الحلقه الاولى
لا لصحوبيه الشباب والبنات
السلام عليكم و رحمة الله و بركاته اهلا بكم معانا ف اول حلقة فى برنامجنا و برنامجكم يلا نغير حياتنا اولا بحب اقولكم ان احنا ف البرنامج ده هنبقى اخوات
و هنسال بعض عن اى حاجة مضيقانا و نعد نتناقش مع بعض على سلبيات المجتمع اللى لازم نغيرها و اللى عنده وجهة نظر غير و جهة نظر الاخر اكيد هتحترم و ع راسنا من فوق بس هتناقش فيها بكل احترام
و بشكر كل الناس اللى شغالة معايا فى البرنامج ده و الناس اللى شجعونى و بجد قدونى حمااس للفكرة و انى اقدمها بشكل حلو ربنا يخليكوا ليا و كمان مبسوطة ان فيه شباب زيكوا كده عايزين يقضوا على سلبيات المجتمع بجد ربنا يحميكم
ثانيا بعد تفكير طويل جدا توصلت اول حلقة ف البرنامج هتتكلم عن ايه فلقيت ان فى ظاهرة مضيقانى و مضيقة اغلبية من الناس و هى الصحوبية بين الولد و البنت و فكرة البوى فريند و الجيرل فريند و ده انا اعتقد انه كلام ميصحش ابدا دلوقتى انا هكلم الطرفين و زى مقولت ف الاول احنا اخوات و تاكدوا انى بخاف عليكم جدا و بحب بلدى عشان كده لازم نتغير اول حاجة هكلم الولد بص اكيد كل انسان و ليه شهوة صح و لا ايه ربنا عمل الشهوة ديه عشان يختبرنا يشوف هل هنمشى معها و لا نراعى ربنا اولا و اخيرا و ضميرنا
طيب طبعا انا متاكدة ان اى ولد عربى كويس و محترم مش هيقبل على اخته انها تتمشى مع ولد او تكلمه ف التليفون واكييد هتعملها حريقة و تتعصب لو شوفت اختك بتعمل الكلام ده طب شوف انت بتعمل ايه مع البنت اللى بتحبها انا مش بقول يا جماعه ان الحب حراام بالعكس الحب شئ جميل جدا و اجمل حاجة ف الدنيا و ده اللى قايم عليه كل الاديان السماويه و فعلا منقدرش نعيش من غيره بس المشكله ازاى نتعامل مع الحب بطريقة ترضى اللى خلقنا و اللى بيحبنا و كمان اللى محتاجة اقوله ان انت لو معجب ببنت و بتحبها روح ع طول اخطبها و يبقى الموضوع رسمى هتقولى انا لسه طالب مكونتش نفسى هقولك فتحها فى الموضوع و اقولها استنينى لما اتخرج صدقنى هتحترمك انا واثقه ان اى حد بيحب و بيخرج مع بنت اللى هى صحبته خايف و مش مرتاح لان هما مش ف النور ازاى البنت اللى بتحبها تعرضها للخطر و تخلى ربنا يغضب منها حراام انت كده بتظلمها بحبك ده اللى معتقدش انه حب بل بالعكس ديه الانانية بعينها و انا اسفه ان اقولك ان ديه انانية مش حب انت عايز نفسك و بس انا بحب البنت ديه يبقى لازم اتعرف عليها يبقى انت بتفرح نفسك و ترضيها و البنت اللى بتحبها هتكسب ايه غضب ربنا ليها و طبعا مترضاش ان البنت اللى بتحبها ربنا يغضب عليها و كل ده بسببك و بسببك كمان ممكن متكسبش حب ربنا ترضاها ليها ؟؟؟ لو ترضاها يبقى انت انانى بكل ما تحتويه من معنى بجد لا انا بقولك اهو ان لو بتحب بنت اول مقابلة ليك معها تقولها انا معجب بيكى و عايز اتقدم ليكى افرض قالتلك كده على طول مش نتعرف و نتقابل اعرف ع طول انك متستحقهاش مش هى ديه اللى هتكمل معاك حياتك و اللى هتثق فيها و هتلاقى احسن منها بكتير صدقنى و الله لان انت نيتك حلوة و عايز ترضى ربنا بجد اللى يعمل كده هو ده الراجل بجد مع احترامى لكل الناس اللى متابعه الحلقه انهارده و ربنا هيجبلك انسانه تحبها و تحبك و هيراعيك صدقنى ممكن حد يقولى طب ازاى مش هيبقى فيه تعارف و نعرف صفاات بعض قبل الجواز هاقولك امال فترة الخطوبة معمولة ليه مفيهااش حاجة لو اتخطبت مرة و اتنين و تلاتة لكن المصيبة انك تتعرف مرة و اتنين و تلاته صدقنى اللى باقولهولك ده لمصلحتك بجد انا مش بقوله عشاان يبقى فرقعة ف البرنامج لأ انا بقوله لان عارفه ان جواك حاجة حلوة و نفس الكلام للبنت
فيه حاجة كمان ان فى شباب كتير بيقول ان سر صفه الرجوله ان انا امشى مع وحدة و اتنين و تلاته لا طبعا الشهامة و الرجوله ف الراجل اللى يعرف الصح دوغرى اللى يراعى ربنا ف البنت اللى بيحبها اللى ميبقاش انانى صدقنى بجد انت لو عملت الموضوع رسمى ع طول تبقى انت انسان كويس جدا و شهم و راجل و انا و كل البنات هتحترمك و ربنا بيحبك جدا و بعدين كفايه حب ربنا ده بالدنيا كلها و هيحميك صدقنى يا ريت كلكم تكونوا سمعنى لانى بجد عايزة اغير ف شبابنا و اعرفهم معنى الحب الحقيقى اللى ربنا يرضى بيه
انا كده كلمت الولد و يا ريت تكون اتاثرت بكلامى
انا هكلم اختى البنوتة دلوقتى الجميله اللى انا وحده منها و خايفه عليها جدا و نفسى برده تفهم ايه هو الحب مش كلام و خلاص
بصى يا حبيبة قلبى انتى بطبعك رقيقة و اغلبيتنا بنحب نحس ان احنا بنات و عايزين نحب و نتحب مش غلط بس ازاى فى الطريق اللى الشيطان عايزه و لا ف الطريق اللى ربنا عايزه؟؟ اكيد كلنا بنقول فى الى ربنا عايزه بس مش بكلام و بس لان ربنا شيفنا بالفعل كمان هنعرف ازاى دلوقتى و الله انا عارفه ان اى بنت لما بتدخل اى علاقه مع شاب و اهلها مش عارفين بتبقى قلقانة جدا لانها ممكن اى حد يشوفها و يتكلم عليها طب قوليلى يا حببتى يبقى كده حب ازاى , الحب مفيهوش قلق لو ف النور و لو ربنا راضى عليه و المشكله انها تكون واثقة و عارفة انها مش بتعمل حاجة غلط بالرغم انها بتعمل اكبر غلط و تبتدى الالسنة بقى ده انا شوفتها و حصل و جرا طب ليه كل ده عشان ترضى اللى بتحبيه و اللى بيحبك صدقينى فيه حد بيحبك اكتر ربنا , ربنا بيحبك اكتر و رفع من شانك تقومى انتى منزله نفسك للمستوى و تبيعى كرامتك بكل سهوله كده يا حببتى و الله انا بقولك كده عشان مصلحتك مش عشاان تضيقى لا و الله و انا بكتب دلوقتى شيفاكى قدامى , و كل ده ليه ده ربنا عيزلك الخير و بيحبك صدقينى و انتى لو مشيتى مع الولد اللى بتحبيه و الحمد لله اتجوزتوا صدقنى انتى عمرك مهتثثقى فيه و لا هو هيثق فيكى و بعدين انتى كده كانك عمله يفطة على نفسك بتقول للبيع اى حد بتحبيه او هو بيحبك اهو انا جاهزة تخرجى معاه و هو يبقى فرحان جدا انتى كده بترخصى نفسك اوى مع ان ربنا علاكى و خلاكى جوهرة و قفل عليكى تقومى انتى ترخصى نفسك و كل ده ليه عشاان حبيبك لأ مينفعش طب و ربنا مش ف حسابتك ابدا , ندخل ف نقطة تانيه انتى لو صاحبتى ولد و مشيتى معاه و لا قدر الله متجوزتوش او الموضوع مبقاش رسمى هيبقى ايه اخرة الحب ده اكيد هتكونى ف انهيار و اكتئاب مع ان ده مش معنى الحب , و لا قدر الله ممكن فى ناس متقبلش ان البنت اللى هيرتبط بيها تكون مرتبطة قبل كده و لما يجى عريس تانى ليكى و يسال عليكى هيعرف ان انتى كنتى ماشيه مع ولد قبل كده و مش هيثق فيكى بعد كده و حياتكم مش هتبقى لذيذة و مش هترتاحوا مع بعض و اخرتها مش هتقدروا تكملوا مع بعض لا قدر الله فحافظى على نفسك و اعرفى انك غاليه جدا جدا جدا و بقولك اهو اسفه لكل الشباب اللى متابعه الحلقه ان اغلب الشباب بيضحكوا على البنات و تلاقيهم دلوقتى بيقولوا فعلا الكلام ده صح صدقنى و تانى مرة اسفه بس انا عشان بحبك جدا و عايزاكى غاليه بقولك الكلام ده و لو ان انا عارفه ان فى بنات كتيير هينتقدونى و انا هتقبل النقد جدا بس عارفه ان من جواهم بيقولوا نفس الكلام اللى انا بقولوا ده , فى ممكن وحده تسال طب انا لو مصحبتش مش هاجوز هاقولها لا و اكبر لأ صدقينى انتى لو رعيتى ربنا ف نفسك و فضلتى محافظة على نفسك ربنا هيكفأك و هيجبلك راجل بمعنى الكلمة يحترمك و يحبك و يراعى ربنا فيكى صدقينى ربنا مش بينسى حد و الله العظيم ثقى مليون ف الميه و الله ان شاء الله هو ده اللى هيحصل بجد و انا بحبك جدا و الله عشان كده انا بقولك الكلام ده
و بعدين انا اعرف ان كان فيه واحد فى كليه الهندسة كان الاول لعبى و بيكلم مع البنت اللى بيحبها و يخرج معها و بعد كده تدين و بقى محترم و عمل عمرة و لما رجع قال للبنت انه حراام انى اقبلك بس انا لسه بحبك فستنينى لما اخلص و فعلا البنت احترمته جدا و استنته و راح اتقدملها بعد مخلص الكليه و اشتغل و اتجوزوا و النتيجة الحلوة ايه خلفوا 6 عيال ما شاء الله و عايشين احلى عيشة و متهنين الاتنين محترمين بعض و بيحبوا بعض جدا شوفتوا ربنا مش بينسى حد ازاى ربنا كريم اوى اهو ده نموذج حلو و كويس و بيدينا امل
و ف اخر الحلقة احب اقولكم ان الولد او الشاب انت هتبقى ف عين البنت اكثر احتراما و تقديرا لما تدخل البيت من بابه
و للبنت انتى فى عين الولد جميلة و غاليه لو حافظتى على نفسك و قولتى ( لا للصحوبيه ) و مشيتى ف طريق ربنا
اسم حملتنا ف حلقتنا -لا للصحوبيه- يا ريت نعمل الموضوع ده و نحاول نعدل العادة السيئة جدا ديه
و يا رب الحلقة ديه تعجبكم ان شاء الله
فيه حاجة نسيت اقولها اللى مع الحمله و متفق معاها يا ريت يكتب فى التوقيع بتاعه لا للصحوبية بخط عريض
و تحطوا تصميم الحمله اللى هيعمله etch evil و تحاولوا تبعتوها لكل الاعضاء اللى مش بيتابعوا البرنامج و كمان بره المنتدى عارفه ان الموضوع صعب بس انا واثقة ف شباب و بنات منتدى اف ام الرائعين بجد هيكونوا قد المهمة ربنا يوفقكم و يحميكم
ملحوظة : 1- عيزاكوا تقولولى انا قدمت الحلقة بشكل كويس و لا لأ و تقولوا بكل الصراحة لو قدمت حلو قولوا حلو و لو وحش قولوا وحش و انا مش هزعل بالعكس هفرح لانى هاعرف ان انتم حبيتوا البرنامج و عيزينوا يتقدم بشكل افضل
2- بعد الحلقة ديه هتتابع الحلقة التانيه و لا لأ ؟؟؟؟؟
و فى الاخر هقول يلا .... نغير حياتنا
و السلام عليكم و رحمة الله و بركاته
---------------------------------------------------
الحلقه الثانيه
لن اعيش فى جلباب الغرب
---------------------------------------------------
الحلقه الثالثه
انا مش هادخن
انا مش هادخن
---------------------------------------------------
الحلقه الرابعه الجزء الاول
