جيفارا مات
********
جيفارا مات
جيفارا مات
آخر خبر فِ الراديوهات
و فِ الكنايس
و الجوامع
و فِ الحواري
و الشوارع
و عَ القهاوي و َ البارات
جيفارا مات
جيفارا مات
و اتمد حبل الداردشة و التعليقات
مات المناضل المثال
يا ميت خسارة عَ الرجال
مات الجدع فوق مدفعه جوّه الغابات
جسّد نضاله بمصرعه
و من سُكات
لا طبالين يفرقعوا
و لا اعلانات
ما رأيكم دام عزكم
يا انتيكات
يا غرقانين
فِ المأكولات و الملبوسات
يا دفيانين
و مولعين الدفايات
يا محفلطين (1)
يا ملمّعين يا جيمسنات
يا بتوع نضال آخر زمن
ف العوامات
ما رأيكم دام عزّكم
جيفارا مات
لا طنطنة
و لا شنشنة
و لا إعلامات و استعلامات
عيني عليه ساعة القضا
من غير رفاقه تودّعه
يطلع أنينه للفضا
يزعق و لا مين يسمعه
يمكن صرخ من الألم
من لسعة النار فِ الحشا
يمكن ضحك
أو ابتسم
أو ارتعش
أو انتشى
يمكن لفظ آخر نفس كلمة وداع
لَجل الجياع (2)
يمكن وصية للي حاضنين القضية
بالصراع
صور كتير ملو الخيال
و ألف مليون إحتمال
لكن أكيد و لا جدال
جيفارا مات موتة رجال
يا شغالين و محرومين
يا مسلسلين (3)
رجلين و راس
خلاص خلاص
مالكوش خلاص
غير البنادق و الرصاص
دا منطق العصر سعيد
عصر الزنوج و الامريكان
الكلمة للنار و الحديد
و العدل أخرس أو جبان
صرخة جيفارا يا عبيد
في أي موطن أو مكان
ما فيش بديل
ما فبش مناص
يا تجهّزو جيش الخلاص
يا تقولو عَ العالم
خلاص
ــــــــــــــــــــــــــــــــــــــــــــــــــ ـــــــــــــــــــــــ
يعيش اهل بلدى
********
يعيش أهل بلدي
و بينهم مافيش
تعارف يخلي التحالف يعيــش
تعيش كل طايفـــة
من الثانية خايفـة
و تنزل ستاير بداير و شيـــش
لكن ف الموالــد
ياشعبي يا خالــد
بنتلم صحبـــةو نهتف يعيــــــش
يعيش أهل بلـــدي
يعيش المثقف على مقهى ريش
يعيش يعيـــش
محفلط مزفلط كثير الكـــلام
عديم الممارســة
عدو الزحـــام
بكام كلمة فاضيـــة
و كام اصطــــلاح
يفبرك حلول المشاكل قـــوام
يعيش المثقف يعيش يعيش يعيش
يعيش التنابلة ف حي الزمالك
و حي الزمالـــك
مسالك مسالـــك
تحاول تفكــــر
تهوب هنالـــك
تودر حياتــــك
بلاش المهالــك
لذلك إذا عزت توصف حياتهم
تقول الحياة عندنا مش كذلك
مش ممكن تشوفهـــــــــــــــم
ف وسط المدينــــــــــــــــــة
اذا مر جنبك اوتومبيل سفينة
قفاهم عجينــــة
كروشهم سمينــة
جلودهم بتضـــوي
دماغهم تخينـة
سنانهم مبــارد
تفوت ف الجليــد
مفيش سخن بـــارد
بياكلوا الحديـــد
مدام نهر وارد
و جي م الصعيد
تزيد الموارد
كروشهم تزيد
و تسمع و تسلم
بان التنابلة أو الأكالين
حيسمح كبيرهم
و يعمل مقابلة مع الفلاحين
و يحصل تحالف مابين الجميع
و نملا المصارف
بدم القطيع
أطيع الخليفة
أطيع والديك
أطيع التنابلة
دا مفروض عليك
و تزرع و تبعت لحي الزمالك
و حي الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك اذا حد جاب لك سيرتهم
تبسمل تكبر
و تهتف كذلك
يعيش التنابلة
يعش يعيش يعش
يعيش أهل بلدي
يعيش الغلابة في طي النجوع
نهارهم سحابة
و ليلهم دموع
سواعد هزيلة
لكن فيها حيلة
تبدر تخدر جفاف الربوع
مكن شغل كايرو
ما يتبعش دايروه
لا ياكل و لا حتى يقدر يجوع
يا غلبان بلدنا
يا فلاح يا صاتع
يا شحم السواقي يا فحم المصانع
يا منتج يامبهج يا آخر حلاوة
يا هادي يا راخي ياعاقل ياقانع
ما تتعبش نفسك
ف شغل السياسة
و شوف انتشغلك
بهمة و حماسة
و عود عيالك فضيلة الرضا
لأن احنا طبعا عبيد القضا
و رزقك ورزقي و رزق الكلاب
دا موضوع مؤجل ليوم الحساب
كمان الصحافة حتكتب ف حالتك
و تنشر مناظر لخالك و خالتك
و تطلع يا مسعد عليك الغناوي
و تسمع باسمك ف قلب القهاوي
تحبك مشيرة و بنات الجزيرة
و قصة غرامك تشيع ف الرداوي
يعيش عم مسعد
يعيش يعيش يعيش
يعيش أهل بلدي
ــــــــــــــــــــــــــــــــــــــــــــــــــ ـــــــــــــــــــــــ
الجدع جدع
********
و الجبان جبان
بينا يا جدع
ننزل الميدان
و الميدان بعيد
عن جوف المدينة
يا تار الشهيد
ف الكنال و سينا
بحري و الصعيد
احنا أهله ادينا
أصلب م الحديد
ف الشدة تلاقينا
بالنار و السلاح
نرفع الكفاح
فوق كل العواصف
و هبوب الرياح
يسبق الليالي
و يجيب الصباح
يهزم الهزيمة
و يداوي الجراح
عايزين الصباح ؟
قدامكو الميدان
و الجدع جدع
و الجبان جبان
ــــــــــــــــــــــــــــــــــــــــــــــــــ ـــــــــــــــــــــــ
انا رحت القلعة
********
انا رحت القلعة و شفت ياسين
حواليه العسكر و الزنازين
و الشوم و البوم
و كلاب الروم
يا خسارة يا أزهار البساتين
عيطي يا بهية على القوانين
انا شفت شباب الجامعة الزين
احمد و بهاء ، و الكردي و زين
حارمينهم حتى الشوف بالعين
و ف عز الضهر مغميين
عيطي يا بهية على القوانين
و قابلت سهام ، في كلام إنسان
منقوش و مأثـّـر في الجدران
عن مصر و عن عمال حلوان
مظاليم العهد المعتقلين
عيطي يا بهية على القوانين
و قابلت هناك ، منذر و زياد
و قابلت كمان عزت و جواد
أربع أبطال ، شنقوا الجلاد
"التل" يهوذا الفدائيين
زغرطي يا بلدنا لدول مساجين
و اسمعي يا بلدنا خلاصة القول
و بقولك أهه و أنا قد القول
مش ممكن كده حيحول الحول
على كده و الناس يفضلوا ساكتين
خليكوا فاكرين
خليكوا شاهدين
انا رحت القلعة و شفت ياسين
ــــــــــــــــــــــــــــــــــــــــــــــــــ ـــــــــــــــــــــــ
حاحا
********
بقرة حاحا
ناح النواح و النواحة
على بقرة حاحا النطاحة
و البقرة حلوب
حاحا
تحلب قنطار
حاحا
لكن مسلوب
حاحا
من أهل الدار
حاحا
و الدار بصحاب
حاحا
و احداشرباب
حاحا
غير السراديب
حاحا
و جحور الديب
حاحا
و بيبان الدار
حاحا
واقفين زنهار
حاحا
و يوم معلوم
حاحا
عملوها الروم
حاحا
زقوا الترباس
حاحا
هربوا الحراس
حاحا
دخلوا الخوجات
حاحا
شفطوا اللبنات
حاحا
و البقرة تنادي
حاحا
و تقول يا ولادي
حاحا
و ولاد الشوم
حاحا
رايحين ف النوم
حاحا
البقرة انقهرت
حاحا
ف القهر انصهرت
حاحا
وقعت ف البير
حاحا
سألوا النواطير
حاحا
طب وقعت ليه
حاحا
وقعت م الخوف
حاحا
و الخوف ييجي ليه
حاحا
من عدم الشوف
حاحا
وقعت م الجوع
و من الراحة
البقرة السمرة النطاحة
ناحت مواويل النواحة
على حاحا
و على بقرة حاحا
ــــــــــــــــــــــــــــــــــــــــــــــــــ ـــــــــــــــــــــــ
رجعوا التلاميذ
********
رجعوا التلامذة
يا عم حمزه
للجد تاني
يا مصر إنتي اللي باقية وانتي
قطف الأماني
لا كوره نفعت
ولا أونطه
ولا المناقشة وجدل بيزنطة
ولا الصحافة
والصحفجيه
شاغلين شبابنا
عن القضية
قيمولنا صهبه
يا صهبجية
ودوقونا طعم الأغاني
رجعوا التلامذه
للجد تاني
طلعوا التلامذه
ورد الجناين
إسمع يا ميلص
وشوف وعاين
ملعون أبوك ابن كلب خاين
يا صوت أميركا
يا أمريكاني
ــــــــــــــــــــــــــــــــــــــــــــــــــ ـــــــــــــــــــــــ
صباح الورد (( الورد الى فتح فى جناين مصر ))
***********************
صباح الخير علي الورد اللي فتح في جناين مصر
صباح العندليب يشدي بألحان السبوع يا مصر
صباح الدايه واللفه..... ورش الملح في الزفه
صباح يطلع بأعلامنا من القلعه لباب النصر
سلامتك يامه يا مهره يا حباله
يا ولاده
يا ست الكل يا طاهره
سلامتك من آلام الحيض
من الحرمان
من القهره
سلامة نهدك المرضع
سلامة بطنك الخضرا
هناكي وفرحة الوالدة
تضمي الولد يا والده
يصونهم لك ويحميهم
يكترهم...... يخليهم
يجمع شملهم بيكي
يتمم فرحتك بيهم
صباح الخير علي ولادك
صباح الياسمين والفل
تعيشي ويفنوا حسادك
ويسقوهم كاسات الذل
وبلغ يا سمير غطاس
يا ضيف المعتقل سنوي
بصوتك دا اللي كله نحاس
صباح الخير على الثانوي
وأهلا بيكو في القلعه
وباللي في الطريق جايين
ما دامت مصر ولاده
وفيها الطلق والعاده
حتفضل شمسها طالعه
برغم القلعه والزنازين
ــــــــــــــــــــــــــــــــــــــــــــــــــ ــــــــــــــــــــــ
كل ما تهل البشاير
********
كل ما تهل البشاير من يناير كل عام
يدخل النور الزنازن يطرد الخوف والضلام
كل ما تهل اشاير من يناير كل عام
يدخل النور الزنازن يطرد الخوف والضلام
يا نسيم السجن ميل عالعتب وارمى السلام
زهر النوار وعشش فى الزنازن الحمام
من سكون السجن صوتى نبض قلبى من تابوتى
بعيونك يا حبيبتى كلمتى فى بطن حوتى
سلميلى عالحبايب يا حبيبتى سلميلى
كل حب وله نصيبه من سلامى بلغينى
احضنى العالم عشانى بين عيونك وبعتينى
نظره منها اشوف حبايبى تشفى قلبى واسالينى
كل عالم فى بلدنا
كل برج وكل مدنا
حد فيه لو شاف علامه من علامات القيامه
قبل ما تهل البشاير يوم 25 يناير
قبل ما تهل البشاير يوم 25 يناير
لما قامت مصر قومه بعد ما كانت فى نومه
يلعن الغربه والمزله والمظالم والحكومه
سلميلى عالولاد السمر خضر العمر
سلميلى عالبلد المخطوبين فى المهد لسرير الجوارى
واسألينى بالعتاب كل ال فى الكتاب
حد فيهم كان يصدق بعد جهل وبعد موت
ان حس الشعب يسبق اى فكر واى صوت
هى دى مصر العظيمه يا حبيبتى يا مصر
اللى فضلتى بهواك عشيناه على الف وسر
هى دى يا حبيبتى مصر
هى دى يا حبيبتى مصر
ــــــــــــــــــــــــــــــــــــــــــــــــــ ـــــــــــــــــــــــ
واة يا عبد الودود
********
واه يا عبد الودود
يا للي رابض عالحدود
و محافظ عالنظام
كيفك يا واد صحيح
عسى الله تكون مليح
وراقب للأمام
أمك عتدعي ليك
وعتسلم عليك
وتقول بعد السلام
خليك ددع لابوك
لا يقولوا منين دابوك
ويمصِّخوا الكلام
واه يا عبد الودود
عقلك وانته خابر
كل القضيَّة عاد
ولسّه دم خيّك
ما شِرباش التراب
حسّك عينك تزحزح
يدك عن الزناد
خليك يا عبده راصد
لساعة الحساب
آن الأوان يا ولدي
ما عاد الاّ المعاد ..
تنفضّ الشركة واصل
وينزاحوا الكلاب
إن كنت ودّ أبوك..
تديب لي ثار أخوك
والأهل يبلّغوك
دميعاً السلام
واه يا عبد الودود
عقلك وانته خابر
كل القضيَّة عاد
ولسّه دم خيّك
ما شِرباش التراب
حسّك عينك تزحزح
يدك عن الزناد
خليك يا عبده راصد
لساعة الحساب
آن الأوان يا ولدي
ما عاد الاّ المعاد ..
تنفضّ الشركة واصل
وينزاحوا الكلاب
إن كنت ودّ أبوك..
تديب لي ثار أخوك
والأهل يبلّغوك
دميعاً السلام
واه يا عبد الودود
كيفك وكيف زمايلك ؟
عسى الله طيبين ..
خالك زناتي جايلك..
ضمن المطّوعين ..
واختك تطلع يوماتي
عالمِستِشْفى القديمة
حاكم عيمرنوها ..
في العَرْكَة تكون حكيمة
ومحمّدين موافي
يتعلم المطافي
ويقولّك شِد عزمك..
ويقلك العوافي
ومنِهْنا القرايب
والعيلة والعيال
عيبلغوك سلامهم
ولتمّة الرِّجال
وآخر الكلام ..
نقولك في الختام
الله يصون بلدنا
ويحرس السلام
والدك / حسن محارب
(غفير برج الحمام
ــــــــــــــــــــــــــــــــــــــــــــــــــ ـــــــــــــــــــــــ
ديستان
********
والست بتاعه كمان
حيجيب الديب من ديله
ويشبع كل جعان
يا سلاملم يا جدعان
ع الناس الجنتلمان
داحنا حنتمنجه واصل
وحتبقى العيشه جنان
التليفزيون حيلون
والجمعيات تتكون
والعربيات حتمون
بدل البنزين
بارفان
وحتحصل نهضه عظيمه
وحتبقى علينا القيمه
في المرسح او في السينما
او ف جنينة الحيوان
وحتبقى الاشيا زلابيه
ولاحوجه لسوريا وليبيا
وحنعمل وحده أرابيا
مع لندن والفاتيكان
والفقرا حياكلوا بطاطا
وحيمشوا بكل ألاطه
وبدال مايسموا شلاطه
حيسموا عيالهم
جان
ودا بفضل صديكي
ديستان الرومانتيكي
ولا حدش فيكو شريكي
في المسكن
والسكان