دى بصراحه اول مشاركه ليا فى المنتدى الجميل ده ويمكن انا بقالى كتير متابع المنتدى بس ما جتليش الجرأه ان انا اتكلم واقول اللى فى قلبى الا دلوقتى وارجو من اللى يقدر يساعدنى وينصحنى انه مايتاخرش فى الرد عليا ويقولى على رايه فى الموضوع ده.
انا ليا واحد صاحبى عنده اخت جميله جدا المهم ان انا اعجبت بيها جدا وهى كمان المهم ان انا ارتبطت بيها جدا بعد ما قلت لاخوها ولمامتها وكلهم كانو مرحبين جدا بالموضوع بس والدها كان لسه ما عرفش ونظرا لظروف شغلى الغير مستقر ماكانش ينفع اتقدم رسمى ليها فى البيت فى الوقت ده المهم ان انا عشت معاها احلى قصه حب استمرت لمده 7 شهور وبعد ماهى خلصت امتحانات الكليه فى سنه تالته ابتدت تقولى ان والدها بقى بيلاحظ انها بتتكلم فى التليفون كتير وبعد كده ما بقتش بتتكلم زى الاول بعد كده ربنا اراد ان انا اشتغل فى شرم الشيخ وبعد مارحت حسيت ان المعامله اتغيرت تماما مش زى الاول وقالتلى ان المشاكل زادت قوى بينها وبين والدها وان هو اخد منها الموبايل وباعه بالخط وان هى مش عارفه تكلمنى وانا لما لاقتها كده قولت احاول انى اخلى الموضوع رسمى رحت متصل باخوها وقلتلوه ان انا مستعد اول اجازه انزلها اتقدملها رسمى وقلتلوه يكلم اخته ومامته ويعرض عليهم الموضوع ويرد عليا .
فوجئت تانى يوم بان فى رساله جياللى على الموبايل منها بتقولى "انت كان المفروض تقولى انا ماتقولش لاخويا وعلى العموم انا باحترمك وبصراحه انا استخرت ربنا وحاسه ان الموضوع ده مش هاينفع"
انا ماعرفش ايه اللى خالانى مااكلمهاش وكلمت اخوها راح قايلى ان هو عرف ان اخته كلمتنى وفهمتنى على كل حاجه.
المهم انا تعبت قوى الفتره دى واتبهدلت وبصراحه لسه بحبها لحد دلوقتى وكان فى فرح من يومين بتاع واحد زميلنا وانا شوفتها بعد تقريبا سنه مش عارف اشوفها وانا كنت هاموت واكلمها ولما شوفنا بعض راحت مسلمه عليا كده من غير نفس مع انى فعلا كنت طاير من الفرحه انى شوفتها وكنت قاعد ادور عليها فى الفرح وعينى ما فرقتهاش.
انا بصراحه مش عارف اعمل ايه انا بحبها جدا فوق ما اى حد فى الدنيا دى يتخيل وفى نفس الوقت فكرت اكلمها بس كرامتى نقحت عليا لان انا ماغلطش فيها وحاولت اعمل اللى ما يتعملش علشان ارضيهاوهى سابتنى بكل بساطه
ارجوكم يا جماعه اللى عنده اى اقتراح ما يبخلش عليا بيه يمكن يريحنى من اللى انا فيه ده.