الفرق كبير بين التسميات الثلاثة.
رسمياً إسمها دولة (المملكة المتحدة لبريطانيا العظمى وإيرلندا الشمالية)، وتتكون من أربع دول متحدة: إنجلترا، واسكتلندا، وويلز، وايرلندا الشمالية.
هذي صورتين يبينون الفرق بالأسامي وحتى الأعلام حق كل جزء، الظاهر مسوين حق الأمريكان يقولون دايما يغلطون بالتسميات مثلنا
إنجلترا = إنجلترا فقط
بريطانيا = إنجلترا + ويلز + اسكتلندا
والمملكة المتحدة = انجلترا + ويلز + اسكتلندا + ايرلندا الشمالية،
أو نقدر نقول بريطانيا + ايرلندا = المملكة المتحدة
وبهذي الخريطة تشوفون إيرلندا، بس الجزء الشمالي منها (اللي بالرمادي) يتبع المملكة المتحدة. والجزء الأخضر محد يسميه ايرلندا الجنوبية، بس جمهورية ايرلندا وبس.
زين دام انجلترا هي بس جزء من المملكة المتحدة شكو المنتخب داش كاس العالم بعلم انجلترا الخاص؟
منتخب إنجلترا يمثّل بس إنجلترا مو المملكة المتحدة ككل، كل جزء من المملكة المتحدة له منتخبه الخاص اللي يتنافس فيه بالبطولات العالمية بصورة رسمية بموافقة الفيفا، إلا اللهم بالألعاب الأولمبية ممنوعين من تمثيل روحهم بصورة مستقلة.
أدري وايد يعرفون هالمعلومة بس مو الكل يتابعون كرة، انا واحد من هالناس اللي معلوماتهم الكروية محدودة
اللي يبي يتفلسف أكثر عاد خل يقعد ويتمقل بهاللوحة على راحته، فيها شرح أكثر عن التسميات الأخرى حق بريطانيا:
