي طولك, وزنك, حالتك الصحية, اطفالك,اسمائهم....
متكتبش اسباب تركك للوظائف السابقه لانك هتتسإل فيها في الانترفيو
بكده نبقي عرفنا اهم المفاتيح لكتابه السي في او السيرة الذاتيه الخاصه بنا
لو عايزين تعرفوا اكتر و تشوفوا امثله متنفذه عن السيره اذاتيه هتلاقوها في اللينك ده
هنا لمزيد من المعلومات وامثله لطرق كتابه السيره الذاتيه cv
سلام بقي واقابلكوا الموضوع الجاي اللي هنتكلم فيه علي اللقاء الاول مع عارض الوظيفه interview