الصبر الحاجة الوحيدة اللي لازم تستعجل وإنت بتتعلمها.
الوسواس القهري حاجة صغيرة ليها ضل كبيييير.
استمتع بالحاجات الصغيرة بكرة هتعرف إنها كانت كبيرة.
المحظوظ مجرد شخص عارف هو عايز إيه.
الحياة كوميدية بالنسبة للناس اللي دماغهم عالية، ومأساة بالنسبة للناس اللي إحساسهم عالي.
المتفائل شخص عديم الخبرة.
الفستان الحلو هو اللي يخلي الراجل يحلم إنك تقلعيه.
الغياب بيقتل قصص الحب الصغيرة وبيقوي قصص الحب الكبيرة...زي الرياح ما بتطفي شمعة علي الترابيزة وبتزود حريقة في الغابة.
كل ما حد يسألني عامل إيه بيفكرني إني مش تمام.
ألست دايماً بتقع في الراجل المزيف...والراجل بيجتهد عشان يبقي كده.
الشيخوخة عمرها ما هتحميك من الحب..بس الحب هيحميك من الشيخوخة.
لو عايز الحاجة تتقال صح إديها لراجل، لو عايز الحاجة تتعمل صح إديها لست.
الواحد بيعمل جدول مذاكرة عشان ينظم القلق.
الواحد لو مالقاش واحدة يحبها..هيحب أي واحدة يلاقيها.
فقدان الزوجة هو أمر صعب، وهو في الوقت نفسه أمر مستحيل.
الزواج مش إنك تربط نفسك بواحدة.. الزواج إنك تتحرر من ستات كتير.
الدبلة.. أصغر (كلبش) في العالم.
الأفلام المأساوية بتنتهي بالموت، والأفلام الكوميدية بتنتهي دايماً بالجواز.
طول الوقت فيه أسباب مقنعة للطلاق، الشطارة إنك تلاقي أسباب مقنعة للاستمرار في الجواز.
في الهند القديمة لا يعرف الرجل زوجته حتي يتزوج!، أعتقد إن ده اللي بيحصل في كل مكان..في كل مكان.
لما أكون مضطر أختار حاجة من حاجتين غلط، باختار الغلط اللي ما عملتوش قبل كده.
كل بني آدم سؤال.. وإجابته «بيحب إزاي».
البطالة الحقيقية تبدأ عندما تصبح موظفاً.
إوعي تبوس واحدة غبية وإوعي بوسة تخليك غبي.
الواحد من صدمته لما بيتولد بياخد وقت كتير علي بال ما ينطق.
عايز تجنن واحد ابعتله رسالة أول كلمة فيها part 2.
الطلاق بيكلف كتيرلأن الغالي تمنه فيه.
عند وفاتي سأتبرع بجسدي لأبحاث الخيال العلمي.
مستحيل توصل للمقدمة طول ما إنت مريح المؤخرة.
اللي ميعرفش يصلح الفرامل لازم يتعلم يصلح الكلاكس.
اللي عايز يتجوز علشان يستقر زي اللي عايز يقتل علشان ياخد جايزة نوبل للسلام.
مشكلة الحب إنه عمره ما جه في وقته.
الأوحش من إن الحياة مايبقالهاش معني إنها يكون ليها معني مش عاجبك.
الستات زي الجن مابيتكلموش لحد ما تبتدي تكلمه.
السعادة لا تجلب المال.
الجواز الفاشل مش هو السبب في الخيانة، لكن الخيانة هي السبب في فشل الجواز.
الحب أعمي بس الجواز عيون مفنجلة.
الست اللي مابتشتغلش فايتها كتير من التحرش الجنسي.
الأماكن بتوسع أول ما تبقي ذكريات.
الدرس الذي يجب أن نتعلمه من مخالفة الأوفسايد في ملاعب كرة القدم هو أنه لا توجد طرق مختصرة للأماكن التي يجب أن يذهب إليها الإنسان.
وجه الشبه بين الحياة وأفلام الكارتون أن معظم الشخصيات الشهيرة فيهما حيوانات.
الشخص التقليدي يري أن الحياة عبارة عن طريق واحد يبدأ بالميلاد وينتهي بالموت، غير التقليديين يسيرون في كل الطرق الأخري.
أسأل كثيرا لماذا أشعر بالسعادة فقط عندما أتكلم إلي نفسي، وعرفت بعد فترة أن سبب الراحة هو كوني الشخص الوحيد الذي تريحني إجاباته.
الحب أعمي.. أشعر دائماً بأن هذه الجملة كانت الإرهاصة الأولي لنظرية الفوضي الخلاقة.
الواحد لازم يموِّت نفسه علشان يعرف يعيش.
اللي اتنفخ من الشوربة يلحس في الزبادي.
بتدور علي كوميديا مجانية؟..اتعلم تضحك علي مشاكلك وإنت عمرك ما هتبطل ضحك.
في اللحظة التي تبدأ فيها بمعاملة الكون بإخلاص يبدأ الكون في فقدان اهتمامه بك.
لا تنزعج إذا اكتشفت أنك محدود الذكاء.. للذكاء حدود لكن الغباء هو الشيء الوحيد الذي لا حدود له.
في الطفولة كان معظمنا يحلم بأن يصبح شخصا مهما عندما يكبر، لذلك كان الأهالي يشترون لأطفالهم في العيد بدلة الضابط، وحدي كنت أحلم بأن أكبر لأصبح صحفياً لذلك كان أبي يشتري لي في العيد بدلة مسجون.
الناس اللي بتخاف من الموت.. مسيرها تموت من الخوف.
الفرق بين القضاء والقدر أن الأول به فرصة للاستئناف.
أتقبل برضا تام كل المصائب التي تمر بي في هذه الحياة. لا شيء يفسد هذا الرضا سوي خوفي من أن أكون مقصراً.
أنت طفل لمرة واحدة في حياتك..بعدها عليك أن تبحث عن أعذار جديدة.
الراجل اللي عمره ما ضحك علي ست يبقي راجل فاشل.. والراجل اللي ماضحكتش عليه واحدة ست مايبقاش راجل أصلا.
أكبر تطبيق لمقولة (الحي أبقي من الميت) أن أسماء الأحياء أضعاف أضعاف أسماء الأموات في صفحة وفيات الأهرام.
خلف كل راجل عظيم امرأة خلته يطلَّع همه في الشغل!
قلبي مصدق معظم الحاجات اللي عقلي مش قادر يفهمها.
الحياة طريق والناس حوادث.
العيب الرئيسي في النساء أنهن يفترضن الأسوأ..العيب الرئيسي في الرومانسيات أنهن ينتقمن بضراوة.
يحتل الجنس المركز الأول في قائمة أهم عشرة أشياء في حياة الإنسان.. التسعة الباقين مش مهمين.
الأندية التي تستقر في «مؤخرة» جدول الدوري.. لا عجب إنها «تنـزل» مع نهاية الموسم.
الإنسان مُسيَّر حتي لحظة الاختيار فيصبح مُخيَّرا، وما أن يختار حتي يعود مسيَّرا من جديد..وهكذا.
القلق هو الشيء الوحيد الذي يدفعني إلي الأمام.
الألم يُطهر الإنسان..ربما تشرح هذه القاعدة حجم المعاناة التي أعيش فيها طيلة الوقت حتي يظل اسمي «عمر طاهر».
« من كتاب جر ناعم 2008 - عمر طاهر »