هسألك سؤال ياغلبان انت ليه بحقك مابطالبش

هاتقولى اصل يابيه الحق فى البلدى بغير الايد مابيتاخدش

هاقولك ياعم اسعى ودور ولا انت اصلا مابتدورش

هاتقولى يابيه دايخين من رغيف العيش للجمعيات للحمه اللى مابتنشافش

ولا هاتقولى اصل ابنى متخرج بقاله سنين وبيحلم بفرصه عمل وبغيرها مابيحلمش

ولا نفسك تجهز بنتك بس مش قادر اصل الجهاز غالى ومابيرخصش

هاقولك ياعم سيبك ...دى كلها حاجات سهله..

وقولى اخبارك ايه فى الأكل ولا انت مابتاكلش

دانت ياعم ماشاء الله بتقبض يجى من 100 لـــ 160 جنيه وكام قرش

يعنى تاكل وتشرب وكمان تعمل شوبنج وأوعى تقولى انك مابتحاوش

دا نت لازم تحوش دا هوا دا وقت التحويش ولا انت ماتعرفش

ما كل حاجه فى بلدنا ببلاش من جمعيات لمستشفيات بس النفس مابتقنعش

تعرف ياغلبان ان انت سبب كل المشاكل دى اللى احنا فيها وانت ماتعرفش

هاتقولى ازاى يابيه هاقولك استنى واسمع هاتعرف ماتستعجلش

دانت ياعم بتاكل لوحدك يجى طقه فى اليوم وبتقولى كمان مابتشبعش

هاتقول يابيه مافيه ناس بتاكل يجى من 7 لـــ 8 طقات وبردو مابتشبعش

هاقولك مافيه ناس مابتاكلش خالص وساكته مابتتكلمش

هاتقولى ازاى يابيه الناس دى مابتاكلش وعايشه وكمان ساكته مبتتكلمش

هاقولك ياعم دول ماتوا من زمان والناس بخبر موتهم ماتعرفش

ياغلبان احنا لينا ربنا اللى عالم بحالنا واللى بينا مابيهملش

اما اللى بياكل حقنا فعليه رب العباد اللى مابيغفلش

............
........
......
...
..
.

تحياتى لكل من قرأ قصيدتى
mohammed elgammal

فعلا الغلبان ملهش مكان فى اى حاجه فى البلد دى ونتمنى ان مجلس الشعب يغير حاجه بقي والله تعبنا خالص

انا لى وجهة نظر اخرى والتى بعد هذه الجزئية

تعرف ياغلبان ان انت سبب كل المشاكل دى اللى احنا فيها وانت ماتعرفش

السلبية والصمت على مدار ثلاثون عاما

قصيدة رائعة وتعبر عن شريحة بالمجتمع المصرى والتى انفجرت بكل قوة بتوقيت متأخر

الف الف شكر الجمال

على فكره انتى بجد انسانه حساسه وليكي فى النقد بسكل كويس
وكلامك معظمه صح عن نقدك للقصيده وانا قصدت فعلا اللى انتى قولتيه ويزيد عليه
انى كنت بسخر من حالنا بطريقه كويسه وبقول ان الغلبان هوا سبب كل المشاكل وهوا مايعرفش
علشان بياكل طقه اكل واحده فى اليوم بس
ميرسي ليكى جدة مصريه ونورتى موضوعى

طب قول لي يا جده ازاي يتكلم الغلبان في وسط وحوش ضعي نفسك في مكانه لو اتكلم هيتبهدل اكثر ما هو متبهدل ويمكن يروح وراء الشمس وفي عصره ميرحمش هتقولي سلبيه في عصره مينفعش هذا الكلام .. احنا
كنا في عصر وحوش يا جده فاهمه قصدي يا جددنا الغاليه

اكيد يا مجده انتى كمان كلامك مظبوط بس فيه اللى كان بيقدر يقول وفيه اللى مكنش عنده الشجاعه انه يقول اى حاجه خوفا منه على وظيفه بتعيشه هوا وولاده او خوفا منه من ظلم كل ذى نفوس وسلطه
بس فى النهايه ربنا معانا
وادعو كلكم لمصر ربنا يحميها

دا حالنا فعلا والله

اللهم وفقنا لما تحبه وترضاه وأنصرنا رغم كيد الخائنين