وأتحاسب على حاجة مع أني معملتهاش
وتضيع سنين العمر مني ما الحياة مبتستناش
ونصيحة مني يا ابني يا تنفعك يا بلاش
حاول تصدق حكاية سمعتها مني ومشفتهاش
أوعى يضيع عمرك عشان لحظة متسواش
***
من صغري عايش بره بلدي غريب
لا في يوم كان ليا صاحب ولا حتى حبيب
ولا يوم لقيت مرسى ولا حتى حضن قريب
والدنيا مهياش شاطرة غير بس في التعذيب
وحلمت أرجعلك يمكن ألاقي طبيب
للجرح اللي جوايا والذل والتأنيب
ورجعتلك بعد الفراق ولقتني برضه غريب
ماحنا في زمان أغبر وطبعه عجيب
***
وفي وحدتي كنت بحكي للقمر واشكيله احزاني
كنت بصرخ في الحيطان واسألها مين هو الأناني
واسألها مين السبب في وحدتي و مين اللي كان جاني
أوعى تكون فاكر أن الوقت نسٌاني
أوعى تكون فاكر أن الجرح ممكن لما يمر العمر تنساه
دا انا كل ليلة بأمدد جسمي في حضن الخوف واتكلم معاه
وان مرة غافلته وغمضت عيني ونمت في حضنه وأنا وياه
بحلم بحضن أمي اللي عمري ما اترميت جواه
وأصحى وأنا ملهوف عالحضن اللي بتمناه
الحضن اللي من صغري أنا عشت بحلم بيه
بتفوت سنين عمري بدور ومش بلاقيه
نفسي ولو مرة أنام أنا فيه
وارتاح وأنا جواه واحكيله عاللي أنا فيه
احكيله عاللي جوايا واحكيله على شقايا لو بس يوم الاقيه
هشكيله من زمني واحكيله على بلاويه
واحكيله على اللي عاش ميت واحكيله على خطاويه
لو بس يوم الاقيه
***
أوعى تكون فاكر دموعي ضعف مني ومسكنة
كل الحكاية اني خلاص مبقتش قادر عالفرعنة والفتونة
كل الحكاية أن لقيت في مرايتي عجوز عنده عشرين سنة
وده مش أنا ويمكن أنا ..ماتسأل صحابي مين أنا
أصلي نسيت معنى الهنا
نفسي أضحك مرة تاني لو حتى مرة في السنة
نفسي في يوم يغمضلي جفن وأنام
خايف يكون فعلا معادش في أحلام
وتكون خلاص خلصت مفاضلش غير أوهام
عمال أضيع فيها وبتخلص الأيام
وبفكر ارفع ايديا واسلم يمكن أعيش في سلام
لكن أنا محكوم عليا بحكم ميتلغيش لو بعد مليون عام
وأوعى تكون فاكر ان العذاب المؤبد أرحم من الاعدام
***
ولحد امتى هفضل احسبها ماللي راح من العمر راح
كل شيء من عمري اتسرق مش باقي غير حبة جراح
لما بشوف الناس فرحانة بستغرب أصلي نسيت أن الزمان ممكن يجيب أفراح
أصل الزمان اللي عرفته في حياتي زمان سفاح
بدعي في صلاتي وبشكي للي بيقبض الأرواح
امتى هجيلك يا ربي نفسي أموت وارتاح
أصلي تعبت من السفر خايف أموت سواح
***
كل حلمي كان في يوم أرجع بلادي
كان هواها في فؤادي
كنت بلعن يوم بعادي
عشت عمري سنين بنادي
والنهاردة في يوم ميلادي
كلمة بكتبها لولادي
من تحت صخرة في قلب وادي
هي دي أخرة عنادي