بسم الله الرحمن الرحيم




حدّدي نوع بشرتك.. واعرفي نوع الماكياج المناسب لها
الماكياج محتاج لدقة في التعامل معاه، ولازم كل بنت تعرف إزاي تظبّط كمية الماكياج على بشرتها، وكمان تحدّد نوع بشرتها كويس؛ علشان تقدر تختار أنواع الميك أب المناسبة لها؛ فمثلا لو بشرتك دهنية ما ينفعش تستخدمي كريم أساس فيه نسبة زيوت؛ علشان كده النهارده هحاول أشرح لكم الفرق بين كل نوع من أنواع كريمات الأساس، وإيه استخدام كل نوع منهم.

لكن قبل ما نتكلّم عن الماكياج، عايزة أكّد إن الاهتمام بصحة ونضارة ونظافة البشرة حاجة مهمة جدا؛ لأن مش صح إنك تهتمي إنك تداري الحبوب والعيوب اللي موجودة على البشرة بالميك أب؛ لأنك بالطريقة دي مش بتعالجي المشكلة، لكن بالعكس إنتي بتزوّديها، لأن أدوات الميك أب بتنقل العدوى من مكان للتاني، علشان كده لو عندك مشكلة في بشرتك لازم تبدئي تعالجيها عن طريق استخدام العلاجات الطبية أو الماسكات الطبيعية، وطبعا الموقع بيقدّم حلول طبيعية وماسكات كتيرة لعلاج مشكلات البشرة.

ودلوقتي هنعرف مع بعض الخطوات الصحيحة اللي لازم كل بنت تعملها علشان تعمل ميك أب بشكل سليم:

صن بلوك
وده أوّل حاجة هنحطّها على بشرتنا قبل الماكياج؛ لأنه بيحمي البشرة من أشعة الشمس الضارّة، ومن أفضل الأنواع اللي موجودة في السوق هي بايوديرما بمعامل حماية 100%، والنوع السائل اللي هنشوفه في الفيديو ده مناسب جدا للبشرة الدهنية أو المركّبة، أما البشرة الجافة فبيناسبها النوع الكريمي.

Make Up Base
ده تاني حاجة هنحطّها بعد الصن بلوك؛ وده ميزته إنه بيحافظ على نضارة البشرة، وبيعمل طبقة عازلة بين البشرة والميك أب، وبيثبّت الميك أب أكتر، وبيخلّيه يقعد فترة أطول، كمان ممكن تستخدميه كبديل لكريم الأساس لو بشرتك مش محتاجة أو مافيهاش عيوب كتيرة.

وفيه ماركات كتير كويسة ممكن نستخدمها؛ زي ميك أب فور إيفر، وبرفكت وايت، والماركة دي ميزتها إنها بتنوّر الوش، وبتداري وتعالج آثار البقع الناتجة عن التعرُّض للشمس وكمان آثار الحبوب، بالإضافة إلى إنه بيدي لمعة طبيعية للوش، وممكن تستخدميه كبديل للصن بلوك لو مش هتتعرّضى للشمس لفترة طويلة؛ لأنه بيحتوي على معامل حماية 30%.

كريم الأساس
فيه أنواع كتير من كريمات الأساس؛ زى: البودرة المضغوطة، ودي بتناسب البشرة الدهنية أو المركبة، والنوع ده بيدي نسبة ثبات أعلى للميك أب، وطبعا بتتحكمي في كميته إذا كانت كتيرة أو قليلة على حسب هتستخدميه الصبح أو بالليل، لكن عامة أنا مش بافضّل استخدام كريم الأساس في كل وقت؛ يعني ممكن تستعمليه مثلا لو بشرتك مجهدة أوي، لكن لو البشرة مش محتاجة يُفضّل إنك تكتفي بـMake Up Base.

وفيه أنواع تانية من كريم الأساس، زي الإستيك، لكن النوع ده بيستخدمه المتخصصين في الميك أب؛ لأنه بيحتاج تحكّم علشان لو كميته زادت بيدّي شكل مش حلو.

وفيه كمان النوع السائل، وفيه ماركات منه بتستخدم لإخفاء التجاعيد أو لشدّ الوجه للبشرة المتقدّمة في السن.

الكونسيلر
فيه منه أنواع كتيرة؛ منها المضغوط، أو اللي بيكون كريمي في أنبوبة، وإنتي بتختاري النوع اللي يناسبك، ولما تيجي تحطّيه لازم توزّعيه بشكل كويس، يعني بلاش توزّعيه على شكل دواير تحت عينيكي؛ لأنه بيدّي شكل مش لطيف، وبلاش تكتري من الكونسيلر فوق عينيكي علشان مايقطعش منك أو يعمل خط أبيض على الجفن.

البودرة
فيه منها البودرة المائية ودي بنستخدمها بالميه، والنوع ده ممكن تستخدميه بعد كريم الأساس أو من غير كريم أساس، لكن أنا بافضّل البودرة السايبة بعد كريم الأساس؛ لأنها بتبقى أخف وبتدي نتيجة أحلى، والبودرة السايبة فيه منها درجات مختلفة، وكمان فيه منها اللون الشفاف، وده بيليق مع كل ألوان البشرة.

ودلوقتي تعالوا نشوف الفيديو علشان نعرف إزاي نوزّع كريم الأساس والكونسيلر والبودرة على البشرة بشكل صحيح..