رباعيات مسلسل


(( الوسية ))


بصوت
على الحجار

أشعار
الكاتب الكبير
سيد حجاب

ألحان وموسيقى
عمار الشريعى





1

ابكى يا ريح و نوحِى و طوحينا

غُربا فى بلدنا اتحكموا الغُرْب فينا

لحد أمتى يا دنيا هتسوحينا

وندارى روحنا الدفينة



2

اه يازمن معيوب يا ايام سفيهة

يا دنيا مقلوبة عاليها فى وطيها

بقى يسرقونا ويتهمونا احنا فيها

وغفيرها حرميها وكبيرها خاطيها

الاغراب بيكلوا لحمنا ويحرمونا

وبيشربوا من سيل عرقنا و دمنا

نهوِى بكرباج يهوِى بيه يقومونا

وازاى نقوم وهمومنا دى مكومانا



3

منتش وسية احنا زهرة شبابك

وكلنا سواسية بِندُق بابك

عاشقين ترابك .. كحلة العين هواكى

واحنا فداكى .. وبكرة هنعيد شبابك



4

والفرحة جاية يادوب بفتح رموشى

لقيتها رايحة وروحى رايحة وراها

يادنيا ليه لياليكى مبيرحموشى

ولا الشموس ولا فرحتى منوراها

5

الفرق بينا وبين ولاد المدينة

هما ولادها واحنا غُرب فى دروبها

الجوع قصادنا .. الخوف مكلبش ايدينا

والخوف يذل النفس و يزيد كُرُبْها

ياقوة الله حِلْى فى عروقى حِلْى

خلينى اتبت فيكى واثبت محلى

وحلى عنى يا رعشة الرعب حلى

لاجل انى اصد الجوع اذا جه وحلى


6

ورجعنا تانى نعانى نفس القسية

هياها مفرقتشى فى اى حاجة

وكأنى بهرب من وسية لوسية

بس الخواجة هنا مهواش خواجة

نفس الوسية فى كل حتى ورانا

مطرح مانهرب نلقى نفس العتامة

ممرمرانا فى رجلها مجرجرانا

كان ده المكتوب ليوم القيامة



7

يا فرحتى البكرية و مكنشى يومك

ليه موتى ليه بتفرفرى من بين ايديا

ورجعنا تانى يا دنيا نمضغ همومك

اه ياحنا يا مقاتيل و ملناش ديهة

الفقر كافر ايوه والظلم كافر

طاغوت وفارد عالبيوت طيرزانه

لحد امتى يا ليل هنفضل نعافر

والحق سافر بس مقطوع لسانه



8

وضحكتلى بعد القسا يا زمانى

قربتلى حلم الطفولة السعيدة

خطوة كمان وهنول ارق الامانى

عالية البعيدة خلاص خلاص مهياش بعيدة

روعة ..... شكرا على الموضوع الرائع كل الكلمات معبرة