نهارطويل او يوم قصير لحد ماييجي وقت الغروب
********
وفيه مننا طول النهار عامل جرايم وفيه مننا تايه ونايم
واللي في اللذة والشهوة عايم وفيه اللي صلى وفيه اللي صايم
لحد ماتيجي لحظة غروب
********
وعند الغروب ازاي نتوب ازاي وفينا اللي نهب
واللي سرق واللي ياما ينشل جيوب
طول النهار عمال بيعصي وعند الغروب يقول هاتوب ازاي يتوب
*******
ازاي وفينا اللي جرح وبوظ فرح وزرع الأسى جوه القلوب
طول النهار دي متعته وفرحته في فرجته على ناس بتحرق نفسها
زي الشموع لما تدوب ويدوب يدوب دلوقتي بس جاي يقول عاوز اتوب
**********
اللي يتوب لازم يكون وسط النهار . او اوله او قبل ماتغيب شمسنا
ولو بساعة اونص ساعة نزيح من على نفسنا كل العيوب المهم نكون نضاف وقت الغروب
*********
اما انا طول النهار كنت تايه ماكنتش حاسس ان شمسي خلاص راح تختفي راح تغيب
وان الشيطان اللي كان عامل حبيب عند الغروب لو جيت أقوله هاتلي ايدك مدها هايقولي سيب أما صحيح انسان عجيب .
وهايقولي باردوا في اللحظه دية أي واسطة مش هاتنفع وتمن
ذنوبك لازم هاتدفع
وعمرك راخر مش هايطول لو كان هناك مليون طبيب .
واني خلاص زي ماكنت عايش غريب هاروح غريب
*********
مش كنت لازم اعمل حسابي اني في يوم هاقرا كتابي
اني في يوم رجلي وايدي هاتشهد عليا
وكمان عينيا هاتعترف بكل الذنوب
اني هاقول لربنا رجعني تاني انا يارب في رحمتك دايما اناني
رجعني تاني وعهد عليا اني هاتوب
ماعدشي ينفع اما انتي وانت ياللي شمسكوا لسه زاهيه منوره
آدي قصتي قدامكوا واضحه مصورة
لازم تتوبي ولازم تتوب في أي وقت او اي ساعة في أي لحظة المهم ماتكونشي لحظة غروب
منقول