نكشف لكم وحصريا فى كورة مصرية
تفاصيل اللقاء والحديث الذى دار بين :
لاعب الاهلى محمد ابو تريكه
ولاعب تشلسي فرناندو توريس
يامحاسن الصدف
توريس قال انزل مصر اشملى هوا يومين كده وبعدين اشد على انجلترا تانى
وقبل ماتوريس يسافر بساعات ويرجع لانجلترا افتكر ان الواد دروجبا كان طالب منه حاجه يجبهاله ضرورى من مصر ..( توريس قال بينه وبين نفسه انفضله وبعدين رجع قلك لا ياعم ده افريقى وممكن يعورنى )
هو كان عايز ايه كان عايز ايه ... اه افتكرت كان عايز تيشرت ابو تريكه طيب اجيبه من فين ده ياربى بس؟؟؟
المهم توريس راح واقف وسأل واحد فى الشارع على توكيل اديداس عشان يجيب التيشرت وقال للاخ ده:
Where is adidas store plz?
قام الراجل رد عليه وقله بكل تلقائية: ياعم انا مش من شرم
توريس رجع قله تانى: ؟؟adidas store
الراجل قله تانى : ياعم انا مش من شرم ومجازين امك متجننيش
ففهم الحاج توريس ان الاخ ده ملوش فيها وبالصدفه واحد معدى بيفهم انجليش قله بالصلاة عالنبى ياتوريس انته تطلع على سيتى ستارز وهتلاقى توكيل اديداس هناك
المهم توريس ركب تاكسى ووصل فعلا..
فى نفس ذات الوقت كان ابو تريكه خارج من النادى الاهلى فى مدينة نصر فقال اعدى على ستارز اجيب اى حاجه للعيال بدل مدخلهم وانا ايدى فاضية
توريس طالع على السلم العادى:: ومن الناحية التانيه ابو تريكه طالع على ا لسلم الكهربا (مصاب بقه)
**واذا بالاتنين يتقابلو**
طبعا توريس اول ماشاف ابو تريكه اتوهم وقله:
اده ابو تريكه انا مش مصدق نفسي . ااانا عمرى ما كنت اتخيل انى اقابلك فى يوم من الايام . صورة الله يخليك ياحج عشان اروح اتفشخر بيها ادام الفريق فى انجلترا
قام ابو تريكه قله: صورة بس ؟؟ ده قهوتك عندى ياباشا ده انته ضيف عندنا..
وخده ابو تريكه على كافيه من الكافيهات اللى مغرقه سيتى ستارز (حراقه اوى الكافيهات دى ربنا يكون فى عونك ياتريكه .. انته اللى هتحاسب)
ابو تريكه : ايه اللى جايبك ستارز يا توريس؟
توريس: والله دروجبا قارفنى وعايز التيشرت بتاعك فـ جيت عشان اجيبهوله من اديداس .. ده هيجنن لو عرف انى اقابلتك
ابو تريكه : وعلى ايه ياعم تقرص جيبك فى 140 جنيه ( وراح مادد ايده فى شنطته ومطلع تيشرت من بتوعه) .. خد ياباشا التيشرت اهو وادى كمان امضتى وابقه قول لدروجبا عد الجمايل
توريس : كريم يابو الكرم والله مش عارف اقلك ايه
المهم الكلام خد بعضه وكلمه من هنا على كلمة من هنا قلب الحوار بنكد
ابو تريكه : انا بقالى فترة ياتوريس بتصاب كتير وكل ما ارجع الملعب وربنا يوفقنى واحاول ارجع لمستوايا الاقى نفسي بتصاب تانى
توريس : والله نفس الكلام بيحصل معايا ياتريكه ده انا من ساعت 2009 واانا مش عارف اتلم على بعضى ياجدع
ابو تريكه:بس انا فى ناس كتير اوى ياتوريس بتقلى اعتزل وانا نفسى ارجع لمستوايا تانى واسعد جماهيرى
توريس : ياعم سيبك منهم دى عالم تعبانه منا هو زى الفل كل شوية بتصاب وبرجع تانى واتصاب وارجع تانى وبقبض والحياة حلوه ورحت تشلسي والحياة حلوه برضه ومحدش بيهاجمنى ولا بيقلى اعتزل .. وبعدين ياعم غير بقه وروح الزمالك ده اذا كان انا رحت تشلسى
ابو تريكه: لاياعم ده انا عتزل احسن ... متخدنى معاك تشلسي ياتوريس
توريس : انته تؤمر ياحبى .. اكلمك بس ابراهيموفيتش رئيس النادى واكيد مش هيوافق(اصدى هيوافق طبعا)
هذا الحوار واللقاء من خيال المؤلف ولا علاقة له بالواقع
وبالرغم من انه طويل وممل بعض الشئ لكن حبيت ان ابتدى بيه موضوعى عشان اوضح العلاقة بين حالة الاعبين
تقريبا ابو تريكه وتوريس نفس الحالة تمام مع اختلاف البيئة المحيطه طبعا
فى انجلترا : الناس بتقدر النجوم ومهما حصل ليهم من هبوط فى المستوى برضه بيساندوهم لانهم بيبقى عندهم الثقة الكاملة فى امكانيتهم وقدراتهم
فى مصر: عكس الكلام ده تماما.
ابو تريكه ومشكلته مع الاصابه فى اواخر 2009 وتكرارها ورجوعه للملاعب ثم انخفاض فى مستواه .. كلنا عارفين القصة دى لاننا قريبين منه .
ماذا عن توريس؟؟؟
عانى توريس من الاصابه فى موسم 2009 والذى كان سببا رئيسيا فى ابتعاد فريقه عن المنافسة فى البريمير ليج لان توريس كان بمثابة قوة كبيرة لليفربول واضافة قوية فى مبارياته ودائما ما كان يصنع الفارق .. ثم عاد توريس مرة اخرى ولكن بمستوى ضعيف جدا واستمر مسلسل تكرار الاصابات والمستوى الردئ لتوريس حتى انه لم يسجل اى هدف مع منتخبه الاسبانى سواء فى التصفيات او حتى فى كأس العالم .
ولاحظ الكثيرون على توريس خلال هذه الفترة وحتى الان فقدان توريس لاهم العوامل التى تميزه كالسرعة وفقدانه لحاسة المهارة فى استلام الكرة وتسليمها وهو مايحدث لابو تريكه تماما. منذ اصابته ايضا.
لكن ماهو الفرق؟؟؟
لم نجد الجماهير تهاجم توريس وتطالبه بالاعتزال بل وبالعكس
قام تشلسى باستقدام الاعب من نادى ليفربول بـ 58 مليون يورو
مبلغ رهيب دفع فى لاعب فاقد لكثير من مستواه ... فاذن ماهو السبب الذى دفع تشلسي الى التفريط فى هذا المبلغ الضخم مقابل الحصول على خدمات هذا الاعب
هل مسؤولين تشلسي يتصفون بهذه السذاجه التى تدفعهم الى شراء لاعب قد شطب كرويا كما يتهمون ابو تريكه فى مصر؟؟
بالطبع لا..
فهم يعلمون جيدا القيمة الكبيرة للاعب وانه حتما سيعود لمستواه وان لم يعد لمستواه .. فـ بقليل من امكانياته يصنع الفارق دائما وهو ايضا ماينطبق على ابو تريكه
اذن هذا الفارق بيننا وبينهم
وهذا الفارق بين تريكه وتوريس ( مع انها نفس الحالة تقريبا)
..ايضا اتجه الى نقطة مشتركة بين الاعبين..
وهى العامل النفسي
وهو عامل كبير جدا يؤثر على حالة الاعبين وخصوصا هؤلاء الذين يعانون من تكرار الاصابات .. دائما اقرأ فى تقارير اصابات توريس بان حالته النفسية سيئة جدا وهو ايضا ما اقرأه فى حالات ابو تريكه.
وبعد مراجعة بعض الدراسات الرياضية والتى تربط بين الاصابات والحالة النفسية للاعب اتضح الاتى:
ان العوامل النفسية تؤثر على حدوث الاصابات الرياضية بل وتفاقمها وايضا تساعد على اطالة مدة الاصابة .. واثبتت ايضا بعض الدراسات ان العوامل الحيايتة اليومية للاعب كرة القدم تؤثر بشكل كبير على ادائه فى الملاعب وتجعله معرض للاصابات بخطورة اكبر. ( مصدر المعلمومات من خلال بحثى على الانترنت)
فـ تكرار الاصابة فى مثل تلك الحالة يدفع الاعب الى حالة نفسية سيئة جدا قد تجعله يصاب مرة اخرى بمجرد نزوله الى الملعب.
وهو مابحدث تماما فى حالة ابو تريكه
اذن ماهو المطلوب منا كجماهير النادى الاهلى وجماهير مصر ( لان ابو تريكه اعطى مصر الكثير وسيعطى باذن الله)
المطلوب هو المسانده وليس الاحباط فى الاعب
المطلوب اعطاءه الثقة الكاملة بانه قادر على العودة الى الملاعب مرة اخرى
قد يشكك البعض فى كلامى بحجة السن وافتقاد اللياقة .. فسوف يكون ردى بمثال قريب جدا وهو محمد بركات صاحب ال35 عام واحمد حسن ايضا ومدى قدرتهم على الاعطاء طوال الـ90 دقيقه وامتلاكهم لياقة بدنيه يفتقدها بعض الاعبين من الشباب.
كتبت هذا الموضوع فى وقت أرى فيه الناس تهتم بأمور كثيرة فى الرياضه ونسيت من اعطاهم كثيرا ومن ضحى بالملايين لكى يبقى فى وسط جماهيره التى احبته
كتبته فى وقت يجب ان نساند فيه ابو تريكه حتى يعود بكل قوته
كتبته لانى فى كل حياتى لم احب لاعب مثلما احببت هذا الخلوق حبيب الملايين
محمد محمد ابو تريكه
بانتظار عودتك ياحبيب الملايين ولاتستمع للحاقدين