طبعا كل شاب عاوز شابة يتجوزها، لكن مش كتابة كلمات الحب والرومانسية هي اللي هتخليه يتجوز، ده حرام، إذا كنا عاوزين نصطاد البنات ونتجوزهم يبقى نحاول نكون أصحاب عفة، صحيح المسألة صعبة شوية، لكن النتيجة في الآخر بتكون عظيمة.
الدعاة بيطلبو مننا نقتدي بموسى عليه السلام، لما لقى بنتين واقفين عاوزين يسقو الغنم فسقالهم، وبعدين كل واحد مشي في حاله، مفيش كلام زيادة من غير لزمة، محدش عاكس ولا هزر، وكان موسى تعبان من السفر وجعان جدا بعد ما قطع كذا يوم في الطريق، ورفع الصخرة من على البير وهو تعبان، لكن مفكرش يروح عن نفسه ويهزر مع البنتين، قال الله -تعالى-: ( ولما ورد ماء مدين وجد عليه أمة من الناس يسقون ووجد من دونهم امرأتين تذودان قال ما خطبكما قالتا لا نسقي حتى يصدر الرعاء وأبونا شيخ كبير فسقى لهما ثم تولى إلى الظل فقال رب إني لما أنزلت إلي من خير فقير).
بعد شوية جت بنت من البنتين المؤدبتين لموسى عليه السلام عشان يروح معاها لأبوها عشان يكافئه على اللي عمله، فراح موسى وأبو البنتين أكله وأكرمه، وبعدين كان لقاؤه بالاسرة الصالحة دي سبب خير له، تصوروا جاله شغل وجوازة، أبو البنتين عرض عليه يجوزه وحدة منهم ويكون مهرها إن موسى يشتغل عنده راعي للغنم 8 أو 10 سنين، قال الله -تعالى-: (فجاءته إحداهما تمشي على استحياء قالت إن أبي يدعوك ليجزيك أجر ما سقيت لنا فلما جاءه وقص عليه القصص قال لا تخف نجوت من القوم الظالمين قالت إحداهما يا أبت استأجره إن خير من استأجرت القوي الأمين قال إني أريد أن أنكحك إحدى ابنتي هاتين على أن تأجرني ثماني حجج فإن أتممت عشرا فمن عندك وما أريد أن أشق عليك ستجدني إن شاء الله من الصالحين).
لو عاوز تشنكل عروسة سيبك من الحب والغرام اللي هنا لأنه حرام، حاول تبطل تكتب الكلام الرومانسي، وربنا هيكرمك بعروسة، بس هو عاوزك تصبر شوية، قرب منه واطلب منه ييسرلك الجواز.