أهو مستني فرج ربنا
أو علامة منه إني أتحرك في حاجة معينة
أصلي بصراحة مش حاسس أني لاقي نفسي هنا
بسم اللــــــه
هو فرج ربنا ده هييجي ازااي و حضرتك قاعد مش بتاخد بالأسباب اللي ربنا يسرهالك
يعني رزقك بصحة كويسة الحمد لله و حضرتك قالب يومك نايم طول النهار و صاحي طول الليل و ممكن تكون مدخن
منين بقى هتقدر تتحرك و تشتغل و تصنع فرص لنفسك بإذن الله !!
ثانيا علامة إيـــــــــــــــه اللي مستنيها
متخيل مثلا هتفضل باصص فوق في السما و تقول يا رب شغلني في مكان كويس و أنت مش مؤهل أصلا و مش بتاخد كورسات و معندكش خبرة في سوق العمل
متخيل لما تقعد تدعي مثلا و تقول يا رب خلي الطاولة دي تتحرك :d
هتتحرك و لو دعيت مليووووون سنة ؟؟
محتاج تقوم تقف و تمد إيديك و طبعا تستعن بالله و تحركها .. وقتها بس هتلاقيها اتحركت
مفيش حاجة اسمها شجرة تولع مثلا و دي تبقى إشارة
ربنا معانا في كل وقت و متستناش إشارة على وجوده سبحانه جنبك .. لأن الكون ده كله مسخر عشان يؤكدلك أن ربك معاك
ثالثا بقى
مش حاسس أن مكاني هنا ؟؟
احم حضرتك الكون ده كله مش مكفيك أو مش اللي كنت تطمح ليه مثلا
الصح أنك تقول أنا معملتش حاجة عشان أستاهل أكون هنا بس هو من كرمه و رحمته خلقك عشان تعرفه فتعبده صح فتشتغل و تعمر الكون
و بعدين ربنا اللي خلقك هنا يبقى هو سبحانه عالم أن ده أفضل وقت و مكان و كل حاجة ليك
قوم أنت اتحرك عشان دايرة الحياة متقفش بسببك
كل واحد مننا بيسلم الأمانة للي بعده .. ممكن يكون دورك بسيط بس عند ربنا كبيــــــــــــــــــــر يكفي أنك كنت أمين على الأمانة
اللي هي أنك خليفته في الأرض
فكر كده .. أنت عملت إيه و لا أي حد مننا عمل إيه عشان يستاهل يكون خليفة لــ الله عز و جل ؟؟
معملناش و مش هنقدر نعمل إلا اللي في طاقتنا و اللي هو سبحانه بيساعدنا و بيقوينا عليه
<<<<< يبقى اتحــــــرك
اشتغل على نفسك عشان تستاهل أبواب الخير اللي هتتفتحلك بإذن الله
اتحرك لأنك جزء من دايرة الحياة و النفع اللي مينفعش توقفها عندك
اتحرك و متقولش أنا ماالي هو أنا اللي هيغير الكون .. الحقيقة أيــــــــــــوه لأنك جزء منه
اتحرك و خليك قد المسئولية و خليك خليفة لربنا في كونه
متضيعش عمرك و أنت قاعد مكانك قوم بس اتحرك و استعين بالله و هتشوف أبواب الخير و الفرج هيتفتحولك ازااي
ومتنساش قول حبيبك صلى الله عليه و سلم
لن تزول قدما عبد يوم القيامة حتى يسأل عن أربع خصال : عن عمره فيما أفناه ، وعن شبابه فيما أبلاه ، وعن ماله من أين اكتسبه وفيما أنفقه ، وعن علمه ماذا عمل فيه
الراوي: معاذ بن جبل المحدث: المنذري - المصدر: الترغيب والترهيب - الصفحة أو الرقم: 4/298
خلاصة حكم المحدث: إسناده صحيح
اللهم أحيي فينا ما مات من عزائمنا
جزاكم الله خيرا