مساء الجمال يا شباب

نخش ف الموضوع ع طول


دلوقتى الأخت سحر الجعارة تطلع تقول ان المرأة لها نفس حقوق الرجل في المجتمع،



والأخت إقبال بركة تقول إن مصدر جمال المرأة هو عقلها مش جسدها ولازم التعامل معاها كعقل بدون النظر إلى الجسد هيه عاملة فيه ايه..

ده علي اساس ان الواحدة تبقى ماشية في الشارع وواحد بقى يعاكسها: يا ابو عقل جامد..ياواد انت ياابو مخيخ ..حوش شعرك عشان نشوف جمال عقلك يا قمر
والواحد بقى يكلم صاحبه وهما شايفين بنت ماشية..شفت ياد العقل اللى لابس أحمر ده؟؟ !!
كل الكلام ده ماشى



والأخت هالة سرحان بيجيلها تخلف عقلى لو سمعت ان راجل قال لمراته حضَّرى العَشا..
علي اساس ان العشا رجس من عمل الشيطان !!




والأخت العزيزة سعاد حسنى تقول البنت زى الولد ماهيش كمالة عدد..

ومش عارفه مين قال ان البنت كمالة؟؟ !!
البنت طبق كشرى بحاله من الكبير ابو تلاتة جنيه..!




والأخت عبير صبرى ربنا يهديها تقول ازاى الراجل المتوحش القاسى اللى بيطلع نار من مناخيره بيتعامل مع الأنثى اللى هيه نسمة ماشية ع الأرض..
" يا ولداااااااااااه" !!
مش مهم مش مهم


طبعا انا عادي الكلام ده بالنسبالي لأنى عارفه الولد المحترم بيعامل البنت المحترمة ازاى.. والزوج المحترم بيعامل الزوجة المحترمة ازاى .ومش محتاجين نصايح (اسم الله على جمالهم وأدبهم اللى فاتوا دوول)
________

المشكلة بقى مادام بيقولوا البنت زى الولد..
ليه الولد بيقف في المترو عشانهم بقى؟؟
يعنى الولد لما يركب المترو كام مرة في اليوم وكل مرة يكتشف انه لازم يقف عشانهم تبقى مشكلة!!!

يدخل المترو في أمان الله ويقعد بعد جهد جهيد وهو شايف واحدة موظفة مع صاحبتها راجعين من الشغل وصحتهم زى الفل.. وقاعدة تحكى لها ازاى تعمل محشى الكوسة وقاعدة تئور في الهوا يمين وشمال عشان يبقى الشرح عملى وصوتها عالى.. واول ما تدخل المترو تلاقى الشلل الرعاش حلّ عليها.. وعينيها مش قادرة تفتح من الإرهاق ياعيني وتيجى هيه وصاحبتها قدامه بالظبط وتعلـّى صوتها وتقول لصاحبتها:


معدتش باقدر أقف كتير يا سنية..


ترد عليها زميلتها واللبانة ف بقها:


ومين سمعك يا حبيبتشى..


الدكتشور قاللي انى لو وقفت على رجلى خمس دقايق هارجًّع ع اللى قدامى علطول



وللا البنت اللى لسة شباب.. يبقي الولد قاعد لا بيه ولا عليه ويلقى المحروسة داخلة المترو .. بنت حلوة وشعرها ع الخدود يهفهف ويرجع يطير.. وتيجى تقف قدامه.. وفجأة.....
تفضل تظبط شعرها وترميه ورا ضهرها زى إعلان صابون كامى عطر فرنسى الإيحاء..
ومتوقعة ان الزبون اللى هوه الواد المحترم الغلبان هيقوم يبوس ايديها انها تقعد مكانه..

والله لو خلعتلك شعرها كله وادتهولك على سبيل المقايضة زى قدماء المصريين..بردو ماتقومش!!


وبعدين الأول كانت عربيات السيدات في المترو قدام ومع ذلك كانوا منتشرين في كل العربيات وقلنا ماشى..
بعد ماحصلت حادثة مترو حلوان البسيطة اول المترو.. قالوا لا .. هاتوا السيدات في نص المترو..ليه بقى؟؟


ده علي اساس ان لو حادثة حصلت في أول المترو والسيدات قدام هيصوتوا ويلموا الدنيا انما الرجالة بتموت من سكات!!! صلاة النبى


طب حد من الرجاله اعترض ان السيدات ماليين مترو الرجالة؟ .. أبدا..انما شوف بقى ياعم الحاج لو حظك الأغبر وقعك انك ركبت من غير قصد في عربية السيدات..ياداهية دقى..تسمع بقى أحلى كلام.. أولا..سوفاااج..سوهاج..راجل؟؟..واللى تحط وشها في الأرض من الكسوف..واللى تقول أوووه.. راجل..فانتستيك..صلاة النبى..


انتى عمرك ماشفتى راجل ياضنايا؟؟؟مش برضه انتى جاية من شغلك وهوه هناك .. وراجعة بيتك هتلاقى واحد في وشك زى القضا المستعجل؟


والبنت اللى في الجامعة .. آه لو شافت راجل في المترو.. هيغمى عليها من الخضة..


ماانتى لسة جاية من الجامعة يختي وكنتى انتى والولاد قاعدين تلعبوا صلح وعسكر وحرامية.. عمرك ماشفتى راجل ياكميله؟؟؟


طلاما بتقولو مساوااااااه يبقا في كل حاجه بقا!!


. زى ما الولد بيشتغل وهيه بتشتغل.. يبقى اللى يلحق الكرسى يقعد باعتبار انها إبراهيم ابن خالته يعنى عادى ..ومادام فيه مساواة ولازم نتعامل مع عقل البنت.. يبقى بلاش تلعبي فى شعرك وتوريلو انك بتحطي هيد أندشولدرز ضد القشرة عشان تقوميه!
لأن هو كمان بيحط هيد أنشولدرز ومن الحجم الكبير كمان أبو عشرين جنيه..
هههههههههه

انا مش بقول انك متقمش خالص

.بس قوم عشان حد يستاهل.. يعنى ست كبيرة مريضة.. راجل عجوز تعبان.. ست شايلة تسع عيال على ايديها..كده يعنى.. حالات تستاهل.. انما واحدة عندها تلاتين اربعين سنة وقاعدة عاملالى فيها حسين رياض لما اتخرس في رد قلبى.. تقفلها ليه؟؟




وكمان شوف الموقف ده..
الواد يقف عشان واحدة ست تقعد..ويبقا واقف جنبها..
وأول ما تيجى تنزل محطتها تشاور لاقرب بنت أو ست عشان تقعد مكانها!! صلاة النبى..حتى الكرسى بيتوارث يا جدعان؟؟
خيال مآتة واقف جنب الكرسى ؟؟؟دا واقف عشانك !!!
وموقف ورا موقف تكتشف في لحظة ان كل الستات والبنات قاعدين..وكل الرجالة ماسكين جرايد وقاعدين يهووا عليهم:
ألف ليلة وليلة.. قصة كل ليلة..احكى ياشهرزاد.. احكى لشهريار
حاجه تجنن يا جدعوووووووووووووون


وللا البنت اللى تيجى تقعد جنبك ومش طايقة نفسها قال إيه المكان ضيق ومش قادرة تقعد مرتاحة..
بنت ناس يعني
ههههههههههههههههههههههه


طب ما دام انتى متضايقة كده ماتقومى تقفى بلاش القعدة المقرفة دى.. وللا يعنى عشان كل مرة واحد محترم هوه اللى يقف عشان المكان يوسع للهانم.. أم طاقية.. طاقية حمرا.. للهانم البيضا.. والهانم السمرا
لا تعليق
احنا اصلا شكلنا معدش لينا عيش في الزمن ده
ههههههههههههههههههه




هذة الموضوع منقول للا مانة من (اختكم مريهان )

انا عارفة انى طولت عليكم لكن هتضحك من قلبك بجد وعلى فكرة للامانة هو منقول من منتدى اختى العزيزة (اختكم مريهان )وانا بنت على فكرة بس هى دى الحقيقة فعلا !!!!!!!!!! هههههههههههههه

لا وجهه نظر جامدة

اصل البنات بتوع مصلحتهم وبس

لما يكون ليهم حق يقولو البنت زى الولد

وموضوع المترو بقى يقولك لازم تقوم تقف اصلها بنت

شوفتو بقى ان البنات بتوع مصلحتهم وبس

كدة يا على انا بس عايزكم تضحكوا لكن اوى وسوف تقع عليك ساعقة من الا عضاء البنات وعلى فكرة انا بنت مش ولد لكن الواحد يقول الحقيقة ههههههههههههه

ولا صاعقة ولا حاجة انا بقول الحقيقى
واللى بيحصل والشباب معايا فى الموضوع دة

اوكى يا على ميرسى

اسفة صاعقة

ههههههههههههه
البنت مش طبق كشرى بتلاتة لا بخمسة بس
نيس توبيك

هههههههههههههههههههه
جميل جداااااااااااا
بجد موت من الضحك
والموضوع جي في الجووووووووووون
واحي حته عجبتني ديه لاني انا بعملها بس والله لما رجلي بتوجعني عشان علي طول بركب مترو

ومين سمعك يا حبيبتشى..


الدكتشور قاللي انى لو وقفت على رجلى خمس دقايق هارجًّع ع اللى قدامى علطول

بس خلاص بقي مش هعملها بسبب الاختراع الجديد بنطلع كشكول ونحطه علي الباب الي مش بيفتح في المترو ونقعد علي الارض ونحط الهند فري في ودننه ونعيش بقي عربية سيدات
ميرسي ليكي يا قمر

ميرسي لردكم كلكم و شكر خاص للطفله البريئه المغمضه وصغيره على الحب

موضوع حلو وانا بأيدك

بس الولد لما يقوم في المترو او الاتوبيس
فده مش عشان المساواة ولاحاجة
لكن عشان هو زوق ومحترم وراجل واكيد بيزيد في نظر كل الناس لما يبقي شهم
وكمانربنا هيديله ثواب كبير علي انه عمل خير
مش مع الستات بس مع العواجيز وكده

اشكرك ع الموضوع

لاشكر على واجب وميرسى على مروروكم جميعا