السلام عليكم ورحمة الله وبركاته
اكيد معظم اللى دخلوا الموضوع فكروا ان النهارده عيد ميلادى
وهو فعلا النهارده يوم ميلادى
لانى النهارده اول مره احس انى فعلا مسلمه
اول مره اقف قدام ربنا وانا حاسه انى فى مكان تانى لوحدى بعيد عن الدنيا كلها
رغم كل حاجه حواليا
اول مره دموعى تنزل خاشيه من عذاب ربنا
اول مره احس بخشوع بجد
اول مره ادعى ربنا بس انه يغفرلى ذنوبى ويقربنى ليه
ومدعيش غير كده
بصراحه
انا شهر رمضان عدى عليا كانه شهر عادى
الا الايام القليله منه
المصحف مكنتش بفتحه الا لما ماما تبكيلى وتقولى حرام عليكي
افتحى مصحف ربنا عشان اللى هتقريه هيشفعلك بعدين
فى وقت مش هتحتاجى اد اللى قراتيه ده
مكنتش بفتح القرآن واقراه الا لما ببقى متضايقه
ولما ببقى كويسه
كنت بنسى ربنا
وبنسى فضله عليا
ايوه محافظه على كل حاجه
ايوه كنت بعبد ربنا بس من غير اخلاص الا مرات معدوده
بس
الصلوات والاذكار وقراءة القرآن والعباده المخلصه
(( لا ))
يعنى حياتى كلها كنت مهملاها
انا مكنتش بقعد لربنا قد مابقعد قدام النت
ومدخلتش المنتدى الاسلامى غير مره واحده بس
ربنا انعم عليا بحاجات كتيييييييييير جدا
ابسط حاجه ان والدتى ست عارفه ربنا كويس جدا
وياااااااااما نصحتنى
ووصلت لدرجة انها تبكيلى عشان اقرب من ربنا اكتر
ايوه منكرش انى كنت بطاوعها واقوم اعبد ربنا
بس مش حب فى ربنا ولا عباده مخلصه
عشان ابقى بسمع كلامها
ومتزعلش منى
انا النهارده قرأت قصه فى المنتدى
خلت كل حاجه جوايا تتغير
فى ثوانى عرفت ربنا كويس
وحبيت ربنا اكتر من اى حاجه فى دنيتى
ومبقتش بتمنى اى حاجه غير ان ربنا يغفرلى
انا يااااااما رجعت لربنا
بس كنت برجع لعصيانى تانى
انا عارفه يمكن كتير هنا من اللى يعرفونى يغيروا فكرتهم عنى
بس انا مكتبتش الموضوع عشان احكى حاجه عن نفسى
انا قولت انى اقول حاجه يمكن ربنا يجعلها فى ميزان حسناتى
والاقيها وقت مااحتاجها وانا قدام ربنا
ياريت كلنا نحاسب نفسنا كويس
وكل واحد يعرف انه مهما عمل
عمره ماهيرتاح قد ماهيرتاح وهو قاعد قدام ربنا
لو كل واحد فكر كويس وجاب ورقه والم
وعمل حساب بس ليوم واحد عدى عليه
انا عملت كذا وكذا
هيلاقى انه عمل ذنوب كتيييييييره
بس لو بسرعه راح لربنا هيلاقى نفسه مرتاح
راحه عمره ماشاف قبلها
يارب مكونش تقلت عليكوا وضايقتكوا