هاى عليكم يا احلى بنات فى الدنيا

جبتلكم الموضوع ده عشان تعرفو الفرق بين باباكم واجوازكم فى المستقبل ان شاء الله
اسبكم بقى مع الموضوع


مع بابا.. دخلتى المطبخ ما دخلتيش .. كله واحد وممكن باباكى يساعدك
انما مع جوزك .. مش بمزاجك .. ها تدخلى .. هاتدخلى

مع بابا .. فى العيد بيديلك العيديه وفوقيها بوسه
لكن مع جوزك .. بيقول انتى خلاص كبرتى على الحاجات دى

مع بابا.. بتنامى وتصحى وقت ما انتى عايزه
مع جوزك .. وقت ماهو عايز .. او مع مواعيد شغله

مع بابا.. بتشترى هدومك ومكياجك وكل اللى انتى عايزاه .. ويقولك حلو قوى عليكى
مع جوزك .. بيشترى لك برضه .. لكن ما قل ودل .. ويقولك .. فلوووووووووووووووووسى والمرتب

مع بابا .. لو حصل حاجه مثلا و كنتى زعلانه .. بيزعل عشانك
مع جوزك .. بيزعل منك .. ويلومك ازاى تزعلى اصلا

باباكى .. كلمه حلوه ترضيه
وجوزك .. طول الليل تحايلى فيه

باباكى .. وانتى عيانه .. سهران جنبك طول اليوم
انما جوزك .. بيروح ينام فى الاوضه التانيه

بابا .. لما تدلعى عليه .. بيفرح بيكى
انما جوزك .. بيقولك ..اكيد عايزه حاجه

باباكى .. لما تقولى له .. ده حصل كذا وكذا .. بيهتم ويصدقك
انما جوزك .. بيقولك .. الموضوع دا وراه انه .. ويشك فى كلامك

بابا .. لو شافك بتعيطى ها يمسح دمعتك
انما جوزك .. ها يقولك يادى النكد

مع بابا .. لو حاطه ماكياج فاقع شويه.. ها يقول لك الهادى عليكى احلى .. وانت احلى من غيره خالص
لكن جوزك .. ها يقولك شكلك زى عروسة المولد

مع بابا .. لو طلبتى دوا من الصيدليه . جرى ها ينزل يجيبه
لكن جوزك .. ها يسالك بكام الأول؟

بابا .. لو طلب منك كوباية ميه .. بيقولك لو سمحتى عايز ميه
انما الباشا .. يقولك قومى هاتى ميه

لو بتتفرجى مع بابا .. على التليفزيون ... ها يسيب لك الحريه تتفرجى على اللى انتى عايزاه
لكن المحروس .. مافيش قدامك غير يا الاخبار يا الكوره .. يا ميلودى

بابا .. لو نازل مشوار .. بيعمل ليكى اعتبار ويديكى خبر
لكن جوزك .. بيختلس عدم وجودك قدامه عشان ينزل من وراكى ولو قفشتيه يقولك انا نازل ويقفل البابا بسرعه

لو محتاجه فلوس فى حاله طارئه .. بابا .. ها يديكى من عينيه
لكن جوزك .. ها يقولك خدى من بابا

لو جالك مكالمه غلط على موبايلك.. بابا .. ها يقولك حصل خير
لكن جوزك .. ها يتهمك بالخيانه

لو ما فيش فى التلاجه غير ازازة بيبسى واحده .. بابا .. ها يسيبها لك بنفس راضيه
لكن جوزك .. ها يقول معلش انا لازم ابلع او ها يقسمها معاكى

لو اتزحلقتى على الارض ..باباكى .. ها يجرى يشيلك
جوزك .. ها يقعد يضحك ويقولك ما انتى اللى مش منشفه الارض كويس

لو نفسك تغيرى مكان السجاده ..باباكى .. ها يقوللك عنك دى تقيله عليكى
لكن جوزك .. ها يقولك مش ضرورى وجع القلب

دا لو العربيه عطلت بيكى .. بابا.. ها يقولك اقفليها وتعالى وانا ها اتصرف
جوزك .. ها يقولك متركبيش العربيه تانى

لو حكيتى لبابا ..على واحد عاكسك .. ها يقولك معلش .. وبعدين عنده حق . مانتى جميله
انما جوزك .. ها يقولك انتى اللى ماشيه مش محترمه

لو مقدمه على شغل .. باباكى .. ها يوصى عليكى طوب الارض
لكن جوزك .. مش ها يتعب نفسه ولا يهمه اصلا وها يقولك يعنى انتى ها تشتغلى وزيره

باباكى لو لاحظ انك متخانقه مع اختك .. ها يصالحكوا على بعض
لكن جوزك .. هيقولك خليهم يولعوا دول عيله عجب

مهما باباكى .. كان متضايق .. لا يمكن تكلميه وتلاقيه مكشر
لكن جوزك .. لو متضايق .. مصر كلها هتنكد عليكي استحملى بقى

ههههههههههههههههههه
حلوة اوى بس كدة تعقدى البنات فى الجواز

ههههههه حلوة اوي
thanks

هههههههه لا يا قمر محدش هيتعقد لان هو ده الى بيحصل عادى يعنى هتتعودو على كده


شكرا يا قمرات على مروركم

ايه يابنى الى انت نشره ده هو فى الحقيقه كويس بس للضحك فقط والدليل على كده انى البنت مابتصدق تخرج من بيت ولدها مهما سمعت عن جوزها

اولا انا بنت يعنى بنتى مش ابنى
ثانيا الموضوع ده للضحك زى ما انت قولت
بس ده ميمنعش انه فى ناس كده برضه
وثالثا البنت ما بتصدق تخرج من بيت ابوها عشان تبقى على حريتها بس بتلاقى حاجه غيره كده
رابعا شكرا على مرورك

ههههههه
والله عندك حق فى كل كلمة قولتيها
تقبلى مرورى

شكرا يا قمر على مرورك