أهدى الفنان خالد الصاوى قصيدة جديدة لثوار التحرير بعنوان "ثلاثين سنة يا شيخ حرام"، وهى كالتالى..
ثلاثين سنة يا شيخ حرام
جَوَّك أليم
شكلك قديم
لأ والأكادة إنك حترحل بعد عمر.. طويل.. طويل
وتسيبلنا الواد الرزيل
يلعب فى باقى عمرنا
شوف الدماغ بنت الحرام
يا شيخ حرام
الثورة بكرة يا سيدنا فوق
ده بكرة تحت حيبقى فوق
واللى اتفحت من نور جنابك عمره كله واتخنق
من حسن حظه يجيله يوم.. منك يفوق
بتلوم عليا طول لسانى؟
لوم عليك طوله إيديك
مطرح ما أقول ألقى القلم
ومنين ما أروح.. متقفلة
الشاب عجّز من زمن
وبلدنا سقطت مرحلة
أنت اللى فاهم كل دبة وحلها
وأنت اللى عارف إيه الحلال وإيه الحرام
وأنت اللى أطول مالجميع
وأنت اللى أحكم من حكم
وأنت الحكم، وأنت العَدَل
وأنت الهرم، وأنت الصنم
وأنت الحقيقة المزمنة
وما خفى فيك.. ما أعظمه!
إسكندر المقدونى بس طراز جديد
جثمان حديد
فؤاد جليد
وعقل أغرب مالخيال
وحق عشرتنا الطويلة يا شيخ بقى
اخلع بقى
فرصة المطار فاضى ومالطة مريَّحة
والشغل مش على ودنه لسة يا عرب
ده الجاى لوز عالناس، وعلقم عالردى
لون الحياة يرجع فَرمزى
والناس مزاجها زمردى
وأدينى يد على يدى
والنعمة تكفى.. ونكتفى
بس اختفى