بسم الله الرحمن الرحيم

رمضان على الابواب كلمه بنسمعها كل سنه ومبتكملش كام يوم وتلاقى رمضان قاعد فى الرسيبشن ومستريح على الاخر ومنورنا ومفرحنا بمجيته العزيزة علينا كلنا

رمضان شهر مكانته فى قلوبنا مكانة دينية رمضان زى النهر بيروى الناس بالطاقة والايمان الى يساندهم طول السنه

وعدم الامؤخزه اختباررررررر كبير ليك من ربنا لان الشيطان بيكون مغلل فى رمضان يعنى واخدله شهر مع الشغل و اى اعمال بتعملها بتبقى من نفسك مش من الشيطان الى كلنا واخدين حجه

امثله كتير جدا بتحصل معانا فى رمضان بتبين الى انا عايز اقوله ومنها :

- رمضان مش شهر مسلسلات رمضان شهر عبادة مهى المسلسلات طول السنه خليكوا فى الشهر ده مع ربنا

- رمضان فرصه لكل مدخن انه يبطل سجاير مش يكتر منها لما تبقى فى شهر طويل عريض مشربتش غير 15 سجاره مثلا ساعتها حتبقى متحمس انك تبطل مش مجرد الاذان ياذن تلاقى نص العلبه اتنسف ومستنى تفطر علشان تحبس بالباقى

- صلاة التراويح دى من اكتر العبادات المروحه والمحفزه للنفس معلش بعد متخلص الفطار وتحبس بالشاى الحبر ابقى اعصر على نفسك لمونه وانزل صلى مجرد حتدخل الجامع حتحب الصلاة اوى

- العالم الحلوه الى بتاخد الفطار حجه علشان المغرب يتصلا فى البيت ولما تروح الجامع متلاقيش 4 على بعضهم عدم المؤخزة مينفعش الكلام ده مهوا مش سيدتك نقعد تفطر وتستمتع وغيرك بيحارب لرضا ربنا وبيفضل رضا ربنا على الفطار ابقى اضرب التمر بالبن سريع سريع وانزل الحق الجماعه فى المسجد

- مش علشان انت صايم يبقى الشغل ده يتحرق بجاز المساعدة فى اتمام مصالح الناس عبادة زى الصوم فمتخدش الموضوع حجه وتقضيها نوم وتخلع قبل اخر معادك ب 4 ساعات ومصالح الناس فى ستين سلامه

- حاجه بقى مش فى رمضان بس لا على طول انا ساعات بدخل المسجد بلاقى ناس بتخطف صلاة السنه فى 20 ثانيه مجرد يقول الله اكبر بيركع ويسجد فى ثانيه ايه يا عمنا براحه هو انت وراك الوزاره وحتى لو وراك الوزاره تتحرق الوزاره بس ادى الصلاة حقها وبرضه متاخدش الكلام ده على اساس انك تنام فيها لا خير الامور الوسط

- رمضان زى مهوا شهر الطاعه فهو شهر تحقيق الاهداف يعنى فى رمضان بتبقى الهما عاليه والطموح فى السقف وبتبقى مقبل على الحياة خلاص يبقى تاخدلك نص ساعه يوميا كده فى رمضان تحطلك هدف نفسك توصله وتبتدى تفكر فى الهدف ده يوميا لمده شهر علشان على اخر الشهر تبقى قدامك رؤيه حتعمل ايه بعد كده وحتنفذ هدفك ده ازاى

- حاول تمسك لسانك شوية لا لشئ الا انك لو اتعودت انك تمسك لسانك فى رمضان يبقى حتقدر بعد رمضان

- نصيحة اخويا متحفووووووش فى الفطار كل الى يسد جوعك مش الى يسد عين الشمس علشان بس تعرف تصلى التراويح

وكل عام وانتم بخير

الموضوع من كتابتى
Betatraceur

جزاك الله خيرا

تسلم كتاباتك