يواصل المصريون عادتهم المفضلة فى إلقاء النكت و القفشات و التعليقات الطريفة على الأحداث السياسية , خصوصاً بعد أن أصبح الجميع يتكلم بحرية فى السياسة عكس أيام النظام المخلوع .
موضوع اليوم خاص بالشروط التى يفرضها المواطنون على الشخص الذى سيكون رئيساً لجمهورية مصر العربية بناءاً على النتخابات الرئاسية القادمة إن شاء الله خصوصاً بعد أن تم إصدار الإعلان الدستورى رسمياً بالأمس .
و على موقع تويتر و فيسبوك انتشرت الأفكار الساخرة و الكوميدية و إليكم عينة منها :
- لو نجح بنسبة اكتر من 60% في الانتخابات يتحاكم .
- مايقولناش الإخوة و الأخوات.. أمي ما خلفتش غيري انا واخواتي .
-مايفتكرش انه عشان بقى رئيس انه قائد الثورة .
- ما يعملش زيارات مفاجئة للمصانع يوم السبت الساعة حداشر، احنا اللي حنعمل له زيارات مفاجئة كل تلات ساعات.
- بعد انتخابه يصدر قرار جمهورى بعمل رحلة لكل مصرى لمدة اسبوع يشوف فيها مصر اللى كنا بنتفرج عليها فى التليفزيون الحكومى ( شرم الشيخ - الغردقه -نويبع - مارينا - واخواتهم ) لان ابنى كان كل ما يشوف الاعلانات دى يسألنى الاماكن دى فين اقوله فى مصر ،يقوللى نفسى اروح مصر دى.
- ما يقولش على منتخبنا كويس ومايتصلش بحسن شحاته ولا يزور اللاعبين في التمرين.
- ميعطلش المرور عشان يروح مشوار يمشي في الشارع زيه زينا يا إما يستخدم الطياره .
-لا يبدأ اي جملة بكلمة "سنظل" .
- لا يستخدم مصطلحات مثل "محدودي الدخل"، "المرحلة المقبلة"، "لا مساس"، وغيرها من العبارات والجمل التي كان تتردد على مسامع الشعب المصري كل أول مايو!
- يبقى عارف اننا منتخبينه هوه مش هوه ومراته و ابنه و اخواته و امه و عيلته كلها .
- مايقعدش فى القصر الجمهورى ياخد شقة ايجار جديد احسن و لازم كل جمعة بعد الصلاة يزور منطقة ويتكلم مع اهلها .
- ماتكونش البدله بتاعتو مكتوب عليها اسمه.. عايزينه يجيب بدل من عند ابو نسمه .
- ياكل العيش أبو شلن ويشرب من الحنفية .
- لازم مايكونش راعى الرياضة والرياضيين ولا راعى الثقافة والمثقفين ولا راعى الفن والفنانين.
ما يقولش على منتخبنا كويس ومايتصلش بحسن شحاته ولا يزور اللاعبين في التمرين.
-ميضحكش علينا ويروح يفتتح نفس الحاجه عشرين مرة.
- ميكونش بيصلي العيد قبل العيد ما يبدأ و تلاقي صورته ملطوعه عالاهرام يوم الوقفه الساعه اتناشر بليل.
-يبطل كلمة نشجب و ندين و مايكونش من محبي الاستقرار.