تأليف:رضا الهجرسي
الجزء الثاني:حكايا خلع
الحكاية الثانية
أبو العربى ...النايب النزية
_____________________________
1
أحنا طبعا فى مدينة بورسعيد..وحكايتنا عن أشهر شخصية أسطورية
يعرفها كل بورسعيدى.. ..بل كل مصرى.. ..ودة بعد ما أتجوز من
أم العربى ..وخلف منها..أبنة البكرى و كان لازم يكون أسمة ..العربى
عشان أسم الشهرة ميتغيرش..ودة واد حرك وفهلوى وذكى ..وفى
السنة النهائية فى كلية الهندسة ..ودة مزعل أبو العربى ..كان عايزة
يشتغل معاة فى التجارة ويقف معاة فى المحل بتاعة ..لكن أم العربى
وقفت لة فى تعليم العيال ..أما بنتة رشا ..فدخلت معهد تجارى سنتين
وطارق الولد الشقى ..مبلط فى الثانوية العامة بقالة سنتين ..
أما أخر العنقود ..مرفت .وأسم الشهرة ..ميمي .. فى رابعة أبتدائى
دى بأة عيلة أبو العربى ..ونشوف حكايتهم أية ...مع الخلع..
أحنا دلوقتى الساعة ستة الصبح ....أم العربى فى المطبخ مع رشا بيجهزوا فطار العيلة ..وحطوا الأكل على السفرة ..خرج
أبو العربى من غرفتة ..وبص ع الأكل.. وصرخ مذعور...
- أية دة يا ولية ..أنتى أتجننتى ..فول وطعمية وبيض وجبنةوحلاوة
ودة أية دة كمان ..لانشون وجبنة رومى ..
- أيوة.. موال كل يوم ..أصطبح يا أبو العربى وقول يا صبح ..
- أصطبحنا وقلنا يا صبح ..يا أم العربى..بس مش كان كفاية الفول والطعمية ..
- أهم قدامك ..أشبع بيهم ..
تديلة ضهرها وتخش المطبخ ..تطلع البت ميمى من أودتها وهى
تدعك عينيها..
- أية يا أبو العربى ..فاتح جعورتك لية ع الصبح ..
- يا بت قولى.. يا بابا ..يا دادى ..ذى ولاد الذوات ..
- ماشى ..فاتح جعورتك ليةع الصبح ..يا دادى ..
- يرضيكى بذمتك البعزأة دي ..وبعدين فين يا بت حساب البضاعة اللى ختيها م المحل أمبارح..الكشاكيل والمساطر والبرايات.
- يا عم صبرك عليا ..خد..أتناشر جنية أهم ..والباقى حين ميسرة .
- وحياة أمك ..أنتى واخدة بضاعة بتلاتين جنية ..
- يا عم العيال كلها مأشفرة دى مدرسة حكومة..مش خاصة..اللى خدوا شكك ..واللى خدوا بالقسط ..واللى حين ميسرة..
- طب قفلى دلوقتى لحسن أمك جاية ..وتعمل لنا مصيبة لو عرفت
أنك بتاجرى معايا..
تبصلهم أم العربى فى أستغراب
- مالكوا حطين بزكوا ..فى بوز بعض كدة لية ..مش بعادة يعنى.
- أبدا يا ماما يا حبيبتى ..دة بابا زود لى المصروف تمنتاشر جنية
مش كدة ..يا دادى يا حبيبى ..
يبص لها أبو العربى بغيظ وهو يجز على أسنانة
- كدة ..يا ميمى يا حبيبتى ..كدة..
- زود لك المصروف ..لية هو فية واحد يهودى مات وأنا معرفش
يبوسها أبو العربى فى خدها بغيظ ويهمس فى ودانها
- طيب يا ميمى.. يا بنت الكلب .. الجيات أكتر ..
يخرج عربى من غرفتة حاملا كتبة ..ويتناول رغيف ويصنع
شندوتش ..ويأكلة بسرعة ..
- يا واد أأقعد أفطر براحتك ..
- معلش يا أم العربى .. عندى محاضرة مهمة وخايف اتأخر..
- طب خد السندوتشات دى معاك ..كمل فطارك ..
- ما هو فطر يا ستى ..لزمتها أية ..دة حتى الأكل الكتير ميخلهوش
يركز فى دروسة ..وبعدين فين يا واد أقساط زمايلك ..اللى خدوا
بيها هدوم من المحل على ضمانتك ..
- فلوسك جاهزة أهى ..أدى ..ميتين وستين جنية ..وأربعين جنية
عمولتى ..اللى متفقين عليها ..مظبوط كدة يا أبوالعربى ..
يخطف الفلوس كلها من يدة
- لية كدة بأة ..
- كدة بأة يبقى مظبوط ..أنت يا واد متعرفش الحديث الشريف اللى
بيقول ..أنت ومالك لأبيك ..ولا عايز تخالف شرع ربنا..
- أنت مش حافظ غير الحديث دة ..أنا ماشى ألحق محاضرتى..
يالا.. يا رشا أوصلك على معهدك ..قبل ما يفتكر حديث تانى
تصرخ أم العربى من داخل غرفة الأولاد
- قوم يا ولة غلبتنى ..يالا يا طاروقة ..عشان تروح مدرستك ..
وتوصل أختك ..ولا يعنى أنت مبتقومش الا ..بالمية ..
- لا ..المية لا ..أدينى قمت أهو..الفطار جاهز ..
يخرج طارق من الغرفة ويجلس ياكل بفجعة فيصرخ أبو العربى
- على مهلك يا ولة ..أنت بتاكل فى أخر زادك ..
- وأنت مالك يا عم ..مش أمى اللى جايبة الأكل دة من فلوسها ..
- لية والمصروف اللى بدهولها ..كل شهر .. يا روح أمك ..
تقدر تنكر أنت ولا هى ..
- مصروف أية يا راجل اللى بتدهولى كل أول شهر ..أنت فاكر
الكام ملطوش اللى بتحطهم ..يفتحوا بيت ..دة يا دوبك يكفوا
أكلك ..أنت وضيوفك ..أنا سيبالك المكان و ماشية ..
- روحى ..يا عايشة فى خيرى..وناكرة جميلى ..
تعود ..وهى تصرخ
- خير أية .. يا بو خير اللى بتتكلم عنة يا راجل أنت ..دة لغاية دلوقتى وبعد..خمسة وعشرين سنة جواز..مدفعتش مهرى..اللى أستلفتة من أخويا..أبراهيم..واللى النتن خصمة من ورث أبويا..
- يوووة ..كل يوم تسمعينى الموال اللى مبيخلصش دة ..مهر أية
يا ولية يا مجنونة اللى عايزاة ..بعد السنين دى كلها.. - ولو ..حييجى اليوم اللى حدفعك فية مهرى ..وبفوايدة كمان
- طب قفلي بأة ..وأنت يا طاروقة يا حبيبى ..عايزك تمر علية
فى المحل قبل ما تروح المدرسة ..فية دفعة ..جيل م اللى
بيحطوة العيال الروشين على شعرهم ..عشان يوقفة لفوق..
- لا يا عم ..أنا بعت لك كتير ..وكل مرة تاكل علية العمولة
بتاعتى ..وتفضل تقولى ..أنت ومالك لأبيك ..أنت ومالك
لأبيك ..دة أنا لية عندك دلوقتى ..ييجى تلتميت جنية وزيادة..
- يا واد ..أنا مش عايزكوا تخالفوا ..شرع ربنا..وتخشوا النار.
- مالكش دعوة أنت يا عم ..أنا عايز أخش النار ..
2
يدخل أبو العربى مكتب مأمور القسم ..يسحبة مخبر من يدة ويضعة
أمام مكتب المأمور ..الذى يحيط بة ..أكثر من تلاتين شاب..يبكون
ويضعون أيديهم على رؤؤسهم..الزلابطة..يعنى مفيهاش ولا شعرة
واحدة..ومعاهم أهلهم ..وعاملين هيصة وشبطة ..يصرخ المخبر..
- تمام يا فندم ..أبو العربى ..أبو المتهم ..طارق ..
- أهلا ..أهلا ..أشهر من النار ع العلم ..يا أبو العربي..
- فى أية ..سيادتك ..وطارق أبنى عمل أية ..
- منتش شايف ..بعينك ..كل الروس الزلابطة دى ..أبنك باع لهم
كريم ولا جيل ..حطوة على شعرهم ..بأوا زلابطة ذى ما أنت
شايف كدة ..
- وأعترف سيادتك ..جاب الكريم دة منين ..
- مصمم ..ميقولش ..الا لما ..يقابلك الأول ..
- طب الحمدللة ..أنا حشوف لسيادتك الموضوع دة ..ولازم يقر
بالحقيقة ..أنا طول عمرى ما خالفت القانون ..ومربى عيالى
على كدة ..خلينى أأقابلة ..وحخلية يقر بكل حاجة..
-هاتولة طارق ..
يدخل طارق..ويجرى على أبو العربي..ويحضنة..يسحبة أبو العربى على جنب ..عشان محدش يسمعهم ..
- راجل يا واد ..يا طارووقة ..أنك معترفتش على أبوك ..
- أنت بتقول أية يا أبو العربى..أعترف عليك..أنت أبويا يا جدع
أنا فداك يا أبو العربى ..فداك ..بس أنا خايف من حاجة ...
- خايف من أية يا حبيب أبوك أنت..
- خايف يعذبونى ..ويحطونى ع العروسة .ويجلدونى..ومستحملش
وأضعف... وأعترف على أبويا ..حبيبى ..اللى رباني وكبرني..
- أوعى ..أوعى يا حبيبى تضعف ..وأقوى كدة ..وخليك راجل..
- ما هوعشان معترفش ..محتاج حاجة تقوينى ..وتخلينى أستحمل .
التعذيب ..والأهوال ..
- قولى أية هية ..وأنا أروح أجيبهالك ..من الأجزاخانة ..حالا وعلى حسابى ..قولى يا حبيبى ع اللى يقويك..
- الأرجان ..الفلوس ..عمولتى اللى عندك ...حقى ولا مش حقى
- حقك يا حبيبى حقك ..أول ما نروح البيت ..حدهملك ..
- دلوقتى ..وألا ..هضعف وهعترف ..أنا لية عندك ..تلتميت جنية
وعمولة عملية الجيل ..تمانين جنية ..يبقوا ..ربعميت جنية
- طب وعملية الجيل لية .دى متمتش ..
- أنا عملت اللى علية وبعتهم ..يبقى أخد حقى ..حقى ولا مش حقى
- حقك ..حقك..
- أيدك على ربعميت جنية ..قبل ما أنهار م التعذيب ..وأعترف ..
يضع أبو العربى يدة فى جيبة مترددا ..وفجأة يدخل رجل ..
يقف لة المأمور مرحبا ..فيعيد أبو العربى النقود لجيبة ..
ويجرى علية ..مرحبا ..
- أهلا بنايبنا ....ومراعى مصالحنا..
- أهلا يا أبو العربى ..بتعمل أية هنا ..عند سيادة المأمور ..
- أبنى يا سيادة النايب ..حيضيع مستقبلة ..
- طب أهدى كدة ..وبطل عياط ..وفهمنى أية الموضوع..
أنا منساش وقفتك معايا فى الأنتخابات ..ومحتاجك فى اللى جاية ومهما كان اللى عملة أبنك ..حنخرجه منها أن شاءاللة..بس بالقانون ..أحنا ناس بتوع قانون..وكلة يتحل... بالقانون..ولا أية يا سيادة المأمور ..
- كدة يا سيادتك ..وحنلها وحالا ..وبالقانون..
يلطم طارق على خدودة..
- بدال أتحلت ..وبالقانون ..يبقى أنا أتسوحت ..وبالقانون..
3
يجلس أبو العربى على سريرة وهو يفكر فى اللى حصل فى القسم
- بأة النايب.حاجة مهمة قوي كدة..دة خلص الموضوع مع المأمور
والعيال وأهلهم..وخلاهم يتنازلوا عن المحاضر..بكلمتين منة ..
اللة ما أنت يا واد يا أبو العربى اللى بتنجحة فى الأنتخابات ..
وأهل بورسعيد كلهم .. بيمشوا وراك ..لما يلاقوك واقف جنبة
اللة مانا أولى ..يعنى أنا لو رشحت نفسى ..أكيد حكتسحة ..
دة أنا أشهر واحد فيكى ..يا بورسعيد ..وشوف بأة ..لما تخش
ع المأمور ..ويقف لك زنهار ..و
يقطع أفكارة دخول العربى ..
- جيت فى وقتك يا عربى ..أنت واد متعلم ..ومخك مفتح ..وعايز
أخد رأيك فى موضوع شغلنى ..
- الأول أنا عايزك ..تفوتلى ..قرشين من فلوسى عندك ..لحسن
محتاج أشترى كتب للمشروع بتاعى فى الكلية ..
- فلوس أية يا واد اللى ليك عندى..أنت نسيت الحديث الشريف..
اللي بيقول..
- عارفة.. وصمة ..أنت ومالك لأبيك ..بس مزنوق عشان المشروع ..دة البكالوريس ..ولا عايز أبنك يسقط ...
- ما تروح لأمك ..ما فلوس الورث بتاع أبوها ..حطاة على قلبها
وصرة ..سيبك م الكلام الفارغ دة ..وأسمعنى ..أية رأيك ..
يا واد ..لو أبوك ..رشح نفسة ..فى مجلس الشعب ..وبأة نايب.
- يا خبر أسود ..
- أسود عليك وعلى اللى خلفتك فى يوم واحد ..هو النايب بتاعنا
أحسن منى ..ولا أشهر منى ..دة ما فى حد فيكى يا بورسعيد
ميعرفش أبو العربى ..وجدعنة أبو العربى ..ونزاهه أبو العربى
- أنا فى حتة النزاهة دى..أبصملك بالعشرة..
- يبقى أرشح نفسى ..ولا ..لأ ..
- ترشح نفسك طبعا ..وأنا وكل صحابى فى الجامعة حيدولك
صوتهم..و التجار زمايلك ..يعنى ناجح ..ناجح ..بس لازم
تلحق تسحب أستمارة ترشيح ..لحسن النهاردة أخر يوم..
ينط من على سريرة ..ويرتدى ملابسة بسرعة ويخرج
مسرعا ..ينادى عربى على أمة وأخوتة..تسألة ميمي..
- مالة دادى يا عربى ..مش بعادتة ..يفوت الفطار ..
- أفرحى يا ميمى ..حتبقى بنت سيادة النايب ..وأنتى يا رشا
حتتفشرخى على صحابك فى المعهد ..وأنتى يا أم العربى
حتبقى مرات النايب النزية ..فين طاروقة كمان .عشان
يفرح معانا ..
- نايب أية يا واد ..يخى نايبة ..أما تشيلة ..وتريحنا منة ومن
بخلة ..ونتانتة..
- أأقعدوا كدة..وفتحوا مخوكوا معايا ..دى فرصة مش حتتعوض
وكل اللى لة حق عند أبو العربى حياخدة ..وبكامل رضاة..
- يعنى أية يا واد ..يعنى أنا ممكن أخد مهرى ..لما يكون نايب
- أنتى حتاخدى ..مهرك.. يا أم العربى ..قبل ما يكون نايب..
لأن الناس مستحيل تنتخبة ..هما يضحكوا على فشرة ..ومزعة
أنما ينتخبوة ..دة فى أحلامة بس..
- فهمنى يا واد أزاى ..
- أحنا حنشجعة ..ونفهمة أن أحنا واقفين جانبة ..وأنة حيكتسح ..
ونسيبة يطلع اللى تحت البلاطة ..عشان الدعاية الأنتخابية
والذى منة ..وهوب ..نهددة ..بفضيحة ..لو مرجعش لكل
واحد مننا ..حقة ..وأنتى يا أم العربى ..حيدفعلك مهرك
بالفوايد كمان..بس أية هية الفضيحة ..فكروا معايا..
ما تقولى حاجة يا أروبة أنتى ..
تحط البت ميمى صباعها على رأسها
- أية هية الفضيحة ..يا بت يا ميمى ..يا أروبة ..أية هية الفضيحة
أة ..مفيش غيرة ..
يصرخ الجميع
- أية هوة..
- الخلع..
- الخلع..
- أنا لسة شايفة فيلم فى التلفزيون ..واحدة حبت تفضح جوزها
قامت رفعت علية ..قضية خلع..
يقبلها عربى فرحا
- يسلم دماغك الذرى دة يا ..أروبة..هو الخلع مفيش غيرة..
أحنا حنسيبة ..يعمل دعايتة ..ونفهمة أن أحنا معاة..وأنتى
يا أم العربى..قومى ألبسى..حنوصل ناخد فى سكتنا محامى
صاحبى ..ونرفع قضية الخلع ..ونستلم أحنا الأعلان فى
الخباثة ..وقبل يوم التصويت ..نقلبة ونسلخة ذى ..ما أحنا
عايزين..يا كدة ..يا نفضحة فى كل بورسعيد ..
- طب يالا ..يا واد مستنى أية ..أموت وأخد مهرى منة ..وأنتى
يا بت يا رشا ..أبقى فهمى الواد طارق ع الفولة كلها ..
_________________________________________
4
قاعد أبو العربى فى الصالون ..وهوة بيعيط بحرقة ..والدموع نازلة
تسح من عينة ذى المطر .. ومن حولة أولادة ..وأم العربى ..
تزغر لة ..بشماتة ..وغيظ..
- أيوة ..أتشحفت ..ونهنة ..حركاتك دى..مبقتش أكل منها..أوعوا
يا ولاد ..تاكلوا م الكلام دة ..وقلبكوا يحن.. ..من حركاتة دى ..
- كدة يا أم عيالى ..وعشرة عمرى ..هان عليكى .أبو العربى ..
..الحب كلة ..العمر كلة..
- والنبى لما تعمل اللالى ..حتدفع مهرى وشبكتى ..دلوقتى ..
والا حفضحك وجرسك فى بورسعيد كلها ..وبأة شوف مين
اللى حينتخب واحد هزأ زيك ..مراتة ..خلعاة..
- وأنتوا يا ولاد عمرى ..وفلذات أكبادى ..هان عليكوا أبوكوا
- ما أنت يا با.. وكالنا ..فى الطلعة والنازلة ..وقاعد تدعيلنا
الفقر ..ودلوقتى ..بتصرف بالألوفات ..ع الدعاية ..وشوية
المقاطيع الى أتلموا عليك ..وكبروها فى دماغك ..وأحنا
واكل حقنا وفلوسنا ..
- فلوس أية اللى بتتكلم عليها ..يا طاروقة يا حبيبى ..هو فية
بين الأب وولادة فلوس ..أنت متعرفش الحديث اللى بيقول..
الجميع يرددوا معا
- أنت ومالك لأبيك ..
- كدة.. يعنى مفيش فايدة ..طب طلباتكوا أية..
- مهرى وشبكتى ..عشر تلاف جنية ..غير فوايدهم خمسة
وعشرين سنة ..يطلعوا كام دول يا واد يا عربى ..
- يطلعوا ييجى ..ميت ألف جنية ..
- ميت ألف تعبان ..لما يلوشك أنت وأمك ..
- واللة ..بين البايع والشارى يفتح اللة ..يالا يا ولاد ..ننزل للناخبين
بتوعة ..نوريهم ..ورقة الخلع ..
- ما تصبرى يا ستي ..ماشى.. موافق ..ربنا ع المفتري ..
- وترجع للعيال فلوسهم بالمليم ..اللى تعبوا وشقيوا بيها ..
- موافق ..خلاص أنزل ..بأة للناخبين بتوعى ..وتيجوا معايا
عشان يعرفوا ..أنكوا مأيدنى ..ووقفين جانبى ..
- وحياة أمك ..أنت الأول تطلع ع البنك ..تحط الميت ألف ومعاك
الواد العربى ..رجلة على رجلك..تسلمة ورقة البنك ..أحنا معاك
أة ..ما هو العيال مفطمنى على كل حاجة..تدفع ..حتبقى ..
النايب النزية ..متدفعش ..حتبقى ..المجرس المخلوع..
5
يجلس أبو العربى فى الصالون وهو يبكى وينهنة بحرقة شديدة
ومن حولة ..أولادة يواسونة وهم يكتمون ضحكاتهم ..
- أنا أبو العربى ..أسقط السقوط المتنيل دة ..الأنتخابات دى أكيد
مزورة الحزب هو اللى سقطنى.عشان مدخلش المجلس وأكشفهم
- ياابا حزب أية ..اللى حيبصلك ..دة أنت ساقط بأكتساح ..
- لية يا ولة ..هو أنا خدت ..كام صوت ..
- صوت واحد ..
ترد أم العربى
- دة أكيد صوتى ..مهنتش علية ..ولا هانت علية العشرة..
- وصوتكوا أنتوا.. يا ولاد الكلب.. فين ..
يرد العربي بأستغراب
-أنا مطلعتش بطاقة ..لأنى مش مؤمن أن فية أنتخابات نزيهة فى
البلد دى..وطارق باع صوتة ..بميت جنية..اللغز اللى محيرنى
فين صوتك أنت..
ترد ميمى
- باعة ..للمرشح اللى قدامة ...بميت جنية ..
( النهاية )