في البداية : والله العظيم اللي أنا هأقوله ده صحيح وشوفته بعنيا وربنا شاهد عليا ودي شهادتي على اللي حصل في ماسبيرو من 7 مساء وحتى 12 صباحا .
بدأت الحكاية وأنا راجع من الشبكة العربية كنت في مؤتمر صحفي عشان البحرين وأنا في طريقي للجرنال قابلت زمايلي وقالوا إن فيه ضرب نار عند ماسبيرو وكانت الساعة تقريبا 7 فسبتهم يروحوا وبعدين مروة- زميلتي في الجرنال- قالتلي تعالي نروح معاهم قلت لها يلا وركبنا أتوبيس لحد المتحف المصري ونزلنا بعد ما شوفت وأنا في الاتوبيس مدرعات رايحة ناحية ماسبيرو.
وانا في الطريق أول حاجة شوفتها ست متعورة وماشية وصورتها ، وبعديها بشوية لقيت واحد مصاب وواخدينه علي عربية ربع نقل وأنا بصوره وبعدين قالوللي ان في واحد ميت معاهم عالعربية وصورتة بس لسة هرفع الفيديو بتاعةفراح نحيت الفندق من ورا ولقيت المصابين والميتين مرمين الكلام دة شوفتة من الازاز ودة الفبديو
بعديها قعدت اصور شوية في ناس مصابة لحد ما لقيت المتظاهرين ماسكين عميد شرطة تقريبا _انا مش عارف الرتبة بالظبط_ وطايحين فيه ضرب وناس خبوه جوه الفندق من بوابة جانبية وده الفيديو باللي حصل
بعدين لقيت رصاص في حزام يعمله حوالي 2 متر وحاولت أجيب رصاصة منه ماعرفتش لحد ما لقيته انفرط ع الأرض الرصاصة كانت تقريبا 5 سم طول
الرصاص في الفيديو:
http://www.youtube.com/watch?feature...&v=ofkzvlIaX2Y
وبعدين وقفت شوية وقررت إني أروح عند ماسبيرو فقلت لزميلتي ما تتحركش من مكانها ورحت أنا لوحدي.
قابلت نواره وأنا في الطريق وقلت لها فيه ناس مصابة كتير وميته في المكان اللي انا كنت فيه وهي قالتلي ان مفيش حاجة هناك عند ماسبيرو عشان الشرطة كانت قافلة الطريق ، ولما رحت هناك لقيت مجموعة من الأقباط شايلين الصليب وبيقولوا صلوات وبصراحة كان منظر جميل جدا وصورته ودي صورته.
بعديها رجعت ناحية الفندق ولقيت وانا في الطريق ناس مصابة بتخرج من جراج في عمارة جنب هيلتون رمسيس وصورتهم كام صورة كده ، وفيه ناس كانوا متشالين علي موتوسيكل وناس في عربية جيب كانت مكسورة صاحبها تطوع انه يوصلهم المستشفي القبطي في رمسيس..
دخلت الجراج وصورت الناس وهي فيه وقالوا لي ان فيه ناس ميتة جوه فدخلت من دخل صغير كده لحد ما شوفت المنظر المرعب اللي انا شوفته وما قدرتش أمسك نفسي ولقيت دموعي بتنزل لوحدها..
شفت 5 ميتين وممددين علي الأرض ، الإتنين اللي كانت اصابتهم باينة كان واحد رقبته مقطوعة وواحد راسة مبططة من أثر حاجة داست عليه.وده الفيديو والخبر في البديل بإسمي
فيديو مفزع: جثث 4ضحايا بأحد الجراجات ماسبيرو أحدهم مقطوع الرقبة.. وأثار الدماء تملأ المكان
ملحوظة – الفيديو ده صعب جدا
بعدين رجعت تاني عند الفندق من ورا وقررت إني أروح قدام ماسبيرو ، ولما طلعت علي الكوبري لقيت قنابل مسيلة للدموع والأمن المركزي بيضرب نار ومش عارف بقي رصاص حي ولا فشنك وده الفيديو
بس وكانت في جيبي الرصاصة اللي اخدتها من عند الفندق وكانت رصاص حي ، وفضلت اطع الكوبري واصور لحد ما الأمن ضرب قنابل جنبنا وانا فضلت واقف وكنت لوحدي والناس بعيدة عني مسافة 20 متر كده وفي لحظة لقيت نفسي شميت كمية كبيرة جدا من الغاز ، كتمت نَفَسي وجريت لتحت الكوبري من غير ما أشوف أي حاجة لأن عنيا كانت مليانة دموع ومناخيري سايبة ولما وصلت تحت الكوبري قعدت شوية لحد ما فقت بس للأمانة انا شوفت مولوتوف بيتحدف علي الأمن المركزي كانت قنبلة واحدة بس اللي شوفتها وشوفت قدام شوية عند ماسبيرو تقريبا كاوتش مولع وكمية أمن وجيش غير عادية وبعدين قابلت مروة ومشينا للجرنال وكتبت الخبر ونزلت الفيديو المهم والصور اللي موجودة في الجرنال كلها..وقعدت شوية لحد ما خلصت في الجرنال ورجعت تاني انا وزميلي في الجرنال ..
نزلت التحرير لقيت الجيش منتشر وقافل كل مداخل الميدان بس كان بيسيب الناس تعدي ولقيتهم مسكوا واحد ضربوه وأخدوا منه الميموري عشان كان بيصور وحذروا من اللي يصور انه هايترفع..
مشيت شوية عند الصينية لقيت ناس قاعدة وكل اللي كان بيشكك في اللي ماتوا كنت بوريله الفيديو اللي معايا كان بيسكت علي طول.
الشرطة العسكرية جريت ورانا ورجعت تاني . وجريت ورانا تاني ورجعت لحد ما سمعت هتافات مش عارف هي إيه بالضبط .. روحت ناحية الهتافات دي لقيت الجيش قافل عليهم وسمعتهم بيقولوا : الجيش والشعب إيد واحدة ، يا مسيحي انت فين الإسلام أهو ، وكمان هتفوا إسلامية إسلامية.
عملت نفسي معاهم لحد ما اشوف ايه الحوار لقيت الجيش سابهم يعدوا للميدان وبابص لقيت عيل صغير عدي عليا وقاللي انت مسلم ولا مسيحي وشاف إيديا كان بيبص علي صليب ولما عرف اني مسلم قاللي ماشي هاسيبك.
شوية والجيش سكت وما كلمش الناس دي ولا فتح بقه معاهم وبعدين حصل اشتباكات وكنت انا في الصينية مع صاحبي كلمت الناس قلت لهم ما ينفعش نخبط في بعضنا ، لقيت الكل عليا وواحد قعد يقوللي مايكل نبيل ومش عارف مين ، وقعدت افهمهم بس للأسف صوتهم كان عالي وفجأة لقيت واحد تخين كده دخل عليا وضربني بوكس وكان بيقول عليا مسيحي وكان هايضربني لولا ما واحد قاله اني مسلم مع إني رفضت أوري حد البطاقة ورفضت أخلي حد يشوف إيدي تاني ..
المهم اتكلمت مع الناس شوية لحد ما الجيش كان بيخلي الصينية وتقريبا أقنعت واحد ان اللي بيحصل ده ما ينفعش .
المسيرة المؤيدة دي كان فيها إسلاميين كتير وكان فيها ناس شكلها مريب جدا جدا وكنت هانضرب وصاحبي في الجرنال الشرطة أخدته لما اعترض الواد اللي كان عايز يضربني .. وقالوا له سيبك من الناس دي دولا منافقين …
ملحوظات
ماسمعتش أي حد مسيحي بيقول كلمة مسلم ومسيحي دي وانا هناك غير ست بتقول لو المسلمين رجالة ينشروا الحاجات دي ، قولتلها انا مسلم والكلام ده هايتنشر في البديل حالا .
التليفزيون المصري دعا الناس للنزول عشان يغطي علي اللي حصل وكان بيكدب كدب الإبل وما شوفتش ولا واحد مصاب من الشرطة ولا الجيش وما شوفتش أي أسلحة مع المتظاهرين خالص ، وكلهم تقريبا كان باين عليهم الإحترام..
ده اللي أنا شوفته وفيه ناس هاتقول انها من جانب واحد بس أنا ما شوفتس حاجة تانية غير كده ولو شفت كنت هاقول بكل حيادية
شهادتي خلصت وأرجو انها تكون وضحت بعض النقص في الرؤية عند الناس
أحمد مصطفي