انا لظروف خاصه كنت فى البيت الفتره اللى فاتت فقدرت اتابع 4 مسلسلات تقريبا اه كنت فاضى اوى
لحد ما زهقت قصدى الكليه ابتدت
هقدم لكم شويه ملاحظات كدا على المسلسلات دى وياريت كل اللى تابع حاجه يشارك برايه
1-قدم يحيى الفخرانى المسلسل مختلف تماما عن يتربى فى عزو واعتقد ان مسلسل شرف فتح الباب هو احسن المسلسلات السنادى خصوصا انه قدر يقدم قضيه حقيقيه بطريقه متقنه
2- الدالى : اعتقد ان الجزء التانى جه اقل من الاول وكمان السرعه والاثارة قلت كتير عن الاول الا انه ككل مسلسل جيد بس فيه شويه حاجات زى التطويل وكمان شويه احداث تحس انها محطوطه وخلاص
3- فى ايد امينه : انا شايف ان يسرا بعدت كتير بالمسلسل دا خصوصا انها كانت مقدمه مسلسل جيد السنه اللى فاتت لكن المسلسل دا كان ضعيف اوى خصوصا ان اتعرض لكذا قضيه وخلاص على طريقه انه بيفتح الموضيع وخلاص
وهوووب راح قالب على تشغيل الاطفال وهووووب راح قالب على تجارة الاطفال وهوووب تالت راح داخل فى العشوائيات كل دا والقضايا دى بتتناقش اكنهم ايه ناس هاى كلاس بتبص على ناس بيئه يا عم الحج احنا بنشوف الناس دى كل يوم عادى ولا المسلسل دا معمولللطبقا العليا بس ولا يه
مش لو كانو ركزو على قضيه واحده كان يبقى احسن ويوصل للناس اكتر
4- قلب ميت: المسلسل كان ماشى كويس لحد الحلقه ال10 تقريبا وبعدين راح قالب مسلسل هندى بصبغه مصرى فابتدى البكاء والنواح والذى منه بشكل مبالغ فيه يخلى الواحد يطفش من التلفزيون كله
مسلسل جيد
ظل المحارب : دا شفت منه شويه حلقات كدا على الماشى
دراما جديده عن العالم العربى ويحسب ليهم انهم قدرو يقدمو موضوع بالجراءه دى وفى التلفزيون المصرى والمسلسل عن دوله كربستان اللى هى من العالم التالت اللى حصل فيها انقلاب ويدور الصراع بين الثوار والسلطه اللى بيسندها العالم الاول
ملاحظات مش عارف
:1-كميه العياط والحزن والبؤس الغريبه دى مش عارف ليه حتى لو كانت حلقه مرتين تلاته انما كل حلقه لازم تلاقى حد بيعيط وخلاص اكنهم بيقولو شارك معانا بدموعك
2- لازم تلاقى كل مسلسل يصور فى فيلا او قصر مش عارف ليه مع ان 98 من الشعب المصرى ساكن فى شقق عاديه وتقريبا معظم الناس بتشوف الفلل دى من برا او فى التلفزيون
هتقول ما لازم رجل اعمال يكون ساكن فى فيلا طب ليه اساسا بتجيب رجل اعمال ليه مفيش مسلسل يتكلم علينا احنا الشعب !
3- فكره تقديم ديما العشوائيات على انها عالم تانى وناس تانيه غريبه مش عارف ليه ما هم بردو مصريين وعايشين عيشه بس هم ظروفهم كدا
4- كميه البودىجارد اللى فى المسلسلات تحسسك ان كل واحد فيهم بيمشى ومعاه فرقه مدرعات
اعتقد ان دا مش بيحصل ديما فى الواقع
5- التطوييييييييل بطريقة رخمه ما هم لازم يقفلو 30 حلقه اما كدا او لا مع انى بشوف مسلسلات اجنبيه مشهورة بتبقى 25 وساعات 15وبتنجح جدا المهم المضمون
6- لحظت فى مسلسل فى ايد امينه جزء من الموسيقى التصويريه للمسلسل الامريكى lost مش عارف ليه استخدموها ولا ايه العلاقه
وكفايه كدا انا طولت عليكو
ياريت كل واحد كان متابع حاجه ياشارك ويقول عجبه ايه ومعجبوش ايه وكل سنه وانتم طيبين