واضح ان الاخت الفاضلة متاثرة جدا بالصحف وبتبني ثقافتها على المعلومات اللي بتيجي فيها ولو انها جعلت مجهودها اللي بتبذله في قراءة الصحف في قراءة كتب التفسير والحديث والفقه كانت عرفت ان 90% من الامور اللي انتقدت فيها التيار السلفي هي نصوص قرانية واحاديث ثابتة لا خلاف عليها وان فيه حاجات كتير الناس بتشوفها تشدد هي في الحقيقة احكام دينية احنا اللي فرطنا فيها يعني على سبيل المثال بتقولي كفرت اللي لا يتبع الشريعة كما انزلت يبقى مش حتكفر المسحيين طيب حتقولي ايه في القران اللي بيقول ( لقدكفرالذين قالوا ان الله ثالث ثلاثة) وقوله تعالى (لقد كفر الذين قالوا ان الله هو المسيح ابن مريم) يمكن القران بقى تشدد وغلو وبعدين من اتى فهم ان الدين عباده وذكر فقط ولو كان كده امال الرسول عليه الصلاة والسلام هاجر للمدينة واسس فيها دولة ليه وليه اسس الجيوش وارسلها لفتح الممالك وليه ارسى قواعد السياسة الاسلامية وعقد المحالفات والمعاهدات واقام الحدود واسس القضاء وامر المسلمين باتخاذ الامراء ما كان مفيش داعي للكلام ده كله وكان اكتفى ببناء مسجد وخلى الصحابة قاعدين فيه يذكروا ويسبحوا وخلاص.. ياريت اللي بيتكلم في الدين وبيوجه سهام النقد للاخرين يوجهها بعلم او يسكت قبل ما يتسال يوم القيامة عن كلامه عن الله بغير علم ومخالفته لامر الله( ولا تقف ما ليس لك به علم ان السمع والبصر والفؤاد كل اولئك كان عنه مسؤلا) وللعلم لو ان اهل الدين تركوا السياسة لاهل الدنيا يبقى على الدنيا السلام وشوفوا مبارك عمل فينا ايه ولا عاوزين مبارك تاني وتالت ييجي يبهدلنا مرة تانية
يا اخى الفاضل انا مقاطعه الجرايد و المجلات من 1992 تقريبا لانها جابت لى زهايمر اللى بيتكتب حاجه و على ارض الواقع حاجه تانيه و كل تصريحات الحكومه السابقه كانت كلام اعرف بعدها ان اللى حيحصل عكسه تماما
انت بتدخل نفسه و بتدخلنى معاك فى محيط بعيد تماما عن القضيه المطروحه و الشيطان دائما يكمن فى التفاصيل لا انا داعيه ولا ادعى العلم فى الدين و لا انت و الكلام اللى بتقوله كله غلط و مردود عليه لكن فى ناس دايما قلوبها مياله لاختيار الاكثر ظلمه و قتامه و فى ناس بتقول الدين يسر و ليس عسر و اذا افتى اثنين فتوى فاختار ايسرهما و الرسول بيقول استفتى قلبك و انا باستفتى قلبى و باصلى و اصوم و اعبد ربنا على قدى و باحب اصحابى المسحين جدا بناتهم بناتى و اخواتهم اخواتى و قلوبنا عامره بالايمان كل فى دينه و محرابه و مجتمعه على حب الله و حب مصر
لما اى شيخ بدون ذكر اسماء يقول مش كفار يبقى انا اميل لهذا الرأى لانى مش حاحط ايدى و اتعايش مع انسان او انسانه انا مقتنعه داخليا انها كافره مش حاعرف ابقى بوشين لان الخطوه الجايه حتكون هناك كره فى الله زى ما فى حب فى الله و لا بد ان نكره فى الله الكفار و نحب فى الله اللى مش كفار (ده منطق مش مظبوط و لا تقبله فطرتى اللى اتربيت عليها) و الخطوه اللى بعدها على طول حتكون قاتلوا الكفار اعداء الله و ده غلط مش حاقاتل اختى و بنتى و اخويا المسيحى باسم الله الرحمن الرحيم
الموضوع الاساسى انى عايزه اعيش فى سلم و سلام مع نفسى و مع ربى و مع من حولى عايزه امد ايدى بالسلام لكل الناس عايزه اكون نموذج للاسلام الحقيقى دين السلم و السلام دين المحبه و دين المعامله الحسنه و دين العفو الصفخ و التسامح دين النور و الايمان
المسلم من سلم الناس من لسانه و يده و الحوار اللى انت ماشى فيه لا يؤدى الى سلم و لا سلام
راجع مفاهيمك فى الدين و ناقش اهل الرأى السليم و استفتى قلبك و ربنا ينور طريقك و طريقنا
انا قريت كتير جدا فى الدين و عملت ابحاث و طلعت بخلاصات لا حاقدر اقولك قريت ايه لانى لا احفظ اسم كتاب و لا اسم كاتب و لكنى من كل ما قرأت فى حياتى و هى (55 سنه الى الان) كله يحث على السلام و الصفاء و المحبه و الاخاء و لو كنت فظا عليظ القلب لانفضوا من حولك
ادع الى سبيل ربك بالحكمه و الموعظه الحسنه
انا لن اقابل الله و فى يدى دم انسان مهما كانت معتقداته احنا كلنا حسابنا عند الله
لكن لازم نكون قدوه على الارض للاسلام الصح
لا للتشدد و الارهاب و التكفير
و نعم للاسلام اللى فعلا سلم و سلام على البشر اجمعين
و تحيا مصر
