الجدير بالذكر أن حزب الحرية الذي يضم في عضويته أعضاء سابقين من الحزب الوطني المنحل دعا لعقد مؤتمر بعنوان "اتقو شر الصعيد إذا غضب" ينعقد غدا بمدينة نجع حمادي حيث تمت دعوة القبائل المصرية كافة للوقوف ضد قانون العزل الذي تطالب به الأحزاب السياسية
|
فى مفاجأة كبيرة يعقد نائب مجلس الشعب السابق عن محافظة قنا هشام الشعينى والعضو فى الحزب الوطنى الديمقراطى المنحل مؤتمر فى فيلته بعنوان(إتقوا شر الصعيد إذا غضب) حيث هاجم هذا العضو قانون الغدر الجديد وأكد أنه يتنافى مع كل الحقوق السياسية والإنسانية المكفولة للمواطن كما قال إن نواب الحزب الوطني لن يستسلموا ولن نعطى البلد من طبق على فضة للأحزاب الأخرى أضاف الشعينى شوية العيال اللي عاوزين تطبيق العزل على النواب السابقين عليهم أن يتأكدوا أن الحكم للقضاء وليس لرؤيتهم وأنهم عاوزين يخربوا البلد وميعرفوش أن رجالتنا لو اتحركت في الشوارع مش هنخلى حد يطلع بره بس إحنا قضيتنا مصر ومش عاوزين فتنة
الجدير بالذكر أن حزب الحرية الذي يضم في عضويته أعضاء سابقين من الحزب الوطني المنحل دعا لعقد مؤتمر بعنوان "اتقو شر الصعيد إذا غضب" ينعقد غدا بمدينة نجع حمادي حيث تمت دعوة القبائل المصرية كافة للوقوف ضد قانون العزل الذي تطالب به الأحزاب السياسية |
|
واللهى انا مستغربة هم يعنى لما يهددوا الناس كدة مين حينتخبهم واللا المقصود يخدوا المجلس بالبلطجة..؟
|
|
انا كده خفت جدا وحأبدا استخبى من هنا ورايح في البيت ليرجع رجالة الشعيني يطلعولي يخوفوني بالليل
|
|
بجد انا خفت وكلنا خايفين من " خُط " الصعيد قمة البجاحة انهم سبب فى فساد الحياة السياسية وعايزين يشاركوا تانى لازم قانون الاحزاب يكون مفعل وفيه شروط للاشتراك فيه لان الاحزاب كترت جدا وبقت زى الرز وكده بقى الصالح مع الطالح ياريت بلاش تهديد ونحترم نفسنا شكرا ع الخبر |
|
البلد اصبحت فوضة وكل واحد بيهدد براحته ولا هامه حاجه . الله يرحم الايام ودا كمان له عين وبيتكلم ويهدد حاجه تقرف |
|
لاتعليق ... لا تعليق .... النتائج المبهرة للثورة الفاضلة الجميلة فى 25 يناير يوم عيد الشرطة هههههههههههههه ...
و خير الختام ذكر النبى عليه الصلاة و السلام ***** |
|
حثاله المجتمع بيتكلموااااااا
رجاله الصعيد لو طلعوا على الشيعينى والى زيه فعلا هيقطعوه المفروض هوا الى يخاف مش يخوف حد والى بيحصل يا استاذ زيزو ملهوش دعوه بالثوره لانها كانت المفروض تحصل من زمان مش قادره افهم سخريتك من نتائج الثوره ؟؟؟؟؟؟؟؟؟؟ هوا حضرتك ضدها ولا حاجه ؟؟ |
|
أيه دخل أللى بيحصل ده بالثورة؟ سؤال غريب أوى وليس هذا وقته..... أللى قاموا بالثورة أسمهم وتعريفهم ثوار وأللى بيقوموا بالبلطجة تعريفهم بلطجية وأللى بيقوموا بالتخطيط لهم لهدم مصر تعريفهم الحزب الوطنى وأللى مش عايز يسيطر على البلد ويحميها وناخد منهم كلام بس تعريفهم الداخلية وأللى شايف كل حاجة وفى أيده كل حاجة وبكلمة واحدة يستطيع القيام بأى حاجة ومش عايز يعمل حاجة تعريفهم المجلس العسكرى وأللى ماشى على المنوال بتاع مراقبة كل العك ده وحب تخريب مصر وأبادت آمالها وطموحاتها وأفشال ثورتها ومساعدة الجهات السيادية المذكورة سابقا تعريفهم جهات سيادية.
فما دخل ثوار ٢٥ يناير فى الحالة الزفت التى وصلنا أليها هنا فى مصر؟ من يخرب مصر ليس هم الثوار ولكن جميع من جاء بعدهم من جهات سيادية ذكرت عاليه. بس لى كلمة أخيرة للصعايدة...... أنا أعرف أنهم فعلا رجالة بمعنى الكلمة أى مشتقة من الرجولة بمفهومها الصحيح وليست كما ذكرها فل الحزب الواطى وهو يقصد بكلمة رجل هنا بلطجى وهذا هو ليست الصعيدى الحق بل الصعيدى اللطع |
|
خفت انا منك عااااااااااااااااااااااااااد
منار |
|
حضراتكم لم تنتبهو لشىء فى منتهى الاهميه
بما انى واحد من صعيد مصر الذى استشرى فيه فساد طوال 60 عام من تخلف و جهل ان الراجل اللى بيتكلم مع موافقتى على كل الكلام اللى قولتو لو نزل الانتخابات هينجــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــح فى الصعيد الناس مش زى ما انتو فاهمين بيدورو على اللى هينفذ وعوده و مصالح الشعب لا هنا ينجح المرشح بالمبادىء الاتيه 1 مدى كثره عائلته و نفوذها فى منطقه الترشيح 2 مدى قيام هذا المرشح بالواجب اللى عليه و ده عندنا مش مهام مجلس الشعب لا مهام ( الذهاب للتعازى فى الاموات و المجامله فى الافراح و التوسط لخروج احد الخارجين عن القانون من محبسه) 3مدى عراقه نسبه و اصله طبعا حضراتكم اغلبكم مندهشين من ذلك و لكن يجب مواجهه الحقيقه حتى لو كانت كارثه و لكم كل تحياتى |
|
حثاله المجتمع بيتكلموااااااا
رجاله الصعيد لو طلعوا على الشيعينى والى زيه فعلا هيقطعوه المفروض هوا الى يخاف مش يخوف حد والى بيحصل يا استاذ زيزو ملهوش دعوه بالثوره لانها كانت المفروض تحصل من زمان مش قادره افهم سخريتك من نتائج الثوره ؟؟؟؟؟؟؟؟؟؟ هوا حضرتك ضدها ولا حاجه ؟؟ و خير الختام ذكر النبى عليه الصلاة و السلام ***** |
|
الاخت الفاضلة / ندى ... تحياتى .. و بعد .. انا مش ضد الثورة نهائيا .. بس ااسف على ما يحدث بعدها .. بقى بعد الشباب المحترم اللى كان موجود حتى 11/2/2011 و السابق غار .. هما الموجودين و عاملين بلاوى الان ؟؟؟ لا و الف لا .. يبقى النتائج المترتبة على ذلك غير صحيحة مش كده و الا ايه ....؟؟؟؟
و خير الختام ذكر النبى عليه الصلاة و السلام ***** ملحوظة. ردى هذا كان لا بد لى وأن أرسله منذ أكثر من ستة ساعات عندما قرأت ردك لى ولكننى فعلا كنت فى طريقى إلى السفر وقررت تأجيله إلى عند الوصول. ولكن هذا لا يفسد لى من الود قضية. تقبل تحياتى |
|
انا صعيدى من سوهاج انا وعيلتى فدا طفل من القاهرة نزل يتظاهر في ميدان التحرير دا بس اللى ممكن يغضب عشانه الصعيد مش فلول الحزب الوطنى اللى نهب مصر كلها بما فيها الصعيد مين قال اننا معاهم ومين قال اننا ممكن نسمح لاى حد يفصل الصعيد عن العاصمة
نحن مع الحق مش مع اللى سكتوا على افعال الحزب الوطنى البائد الى الابد حتى لو كانوا شرفاء كفاية عليكم كدا حتى لو سميتوا نفسكم حزب الحرية عادى عارفينكم وطنى ديمقراطى وحافظينكم فرد فرد وزنقه زنقة مش هندى صوتنا ليكم بلاش تحلموا احنا فهمنا خلاص بدليل انى جاوبت على السؤال العشوائى 9=11صحيح قعدت ساعه افكر لكن في الاخر جاوبت وعرفت انى الاجابه 25 ههههههه |