في أسئلة بديهية مالهاش اي لزمة في الدنيا
بنتعرّض ليها كل يوم من كل الناس
خلـونـــا نشــوف أمثلة
إنت في أوضتك .. على السرير وطافي النور ومتغطي
ييجي أخوك الظريف ويفتح الباب عليك ويقول : ايه ده انت هتنام ولاّ ايه ؟
(( أظن ده مش وضع الرقص !!! واضح ان انا هنام ))
***********
انتم معزومين عند ناس ورحتو لبيتهم وأول ما فتحولكوا الباب يقول ابنهم الصغير: انتوا جيتــوا ؟
(( لا لسه ))
***********
انت لابس هدومك و متأنتك و على سنجة عشرة وريحة البارفان واصله لاخر الشارع ..
وخلاص بتفتح باب الشقة,, يجي حد من أهلك وينادي بصوت عالي : انت خرج ولا اييييييييييه
(( !!! لاء دانا لسه راجع ))
**********
راكب العربية ودورتها وخلاص هتطلع ...
يجيلك لك البواب ويخبطلك على الزجاج,, انت بكل ذوق تفتح الزجاج وتقوله : خير في حاجة؟
يقولك : انت رايح الشغل يابيه ؟
(( لاء.. العربية وحشاني ))
***********
ماسك مذكرة أو كتاب وقاعد تحفظ ومتحمس (أول مره بقى) ..
جه حد وقالك: هاه.. قاعد تذاكر ؟
(( تقوم رامي الكتاب و تقوله لاااء ))
***********
ماسك سماعة التلفون وقاعد تضغط الارقام يجي حد من أهلك ويقولك: انت هتتكلم في التليفون ؟
(( لا.. بتفرج عليه ))
***********
ربنا هاديك كده ... ماسك سبحة و عمال تسبح ، يجي حد من البيت يعدي عليك ويقولك: هوه انت بتسبح ؟
(( لاء.. هفرطها و أسلقها ))
***********
ولا تعالــو شوفو قنواتنا واسئلتهم البديهية البايخة
برنامج اهداءات يتصل واحد يطلب أغنيه
ترد عليه ست الكوتكوته (المذيعة) بكل خفه ورشاقة : إنتا بتحب الاغنية ديه ولا ايه ؟
(( لاء.. طالبها اخنق على نفسي ))
***********
أو مثلا في العيد
المذيع : هههههه هههههههه هههههه نتعرف بيك
المواطن : فلان الفلاني
المذيع :هههههه هههههه بتقول ايه للأهل ههه و صحابك ههه وقرابيك هههه و للناس اللي انت مخاصمهم كمان ؟
هههههه هههههه ههههههه
المواطن : أقول لهم كل عام وأنتم بخير
(( أكيد يعني مش هيقولهم البقاء لله ))
***********
والأسخف بقى ... الشلل الكبير.. لما المذيعين يكلموا الاطفال
يقول المذيع للطفل : إنت بتحب ماما وبابا ؟
(( يعني أساسا الواد لسه ما طلعلوش من البببببببببب علشان يقول لأ ))