ليه مش هننزل يوم 27 مايو؟ بتفصيل الممل قوى بقى
1- لأن الأصوات العالية التي ظهرت في الإعلام تروج ان اليوم اسمه ثورة غضب ثانية! ثورة ضد مييين؟ ضد الجيش ! الجيش اللي حمى الثورة من اول يوم واجبر مبارك على التنحي عاملين ثورة عشان نشيله وتبقى البلد هيصة اكتر ما هي هيصة .
...2- لأن الأصوات العالية التي ظهرت في الإعلام بتقول ان شعار الثورة التانية دي هو ( دستور جديد ) قبل الإنتخابات
مع ان الشعب بالفعل صوت ان الدستور تعمله لجنة منتخبة يختارها اعضاء مجلس الشعب المنتخبين – لييييه؟ عشان ميجيش واحد يفرض علينا دستور وهوية علمانية واحنا هوية بلدنا اسلامية . لكن البرادعي بيه والقوى الوطنية ال بيقول عليهم مش بيحترموا الديمقراطية ولا نتيجة الاستفتاء وعاوزين يمشونا على مزاجهم ويلبسوا الشعب دستور تفصيل .
3- لأن الأصوات العالية اللي ظهرت في الإعلام وبتقول عن نفسها قوى الثورة اعلنت ان المظاهرة بتاعة يوم 27 مايو دي معمولة عشان نعمل مجلس رئاسي معين ونشيل الجيش !!! مجلس رئاسي معين لييييه؟ عشان البرادعي والناس اللي ملهاش شعبية تلحق تحكملها كام يوم قبل الديمقراطية لأن لو فيه ديمقرطاية مش هيشوفوا الكرسي – يعني مصالح وكله بيغني على ليلاه---- طيب ومين هما القوى الثورية اللي قالوا مجلس رئاسي دول؟؟
شباب الثورة بالمحافظات، الجبهة الشعبية الثورية، حركة 6 أبريل، تكتل محافظات الجمهورية لدعم الثورة، شباب الجمعية الوطنية للتغيير، اتحاد شباب الثورة، شباب حملة البرادعي، اتحاد المناطق الشعبية، اتحاد الطلاب الديمقراطي، اللجان الشعبية بالمحافظات، ائتلاف ضباط لكن شرفاء، حركة الائتلاف المصري، مجلس أمناء الثورة بالإسكندرية، حركه ثوار ماسبيرو، الكتلة الليبرالية، اللجنة الشعبية للدستور المصري
4- شادي الغزالي حرب احد اعضاء ائتلاف شباب الثورة ظهر مع منى الشازلي يوم الأحد وقال مطالب يوم 27 مايو هي دستور جديد ومجلس رئاسي !!
ممكن حد يقول شادي بيمثل نفسه والائتلاف ماقالش في مطالبه مجلس رئاسي ودستور !!! لكن هارجعك للتاريخ – فاكرين قبل الاستفتاء ؟ ائتلاف شباب الثورة كان من بين الداعين لرفض التعديلات بل والمطالبة بمجلس رئاسي ودستور جديد اولا ---
طيب والكلام ده معناه ايه؟ معناه انهم بيلعبوا بينا وفاكرين الشعب داقق عصافير وهيصدق اللف والدوران – كل القوى اللي وريتهالك دي عاوزة مجلس رئاسي ودستور جديد – وعلى فكرة دي نفس القوى اللي قالت لا في الاستفتاء وكانت دي طلباتهم برضو !
5- عاوز تتاكد اكتر – دول حتى عملوا صفحة على فيس بوك وسموها "ثورة الغضب الثانية" وهدفها الأساسي مجلس رئاسي
6- لسه برضو شاكك مش كده ؟
طيب شوف مين كمان بيطالب بمجلس رئاسي ونازل عشانه – ائتلاف شباب ماسبيرو ( الأقباط) اللي اعتصموا ف الشارع وشتموا الجيش وشتموا علماء الإسلام وقالوا عاوزين حماية دولية – مش مصدق – شوف بنفسك الفيديو :
طيب نعمل ايه – مش ممكن اروح عشان المطالب المشروعة التانية اللي مرفوعة واللي كلنا عاوزينها – زي تطهير الإعلام ومحاكمة الفاسدين بسرعة وعدم محاكمة المدنيين عسكريا والانتهاكات وشيل الطود الراسخ ( يحيي الجمل ) الخ ...
الاجابة: لو رحت حيحصل الاتي
اولا- هيستغل وجودك ويسوق اعلاميا على ان ثورة الغضب الثانية ناجحة وتضغط لمجلس رئاسي حتى لو سعادتك مطالبتش بكده !! شغل اعلام واحنا عارفينه.
ثانيا – كان نفسنا كلنا نروح ونعمل مليونية للضغط لتنفيذ مطالب متوافق عليها من كل الشعب لكن المعلن والغالب ان المطلب الرئيسي هو مجلس رئاسي ودستور قبل الانتخابات !! يعني هيستغلوك عشان يلوا دراع الشعب والجيش . كل القوى اللي وريتهالك دي قالت كده – ومفيش حملة تكذيب واحدة طلعت تقول للناس انزلوا مفيش حاجة اسمها مجلس رئاسي ودستور الاول !!
ثالثا – عدم التوافق ده معناه ان حتى لو بعض الثوار راحوا وماكنش من مطالبهم مجلس رئاسي واخرين بيطالبوا بيه – ممكن يتخانقوا تلقائيا وندور نضرب ف بعض ونشمت فينا مبارك .
رابعا – ليه تشارك في حاجة مش واضحة من اساسه – الجيش كده كده ماشي بعد الانتخابات واللي مقدرناش نعمله دلوقتي نعمله بحكومتنا اللي انتخبناها ! وبقليل من يمكن تنفيذ باقي المطالب المشروعة المتوافق عليها – لكن نشيل الجيش وتصبح البلد هيصة ونرجع نبقى زي اليمن ولبيبيا يبقى ده اسمه بالفلاحي ( بطر )