طبطب على الجرح
طبطب على الجرح واجبر في الهوى كسره
وامسح على راسه وجفف له الدمعات
خلّص حناني .. خلاص لا عاد تنتظره
واللي انطفت شمعته يستاهل الظلمات
قرّب لي النسيان ابكي على صدره
وقول للناس إن سألوك عني (مات)
يا سيدي لو يصير اليوم لك بكره
ما يرجع الأمس أو يرجع لك اللي فات
ما ينفع تحب ياقلبي على الفطره
في ها الزمن ما بقى للطيبين أوقات
لا تنتظر من سحابة صيف لو قطره
وشلون تلقى ضمير بشخص ماله ذات
ماتت معانيه فيني وانتهى أمره
وشيّع الياس جثمان الأمل بسكات
وحط باقه من الاشواك في قبره
وكانت دموع عينه أصدق الكذبات
واسدل ستار النهايه آخر السهره
وصفق الحاضرين وغادروا القاعات
وش عاد له بعد هذا الدور يا حسره
إلا الألم والندم والهم والآهات
لي قلب معروف ان ما حب ما يكره
ولك بقايا ألم في خاطري وأبيات
كتبتها والحشا في زفرته جمره
يشتاق مره ويكره جيتك مرات
طال انتظاري وليلك ما بدا فجره
خلاص هذي النهايه وآخر اللحظات
ابقى لـــ (نياتك السود) وعلى فكره
يا سيدي (إنما الأعمال بالنيات).