بسم الله الرحمن الرحيم



البشرة شديدة الجفاف

جفاف البشرة من أكتر المشاكل اللي بتضايقنا صيف وشتا، ودايماً بنحاول نلاقي لها حل، ودلوقتي ممكن نعمل كريمات ترطيب لبشرتنا بنفسنا في البيت وبمكونات وخطوات سهلة جداً...

1- كريم اللانولين

المكونات:
قطعة لانولين خام بحجم عين الجمل
معلقة زيت زيتون
معلقة زيت لوز حلو
معلقة زيت سمسم
معلقة زيت جنين القمح
معلقة زيت مشمش
معلقة زيت ليمون

الطريقة:

بتسخّني مية كتيرة في حلة على النار وبتحطي على المية طبق حراري أو حلة أصغر شوية "حمام مائي" وبتسيحي فيها اللانولين شوية وبعد كده بتضيفي مجموعة الزيت المختلفة، وبتسيبيهم في الحمام المائي الساخن، ونستمر في تقليبهم لغاية ما المزيج يبقى له قوام كريمي، وفي النهاية بتحطي الكمية اللي عملتيها في برطمان صغير وتحطيه في الثلاجة وتستعملي منه على بشرة وشك وجسمك والإيدين والقدمين كل ما تحتاجي.

2- كريم شمع العسل

المكونات:
قطعة من شمع العسل
زيت لوز حلو
زيت ورد

الطريقة:
بتسيحي قطعة شمع العسل في حمام مائي بنفس الطريقة اللي فاتت وبعد كده بتضيفي زيت اللوز وزيت الورد، وبتحطي الخليط في برطمان وتستعملي منه كل ما تحتاجي، والماسك ده كمان مناسب لبشرة الوش والجسم.

ملحوظة:
الكريمات اللي بتحتوي على العسل يفضل إننا مانسيبهاش على البشرة أكتر من 3 ساعات، أما الماسكات والكريمات اللي بتحتوي على ليمون ممكن نسيبها على البشرة وقت طويل لكن ناخد بالنا إننا ما نتعرضش لأي إضاءة قوية وهي على بشرتنا.

التجاعيد والبشرة المرهقة


لو بتعاني من ظهور التجاعيد على بشرتك، ولو بشرتك حساسة وبتلتهب بسرعة، ولو بشرتك باهتة ومرهقة ومحتاجة لتغذية ممكن تجربي
ماسك

ماسك الموز...

المكونات:
موزة
معلقة عسل نحل
عصير ليمون "في حالة البشرة الدهنية"

الطريقة:
بتهرسي الموزة كويس جداً وبتضيفي عليها العسل، ولو بشرتك دهنية بتضيفي نقطتين عصير ليمون، وبتفردي الماسك على بشرتك وتسيبيه حوالي ساعة أو ساعة إلا ربع، وبعد كده بتغسلي وشك كويس بالماء الفاتر.

البثور السوداء والنمش والبقع الغامقة


نعمل ماسك من الفجل البلدي لعلاج مشكلة البثور السوداء والنمش وكمان البقع الغامقة اللي بتظهر على البشرة بسبب الجفاف أو التعرض للشمس لفترات طويلة، ولكنها أكدت إنه علشان نشعر بنتيجة الماسك ده على بشرتنا لازم نواظب عليه لمدة 3 شهور ونعمله بشكل يومي، لكن كل 20 يوم ممكن ناخد راحة لمدة 10 أيام وفي فترة الراحة دي ممكن نحط على بشرتنا شرائح خيار...


طريقة عمل ماسك الفجل:

بنجيب الفجل ونعصره كويس جداً في عصارة البرتقال ونصفيه كويس، ونشوف السائل اللي هيطلع من الفجل قد ايه، يعني لو طلع معانا كوب من عصير الفجل نخلط معاه كوب من عصير الليمون وكوب من زيت اللوز الحلو، ونقلبهم مع بعض كويس، ونحطّهم في الثلاجة، وعند الاستخدام نرجّه كويس، ونحطّ منه على أماكن البثور والبقع والنمش، لكن لازم ناخد بالنا إننا لما نعمل الماسك ده مش لازم نتعرض لأشعة الشمس مباشرة أو لأي إضاءة قوية.

تفتيح وتنعيم البشرة


ده ماسك هايل لتفتيح البشرة، ومكوناته سهلة وبسيطة..

المكونات:
معلقة كبيرة ترمس مطحون
1/2 معلقة عسل نحل
1/2 معلقة زيت ورد
ماء ساخن جداً للعجن
معلقة ردّة

الطريقة:
بنخلط المكونات كلها مع بعضها ونقلبهم كويس، وندلّك البشرة برفق جداً بالماسك ده في حركات دائرية، ونسيبه على البشرة لمدة ساعة أو ساعة إلا ربع وبعدين نفركه من على البشرة، ونشطف البشرة بماء فاتر.

جفاف الشفايف


جفاف الشفايف مشكلة بتؤرق الكثير من البنات، وفي أثناء الندوة قدمت رانيا وصفة طبيعية بسيطة وسهلة، ممكن نعملها بشكل يومي وهي إننا نخلط كمية صغيرة من اللبن مع نقطتين عصير ليمون، وندهنهم على شفايفنا كل يوم قبل ما ننام، وكمان نصحت بوضع شرائح الخيار على الشفايف لأنه بيفيد جداً في ترطيبهم.

آثار الحبوب



للتخلص من آثار الحبوب اللي بتظهر على البشرة، ممكن ندهن بشرتنا والأماكن اللي فيها آثار الحبوب بزيت الليمون قبل ما ننام بالليل ونسيبها على بشرتنا لمدة نصف ساعة وبعد كده نشطف بشرتنا كويس بماء فاتر، ونكرر الموضوع ده بشكل يومي.

المسامّ الواسعة



بالنسبة لمشكلة المسام الواسعة اللي بيشتكي منها ناس كتير وخصوصاً أصحاب البشرة الدهنية، فأوصت رانيا بوضع شرائح الطماطم على البشرة لمدة نصف ساعة يوم بعد يوم.

الهالات السوداء


شرائح الخيار وعصير البطاطس يعتبروا من أفضل الحلول الطبيعية لعلاج مشكلة الهالات السوداء، لكن مع المواظبة والاستمرار عليها، والبعد عن الإرهاق والتوتر والسهر.

الأظافر الضعيفة



لو كانت أظافرك ضعيفة وبتتكسر بسرعة ومش بتطول، فالحل إنك تدلكيها بشكل يومي بزيت الخروع أو بزيت الزيتون الدافي.

الحبوب




الحبوب مشكلة بتحير وبتضايق ناس كتير، وفي الندوة نصحت رانيا كل الناس اللي بتعاني من مشكلة حبوب البشرة إنهم يستخدموا


ماسك حبة البركة...



المكونات:

2 معلقة كبيرة حبة البركة مطحونة
كوب من مغلي زهرة البابونج "الشيح"
عصير ليمون
بشر ليمون
زيت ليمون


الطريقة:

1- بنشطف البشرة الأول بكمية كبيرة من مغلي البابونج واللي سبق وقلنا طريقة تحضيره، وبنفرد على البشرة -وهي مبلولة بمغلي البابونج- طبقة من حبة البركة المطحونة، وبندلّك بها البشرة في حركات دائرية، لمدة 5 أو 10 دقائق. 2- بعد كده بنخلط كمية من حبة البركة المطحونة مع عصير الليمون وبشر الليمون وزيت الليمون، وبنعمل منهم عجينة متماسكة، وبناخد منها قطع صغيرة ونحطها على الأماكن اللي فيها الحبوب، ونسيبها على بشرتنا لمدة ساعة، وبعد كده نفرك بشرتنا برفق ونشطفها بالماء الفاتر.

لوشن "سحري" لتفتيح الجسم



وصفت رانيا اللوشن ده بإنه اللوشن السحري لتأثيره على تفتيح الجسم وإعطاؤه ريحة عطرة وفواحة بطريقة طبيعية، واللوشن مكوناته بسيطة جداً وهي عبارة عن كولونيا ليمون (555) وبنخلطها مع زيت ورد طبيعي بنسبة ثلاثة لواحد يعني بنحط 3/4 كوب من الكولونيا وربع كوب من زيت الورد، وبنحطهم في زجاجة ونحفظها في الثلاجة، وبندهن منه على الجسم بالكامل والوش لكن مع مراعاة إننا مانتعرضش به للضوء.

انتفاخ العينين



انتفاخ المنطقة حول العينين ممكن نتغلب عليه بإننا نعمل كمادات من اللبن البارد على المنطقة دي، وكمان ممكن نحط شرائح خيار، لكن يفضل إننا نكتفي بكمادات اللبن البارد بالنسبة للبنات الصغيرين؛ لأن الخيار بيستخدم على بشرة أكثر نضجاً.

أعطي لجسمك وغرفتك رائحة عطرة




لو عايزة تهدي أعصابك وتصفي ذهنك، فدي الطريقة اللي وصفتها رانيا وهي إنك تخلطي معلقة من زيت اللافندر مع معلقة من زيت الريحان مع معلقة من زيت الليمون مع مية، وتحطي الخليط ده على الفواحة وتحطيها في غرفتك الخاصة، مع الاسترخاء التام، هتلاقي نفسك هادية ومنتعشة جداً وكمان حالتك النفسية هتبقى كويسة، وممكن تحطي من نفس الخليط ده على ليفة الاستحمام الخاصة اللي بتغسلي بها جسمك، وهتلاقي جسمك بقى له رائحة مميزة وجميلة وهتستمر معاكي لفترة طويلة.