العضوة الفاضلة جدا جدة مصرية عضوة غنية عن التعريف هنا, فوجئت منذ قليل انها ازالت قائمة الاصدقاء وازالت التوقيع ولم تشارك من الامس عصرا تقريبا,

اخشي ان تكون قررت عدم الاستمرار في المشاركة هنا, من يعرف الوصول اليها ارجو ان يطمئننا فالجميع هنا يقدرونها ويحترمونها,

دمتم سالمين

انا بعتلها رساله على الميل وهى ان شاء الله اول ماتشوفها هتدخل تطمنا عليها

انا دخلت على البروفايل بتاعها فعلا مسحت كل شيىء عنها أنا قلقان فعلاً عليها

ياريت لو حد يعرف تليفونها أو اميل ليها حد يكلمها ويطمنا عليها

ويارب تكون بخير دى ست الكل ونوارة المنتدى

عودى ياجدة مصرية

جدة بخير وهى سافرت بلاد النوبة وهناك مفيش نت

وبتسلم على الجميع

و ان شاءالله ترجع بالسلامة

متقلقوش جده مصريه قالت انها مسافره النوبه
واول ماترجع هتدخل وتنور المنتدى تانى
دى ست الكل دى وحبيبه قلبنا كلنا
ترجعى بالسلامه ياحبيبه قلبى ياجدتى

طب الحمد لله انها بخير, المكان ده جميل بالناس اللي فيه ولو مشيوا مش هيبقاله اي طعم,

ادام الله الود بين الاعضاء كلهم

ترجع باسلامة انشاء الله
وحشتنا ردودها الجميلة

باذن الله ترجع بالسلامة جدتنا الغالية

المنتدي والله اتأثر بغيابها

أنا كدة أطمئنيت عليها والحمد لله أنها بخير والله وحشانى جدا وهى لها أكثر من أسبوع متغيبة عن الكتابة. منتظرينك يا جدة بفارغ الصبر. الأكل هنا ناقص ملح وفلفل وكمون وليمون وجنزبيل يعنى ماتسيبيناش جعانين كتير كدة.

احاول التواصل معها والاطمئنان عليها لكنني وجدتها بالفعل اغلقت كل شئ

الحمد لله يا جماعة, جدة مصرية رجعت المنتدي من تاني,

اتمني ان الود يدوم بين الجميع هنا, شكرا لكم وربنا يجمعنا علي الخير دايما

جده رجعت الحمدلله بس هى مشغوله شويه ومبتعرفش تدخل المنتدى كتير

حمدلله ع سلامتك يا اجمل تيته ف الدنيا

الحمد لله انها بخير فعلا المنتدى بيحلو اكتر بوجودها

حمدالله على السلامة ياأحلى جدة مصرية ونورتى المنتدى

وأنا بعتلك ميل على الأيميل بتاعك على الياهو وأنتى مرتديش عليا

وكنت منتظر ردك علشان أطمئن عليكى بس خلاص الحمدلله أتطمئنيت عليكى

وحمدالله على سلامتك على رجوعك من النوبة بسلام وخير

بارك الله فيكى يا جدتنا العزيزه و ربنا ما يحرمنا منك ابدا يا ست الكل
بجد بتوحشينا

ربنا يرجعهالنا بالسلامة ان شاء الله

ايه ياجدعان الناس هناك لوحدها فى التحرير
قاعدين تدورو على جده وهى اصلا فى النوبه هى النوبه دى فى مصر

حمد الله على سلامتك يا جدتنا الغاليه
و النبى ما تحرمينا منك و من البركه اللى بنحس بيها لما بتكونى بيننا

أبنائى الأعزاء والأحباء

والله والله ان هذا القسم لم ادخله الا قليلا جدا وعند طريق اعلان عن موضوع ولكن لم اكن اعرف كيف الوصول اليه
وصدفة وجدت القسم بآخر فهرس نجوم مصرية بالصفحة الرئيسية

انا مريضة بمرض مزمن والعياذ بالله اسمه الوسواس القهرى

لما سافرت تخوفت جدا من حدوث اى شىء بينى وبين قائمة الاصدقاء وقلت اشيلها وارجعها ولما رجعت لم اعرف كيف ارجعها

اما الملف الشخصى مش عارفة افتحه تانى ونسيت خالص خالص ازاى

شكرا كتير ليكم وانا بحبكم من قلبى والله

اما زائرنا الفاضل اللطيف وزمانه زارنا ومشى ولكن بلاد النوبة دى هى اساس مصر ويوجد الكثيرين جدا لا يعرفون تاريخ النوبة واين موقعها

شكرا والف شكر وربنا يخليكم لى ومع تقديم اعتذارى الشديد اليكم جميعا للتأخير

النوبة اصل الحضارة

منورانا ياجدة والله وشكرا ليكي علي وجودك معنا, ويرجي من المشرفين العوام ان يساعدوا جدتنا في الملف الشخصي اذا هي ارادت ذلك