انا في رايي دايما اللي بينجح انه ياخد منك فلوس بيكون هو الشحات المحترف اللي مسواه المادي ممكن يكون اعلى منك، ودايما اللي يكون اسلوبه غلبا ومقتصر على الدعاء او اي حاجة بيكون محتاج، انا اصلا واحد مرة قال لي اوعى تدي حد فالشارع فلوس اطلاقا ادي للجامع او اي جمعية خيرية كل اللي فالشارع نصابين !!
حكالي مرة واحد صاحبي انه كان متعود يدي اللي فيه النصيب لست كانت بتعد في طريقه للكلية، ومرة شافها نازلة من عربية مرسيدس فحتة تاني خالص !! .. بلاش دا
الموقف اللي لسه حاصل لي قريب.. بنت صغيرة جات بقولي ربع جنيه ربع جنيه.. فلاحظت ان جلدها مقشر، فافتكرت ابوها مولع فيها ولا حاجة صعبت عليا قوي وسالتها ايه دا ؟ قالت اصل انا كنت بصيف في فايد .. قلت ومالو هم مش من حقهم يصيفوا ولا ايه .. وجات مكملة والاسبوع الجاي رايجين العين السخنة !!
طويب
نماذج من الشحاتة:
نموذج الشاب صاحبك في الشحاتة
تبقى مثلا ماشي في مدان اليزة يطلعلك واحد يقول لك يا كبتن انت منين؟ تقول مثلا من طنطا ... يقولك انا برضو بشبه عليك.. منين من طنطا .. من ميدان الساعة .. حبيب قلبي وهب بقيتوا صحاب ويحسسك انكوا لازم تاخدوا موبايلات بعض حالا ويمكن تخرجوا سوا باليل.. وبعد كدا طب انا كنت عاوز اروح وعاوز التذكرة.. وسعات يبقى شكله جنتل جدا وناس كتير تصدق وتديله التذكره كامله.. مهو بلديات.. مرة واحد من دول نفتله خالص وكنت مخنوق منه.. قعد مثل لي فيلم الارض.. وقال هي دي اخلاق ولاد البلد... مهو دا العشم وكلام من دا للصبح...
نموذج البنت الصغيرة ام دم خفيف
ينتشر في الحسين وتحديدا قهوة الفيشاوي.. حيث ترى بنت بكيس مناديل داخلة عليك وعمرها ما تقولك هات.. تيجي مثلا تقول.. انت زعلان ليه.. انت لابس كدا ليه... ويسلام بقى لو مجموعة شباب.. ترشق معاهم فاي حوار.. لو بيتكلموا فالذرة ممكن تفتيلهم عادي جدا.. وتلاقيها بقت جزء من القعدة .. وعيب قوي لما تقوم بكيس المناديل دا تاني .. لازم حد من البرنسين اللي قاعدين يشربه.. وهو دا الاحتراف.
نموذج البرنس
ودا راجل في منتهى الشياكة ويخش مرة واحد ويقول : ممكن 2 جنيه ولو قلت لا مش ممكن بيمشي فعلا.. نموذج شيك مناسب لعصر السرعة
نموذج متحدي الاعاقة والصم والبكم
وللاسف ناس فعلا بتبقى معاقة.. وناس بتستغل دا وتبقى زي الفل..مرة واحد صاحبي فمعرض الكتاب واحد اداله ورقة من بتوع الصم والبكم فصاحبي خدها ومشي وكان فاكرها دعاية.. اهو ورق بيتلم .. فالواد جري وراه وعمال يشاور واحد بصباعة قصده بجنيه يعني.. وصاحبي مش فاهم حاجة وقالو عاوز ايه.. التاني قعد يعمل اخرس . .. واعوا اعوا وايهع ايهع والكلام دا.. وصاحبي دماغة فالطراوة... واخر ما زهق الواد قالوا يا عم دا بتاع الصم والبكم افهم بقى ومشي !!
موقف مشابه حصل فكافيه كوستا فجامعة الدول.. واحد دخل علينا بورق الصم والبكم وعشان احنا شوية سباب مع بعض فكوا مننا بسهولة وراح على بنتين شيك قوي لوحدهم، والحركات بقى ايها .. اهو اهو اعو اعو والكلام دا والبنات بتقولو يحنن .. الله يسهلك.. اخر ما زهق جه قايل : ** *** والمقصود بالعلامات شتيمة لاذعة بالام .. يعني نطق اهو .. وياريته ما نطق .. سيل من الشتايم يا ولاد ويا ولاد ... ولما جه واحد طلعه برا الكافيه وقف برا وطبعا الكافيه ازازه شفاف وهات يا اشارات ليهم باديه.. وكلام من برة.. كل دا ليه؟ عشان مدلوش فلوس.. طب يا اخي كفاية انك عامل اخرس وبتستعبط.. لما محدش يديك تشتمه؟؟
وللحديث بقية ما دام في العمر بقية