ناس كتير بتتمنى دخول رمضان عشان يشوفو المسلسلات والأفلام والفوازير، وبعدين يخرجو من رمضان زي ما دخلو.
الشيطان بيحاول يغوي الناس وبيستمتع جدا لما بيلاقي واحد مشغول بالمسلسلات وبيضيع صلاته، وبيتغاظ جدا لو لقاه بيقضي وقته في عمل مفيد للدنيا أوالآخرة.
لو كان برنامج مفيد ممكن نشوفه، لكن مسلسلات الحب والغرام بين البطل والبطلة، أوالقصص البوليسية التافهة، تضييع للوقت من غير فايدة، وممكن تخلصو المسلسل وانتو شايلين سيئات.. ده يرضيكم؟
طب ازاي نتخلص من إدمان المسلسلات؟
أول شيء الخشوع في الصلاة، لو صلينا الصلاة بهدوء هنحس اننا قريبين من ربنا.
تاني شيء -وركزو شويه- ممكن نتخلص لو عرفنا ان ربنا محرمش حاجة إلا إذا كانت ضارة؛ المسلسلات لها تأثير نفسي ضار، لأن مشاهد الحب والكلام المعسول بين البطل والبطلة بتنطبع في الذاكرة، وبتتحول لإدمان، وبتساعد على الانحراف، وبتسبب فتور العلاقة الزوجية للمتزوجين، وممكن تضر بالناس اللي لسه متجوزوش.
طيب فاكرين المسلسل بتاع الولد اللي اسمه: مهند؟ فاكرين عمل إيه في كتير من الستات؟ فتنهم لحد ما خلاهم يتكلمو عنه، وضحك عليهم في رمضان وضيع عليهم صلاة التراويح، بعد كده حصل إيه؟ في ستات أدمنو قصة مهند، وفي ستات خانو أزواجهم، وفي طالبات كانو بيتكلمو عنه في الحصص، والدرس بيخلص ويخرجو مش فاهمين حاجة، ده كله بسبب الواد اللي اسمه: مهند، ورجال خانو زوجاتهم، دي حاجات معروفة وبنسمع عنها.
مش عاوز أقول أكتر من كده، لكن انا مضطر أقول: كل شاب وشابة لازم يتجنبو المسلسلات والأفلام عشان يكونو أبعد عن خطر الفتور الزوجي في المستقبل.
وعشان أقربلكو الفكرة أكتر هقوللكو مين أكتر ناس حياتهم الزوجية فاشلة، انتو طبعا عارفين، الفنانين -طبعا-، عارفين ليه؟ لأنهم أكتر ناس عايشين متعة الاختلاط، عندهم القبلات واللمس والأحضان، فلما بيروحو بيوتهم مبيبقوش طايقين بعض، ويمكن احنا بنتصور انهم سعداء عشان الأحضان الحارة اللي بتحصل بينهم في مشاهد الغرام، والحقيقة هوما تعساء مش سعداء، وحياتهم الزوجية فاترة.