يارا : اناكنت موجودة انا وماماوشادي اخويا مع طنط ماجدة في الشقة عشان هيه قالتلنا ان عمو ايهاب مش حييجى النهاردة .. وبعدين جه عمو/ إيهاب .. واحنا كنا قاعدين في أوضة النوم وعمو إيهاب قعد في الصالة وطنط ماجدة طلعت له وبعدين دخلت أوضة النوم جابتله بيجامه .. طلعت انا علشان أشوف شادي أخويا لانه كان قاعد علي الكمبيوتر في الصالة .. طنط ماجدة قالت لي خشى جوه لغاية ما عمو إيهاب يغير هدومه فرحت داخلة أوضة النوم وصحيت ماما وقلت ليها عمو إيهاب جه ياماما ... ماما افتكرت انه جه في التليفزيون فقالت لي خلي طنط ماجدة تتفرج عليه ... قولتلها لا مش فى التليفيزيون هوه برة قاعد في الصالة بيغير هدومه فراحت ماما قامت بسرعة لابسة جلابية من هدوم طنط ماجدة وخرجت للصالة وعمو إيهاب كان لبس خلاص .. وقعدنا معاه في الصالة وكان بيشرب سيجارة وبعدما خلص السيجارة دخل اوضة النوم وكانت طنط ماجدة جوه ... رحت أنا نايمة علي الكنبة الصغيرة اللي قصاد التليفزيون وماما كانت نايمة علي الكنبة اللي جنب الباب قصاد الروف وشادي كان نايم علي الكرسي وبعد دقيقة ونص كده لقينا طنط ماجدة خارجة وعمو ايهاب كان بيضرب فيها بإيديه .. وبعدين ماما خدت عمو ايهاب ودخلوا هما الثلاثة أوضة النوم وبعد شوية سمعت طنط ماجدة كانت بتزعق وتقول أنا اللي جايبه لك البدل والعربية والموتوسيكل وسمعت ماما بتقولهامعلهش استني شوية ماتزعقيش قوي كده ... وبعد شوية ماما خرجت وهي خارجة كانت بتقول لعمو ايهاب أنا هعمل لك احسن كوباية ينسون, وماما راحت المطبخ وأنا رحت معاها وجابت الينسون وجابت الكوباية وجابت كيسين سكر فتحتهم حطتهم في الكوباية وبعدين سمعنا صوت فرقعة بتاعة مسدس وأنا وماما جرينا نشوف طنط ماجدة لقيناها مرمية علي الأرض بين أوضة النوم والأوضة اللي جنبها وراسها عماله تجيب دم وعمو ايهاب كان قاعد جنبها بيقول ضيعتي مستقبلي وبيلطم علي وشه وعمال يعيط وأنا قعدت أعيط وماما شدتني وطلعنا علي الروف وكلمت خالو حمدي وقالت له إيهاب قتل ماجدة وتعالي بسرعة وبعدين جينا من الروف قعدنا علي السلم جنب باب الشقة ولقيت عمو ايهاب خرج لينا وكان لابس لبس خروج وشد الكرسي وقعد جنب الثلاجة الكبيرة وكلم بتوع الشغل وقال لهم أنا موت ماجدة وماينفعش آجي الشغل .. وبعدين اتصل بواحد تانى قاله يامجدي أنا موت ماجدة وبعدين قال له ماهو أختها وبنت أختها قاعدين معايا ..وبعدين عمو مجدي قال له حاجة وعمو ايهاب رد عليه وقال له ما هو حضروا من الأول خالص وبعدين عمو ايهاب دخل الحمام وراحت ماما متصلة ببابا أو بخالو حمدي وقالت له أنتو اتأخرتوا ليه ... وبعدين ماما نزلت فتحت ليهم باب البيت وهما طلعوا ... وبابا خلاني أنام مع شادي علي الكنبة وبعد شوية فيه واحدنده من تحت وماما نزلت فتحت له الباب وكان معاه واحد بوليس وجم قبضوا علي عمو ايهاب.
بعد ذلك سئلوا الفتاة عن نوع السيجارة التى كان يتناولها المتهم قالت : هيه كانت تخينه من قدام شوية ..
وانكرت الفتاة انها رأت المسدس المستخدم فى الجريمة فلم يكن له وجود بعد الحادث
طبعاً أنا جبتلكم الجزء المهم من اقو ال الشاهدة ولكن لم اكتب كل الاسئلة وكل الاجابات بسبب طولها...