بسم الله الرحمن الرحيم
انا هبدا على طول و بدون اى مقدماتمشكلتى الكبيرة هى الحب
انا الاول طالب جامعى فى كلية مرموقة و عارف ان دى مرحله و هتعدى بس المشكلة انها مرحله بتتطور عندى اوى اوى اوى يعنى انا فى اول سنة ليا فى الكلية حبيت بنت و اقولها بكل صراحه مكانتش تستاهلنى مش لان انا مليان مميزات بس لان هى ما كانتش اد حتى معرفتى كصديق و كانت شخصية من كل النواحى معايا و مع غيرى مش كويسة
المهم ربنا قدر و نسيتها بس للاسف انا نسيتها النهارده و مع اول بنت شوفتها اودامى بعديها حبيتها فورا مقدرش اقول غير انى تعبان اوى خصوصا و ان البنت التانية دى كويسة اوى اوى صحيح هى مش حلوة بس من جميع الجوانب كويسة و من ساعت ما عرفتنى و هى بتحترمنى فقط كصديق و اخ
المشكلة فى البنت دى انها زمان ايام ما مكنتش باحبها كانت بتجرى ورايا كتير اوى و تكلمنى على النت دايما و كنت انا شبه متجاهلها لكن لما جيت انا حبيتها فعلا و كنت مستنى الاقى كل ده ! ما كنش موجود دلوقتى انا اللى بسال و انا اللى بادور عليها لغاية من نص ساعه جيت اكلمها على النت ما كنتش فعلا فاضية وقالت لى معلش مش فاضية و راحت تشوف حالها
انا كمان فيا مشاكل كتيرة اوى و اهمها انى بازعل من جوة نفسى لما باكلمها انا مش هى اللى تكلمنى و بازعل ان انا اللى بسال مش هى و بازعل و باتضايق برده انها مبقتش مهتمة بيا زى الاول يمكن هى دى تصرفاتها من زمان بس عشان لما انا ابتديت احبها بقيت حساس تجاه اى تصرف ليها
انا مش عارف اتصرف ازاى و نفسى حد ينصحنى اتصرف ازاى بجد و ارتاح ازاى
انا وصفت كل حاجة و بالتفصيل عشان تعيشوا حالتى و تقولو لى ايه التصرف الامثل و لو فيه طريقة انساها بيها بسرعه يا ريت اعرفها
انا عارف ان ممكن يكون كلامى مش عقلانى بس ده اللخبطة اللى جوايا و نفسى تساعدوتى اوى
و شكرااااااااااااااااااااااااااااااااااا