بالمناسبه العربيه المدرعه اولا مش محتاجه تدريب اشهر بل اي واحد يقدر يسوق عربيه
ممكن يسوقه
الحاجه التانيه واضح من حركة المدرعه ان اللي بيسوقه يا بحاله مش طبيعيه يا واحد اول مره يسوقه
وده اللي تقال برضو بالموتمر الصحفي
لااتهمو واحد من الناس ولا نكرو انه واحد عسكري بيسوقها
ومتهيالي الكل شاف المتظاهر اللي طلع فوق المدرعه وضرب العساكر بحجاره كبيره
يعني حتى لو كان عسكري بيسوقها اكيد كان متعور وهو بيسوق
للعلم بس انا طول الوقت كنت ضد المجلس العسكري ببعض تصرفاته
الا اني لم اخونه
ومايعنيش انه لو المجلس العسكري اخطاء بحاجات هتكون كل تصرفاته غلط
ونحكم من الواقع ده
لدرجه انهم حتى لو قالو لا الله الا الله
نقول دول كفرو
العقل وفهم منطق الاحداث هو اللي بيحدد المواقف
ومتهيالي مش من البطوله ان يكون الواحد ضد او مع المجلس العسكري
المواطن الحقيقي اللي بينظر لحقيقه المواقف اللي قدامه ويحكم على اساس منطق الاحداث
وكل الكلام اللي تقال عن احداث ماسبيرو مسجله بالفديو من اكتر من جهه
والامور واضحه لمن يرى الحقيقه
أخى الفاضل زهير
ما حدش بيخون المجلس اللى بيحصل هو العكس
المجلس فى المؤتمر الصحفى خون المتظاهرين
تعرف منين ان اللى ضرب سواق المدرعه من المتظاهرين مش مندس مش فلول مش بلطجى؟
البلد لا تحتمل تحديف اتهامات او تخوين عايزين نشوف صح و نتكلم بعقل و منطق
مش من مصلحه المتظاهر المسالم اللى بيطالب بحقوقه ايا كان ان يقتل و يهجم على الناس اللى بتحميه بشهاده العساكر كانوا كويسين معاهم و بيضحكو و بيشربوا منهم ميه
مش من مصلحه المجلس و لا الجيش انه يقتل متظاهرين المفروض يحميهم لان دى حتكون نقطه سودا فى تاريخه (لا قدر الله) و سوء سمعه ليه بالذات انه فى فتره هو اللى بيحكم البلد فيها
مش من مصلحه اى مسيحى انه يقتل مسلم محتضنه فى المظاهره
مش من مصلحه اى مسلم (على حق) انه يقتل اخوه المسيحى اللى بيتظاهر معاه
مشاهد المدرعات و الحرق ده حصلت بعيد عن ماسبيرو ناحيه الكوبرى يعنى بعيد عن متظاهرى ماسبيرو
و واضح من الفيديوهات ان فى ناس دخلت فى وسطهم من المغرب و هم جايين من ناحيه شبرا و ماحدش بعدها عرف مين بيقتل مين او ايه اللى بيحصل
ندور على صاحب المصلحه علشان نعرف الاجابات على الحيره اللى احنا فيها
سواء كانوا فلول او مندسين او متشددين من اى طرف او امن دوله او بلطجيه او ايا من كان
مين اللى المفروض يجاوبنا على السؤال ده (من هو عدونا؟) احنا بنحارب مين؟
الاجابه مش حتطلع من شعب مش فاهم ايه اللى بيحصل كل اللى بيعمله انه بيطالب بحقوقه المشروعه و اللى اقر بها المجلس و العالم كله و مش حتطلع من شيخ او قسيس او بيت عيله
الاجابه المفروض يقولهالنا اللى ماسك حكم البلاد (المجلس و الحكومه)
مش معقول الناس تتدبح كل يوم و التانى بعد مظاهره سلميه علشان يتغلوش على المتطلبات و يشوهوا صوره الثوره و الثوار و يوقعوا الشعب فى بعضه و الشعب فى الجيش و حنفضل فى المتاهه دى لامتى؟
بدل ما يجاوب على الاسئله و ده اللى كان متوقع من المؤتمر الصحفى لفيته بيدافع عن نفسه و بيشاور على المتظاهرين و قال كلام كان ممكن يتقال يوم احداث ماسبيروا بالليل مش محتاج ثلاث ايام تحضير و تجهيز لمؤتمر المفروض يتزاع على الهوا و اتذاع متسجل بعد ما عقد باربع ساعات و اللى كان ناقصه شويه كمنجات و الناس تعيط و تلطم على الجيش و اللى نابه (طلعتوا من المؤتمر بايه؟) مين اللى ضرب؟ مين السبب؟ يا ريته قال اللهو الخفى كمان ده شاور على اللى بيضربوا الجيش و قال من المتظاهرين؟! و التلفزيون الرسمى قال الاقباط المتظاهرين بيضربوا الجيش؟ ازاى؟
هل عندنا سياسه ازمات؟ هل عندنا القدره على التحكم فى التجمعات ؟ زى ما قلت قبل كده هل الشعب المصرى مدرب انه يتصرف فى الازمات لما يقوم بمظاهره و يلاحظ وشوش غريبه او حد دخل وسطيه هل يعرف يتصرف صح؟ مين المسئول عن توعيه الشعب يعمل ايه فى المظاهرات و ايه التوقعات و الاحتمالات؟ علشان ما تقلبش نكد و مين اللى بيحمينا؟ هو حل الازمات عندنا دايما لازم يكون على ايد شيخ و قسيس؟
