|
السلام عليكم
أولا و قبل كل شىء انا ابن الثورة و شاركت زى أى مصرى فى الميدان و أكثر فى اللجان الشعبيى لكون مدينتنا من المدن الجديدة اللى اتعرضت لأزى كبير من البلطجية.
ثانيا انا ليا تعليق على أوامر ثورة الغضب الثالثة...
انا مع المظاهرات للمرة المليون لأننا عوازين نبقى بلد ديموقراطى و ناخد حقنا و نشوف مصر راقية بشعبها طالما التظاهرات دى لا تعطل حركة الانتاج لاننا الان فى مرحلة بناء بعد ما أسقطنا النظام فلازم ندى للمرحلة دة حقها الكامل و يبقى عندنا الحرص الكامل فى اى تظاهرات بعد كدة بحيث انها متعطلش حركة الانتاج.
كمان يا جماعة انا نفسى نكون على دراية كاملة و احنا بنطالب بمطالبنا, بمعنى انى اعرف كل الظروف المحيطة بكل مطلب و ان الحماسة الزيادة متعميش عينى عن الجوانب الكاملة لكل مطلب.
كمان احنا كشباب خايفين على البلد و عملنا ثورة شهد ليها العالم أجمع لكن لازم نعرف ان كلنا لسة فى طور تعلم الحياة السياسية و كل ما يتعلق بها من أمور معلنة و خفية, يعنى احنا لسة مكتسبناش الحكمة الكاملة فى روؤية جوانب و ظروف مطلب ما و دة طبيعى جداا و لازم نعترف به.
ما جاء فى أوامر ثورة الغضب الثالثة فيه ما هو صحيح و ما هو يفتقد للتروى و الحكمة و رجاحة العقل.
أولا مفيش حاجة اسمها أوامر, احنا اطحنا بحسنى مبارك علشان كان ديكتاتور و بيقول أوامر, مينفعش احنا ننقل الديكتاتورية دى لينا, و كمان عاوز أقول ان ميدان التحرير مينفعش هو اللى يحكم دولتنا لان هزا يفتقر لاى نوع من أنواع الحكمة و بناء الدولة الحديثة.
بالنسبة للمطلب الأول: طبعا كلنا معاه قلبا و قالبا.
المطلب الثانى: رأيى انه مينفعش أقيل حكومة عصام شرف, لان اللى هييجى اصلا مش هيلحق يعمل اى حاجة لحد فترة الانتخابات, يا جماعة زى فريق كرة القدم لما اجى اغير كل شوية مدرب علشان اتهزم فى مباراة او ايا كان, و المدرب اللى هييجى بعديه مش هيلاقى وقت كاف اصلا يعمل اى حاجة, مناصب الوزارة بالزات محتاجة استقرار و وقت كاف لتنفيز فكر ما, لكن علشان كل شوية أشيل و أحط, حكومة شرف من أفضل الوزارات الى عدت علينا و ليها اخطاء كثيرة زى ما ليها ايجابيات اكثر, لكن كدة كدة المجلس العسكرى هيتدخل فى اى حكومة جيا لحد قبل الانتخابات و أظن كلكم شاهدين على مواقف حصلت ايجابية لشرف و اتدخل المجلس العسكرى فيها, لكن فى نفس الوقت انا مع المطالبة بمحاكمة أى متقاعس فى الحكومة.
المطلب الثالث: طبعا نفسى دة يتحقق و هو دة بيت الفصيد !!!!
المطلب الرابع: بردة مطلب شرعى ملوش أى تعليق, يعنى ايه المدنيين يتحاكموا محاكمة عسكرية و رموز الفساد يتحاكموا محاكمة مدنية, صباح الفل.....
المطلب الخامس: حاجة زى كدة فعلا كانت المفروض تتم من اول ما الثورة اتعملت لان النائب العام أو رئيس جهاز المحاسبات من النظام القديم و ضمانة للعمل النزيه كان المفروض يتشالوا من الاول.
المطلب السادس: الخيانة العظمى ممكن و تفعيل قانون الغدر دة أكيد, بس اعادة البث!!! حد يعرف هما ليه أصلا قطعوا البث علشان يبقى فى مطالبات باعادة البث مرة أخرى ؟!!!! انا شايف ان قرار قطع البث جاء لحرية أكثر لمرونة سير المحكمة لان الكاميرا كانت بتجبر حضور المحكمة بضوابط معينة علشان المحكمة تظهر بصورة مثالية و الدليل ان محاميو الدفاع المدنى زات نفسهم رحبوا جدا بالقرار دة.
المطلب السابع: كلنا نتمنى أن الداخلية يتشال منهم كل روؤس التخريب و الفساد و انه يتحط خطة متزنة لارجاع الامن للشارع زى الاول و احسن.
المطلب الثامن: طبعا كلنا مع تطهير و تطوير الاعلام اكتر و اكتر.
المطلب التاسع: ليه يعنى شيخ الازهر بالانتخاب و مش بالتعيين , أظن فى الازهر بالزات لما ييجوا جماهة الشورى اللى فى الازهر و يجمعوا على واحد ده لانهم على دراية كاملة بكل فرد فى مؤسسة الازهر لكن احنا نعرف مين اصلا فى الازهر و لا سيرة زات كل واحد فيهم؟!!! أظنه بصراحة مطلب مش فى محله و ملوش أى لزمة دلوقتى.
المطلب العاشر: مينفعش تراجع اتفاقية بينك و بين طرف اخر الا لما الطرف الاخر يوافق هو كمان على مراجعتها لان الاتفاقية دى كانت بين اتنين مش واحد, و علشان منبقاش ادام العالم ان مصر هى اللى عاوزة تتلكك فى بنود المعاهدة و طبعا الاعلام الغربى يطلعنا كمان ان احنا عاوزين اللى ننقد و نحل و نلغى المعاهدة و تبان مصر بقى فى صورة البلد الشرير و اسرائيل تبان فى صورة الطفل المسكين اللى كان قاعد فى حاله, لازم يا جماعة نبقى أزكى من كدة و منجريش ورا عواطفنا و خلاص.
المطلبب الحادى عشر: القصاص لازم طبعا يحصل و سحب السفير لحد ما اسرائيل تعتزر و تقدم على الاقل تعويضات لاسر الشهداء و كمان تحاكم المسؤولين الاسرائليين عما حدث, لكن تغلق السفارة؟؟؟!!! يعنى اعلان حرب !!!! انتوا شايفين ان احنا حاليا محتاجين مرحلة لاعادة بناء نصر و تأسيسها على اسس أقوى من زى قبل و لا ندخل فى مهاترات حروب الاستنزاف و احنا كلنا فى غنى عنها الان لان بلدنا دلوقتى على شفا حفرة لازم كلنا نتعاوان علشان بلدنا تقف على أرض صلبة و نعدى من المرحلة الانتقالية الحرجة اللى احنا فيها.
المطلب الثانى عشر: دة شىء أكيد...
المطلب الثالث عشر: و دة كمان مطلب لابد منه..
المطلب الرابع عشر: يا ريت علشان يبقى فيه توافق ما بين الراتب و اسعار السلع.
المطلب الخامس عشر: الحد الادنى كلنا متفقين عليه دة بالعكس لازم يزيد كمان, لكن اعانة البطالة دى احنا مش مستعدين ليها دلوقتى و لا اللى كاتبين المطالب دى مش واخدين بالهم ان احنا بنصرف من الاحتياطى و حالنا الاقتصادى زى الزفت!!!!!!
المطلب السادس عشر: طبعا كلنا نتمنى كدة.
المطلب السابع عشر: بردة دة شىء أكيد.
المطلب الأخير: علشان نعرف راسنا من رجلينا و دة كان لازم يحصل فى الاطار الزمنى اللى كان محدده المجلس العسكرى.
|
