فؤائد قطارات الصعيد (سكك حديد مصر )
ودى طبعا اللى بنركبها احنا الطلاب اللى زى حلاتى
1-وانت طبعا رايح تركب القطر اوع تقلق ابدا ان اتأخرت لان القطر عمرة ماهيجى بدرى خالص يعنى هتعمل كل مشاويرك براحتك وتروح المحطه بعد معاد القطر بساعه ولا ساعتين هتلاقيه على المحطه
2- طبعا القطر بيبقى زحمه موت اوع برضه تقلق لان انت هتلاقى نفسك لوحدك جوا القطر ودا طبعا من قوة الدفع بتاعت الناس اللى هيبقو وراك
3-مستحيل تلاقى كرسى فاضى علشان تقعد عليه وتحمد ربنا ان انت هتلاقى مكان تقف اصلا فيه وممكن تلاقى واحد مادد رجله على الكرسى اللى قدامه ومش عاوزك تقعد ويقولك صاحب الكرسى على الباب ودا طبعا بيكدب ولا تعكر دمك
وانت واقف بقى فى الترقه بتاعه القطر على رجل واحدة هتلاقى ناس كتير بتعدى وتدوس على جزمتك او الفوت بتاعك ودا طبعا ليه فايدة عظيمه هتقولى ايه هيا ؟
الناس اللى بتعدى دى بتعملك مساج على رجلك بدل ما تكلف نفسك وتروح اى مكان تانى والفايدة التانيه للموضوع دا اقتصاديه لان الجزمة طبعا مش هتكمل معاك اكتر من شهر وتشترى غيرها ومعنا دا ان المصانع هتشتغل كويس جدا وطبعا المصانع دى بتدفع ضرايب ودا هيعود على البلد بالفايده
4- لو معاك شنطه بقى اوع نفكر انك هتلاقى مكان تحط عليه الشنطه لان اكيد الارفف (مكان بنحط عليه الشنط )اما تكون مخلوعه مش موجوده اصلا او هتلاقى واحد نايم على الرف كأنه سرير وطبعا مستحيل تطلب منه انه ينزل او تحاول تفهمه ان دا مكان للشنط مش للنوم فهترمى الشنطه فى اى مكان وطبعا الشنطه هتتبهدل ودا ليه فايده ان بتوع الشنط هيشتغلو والمصانع بالتأكيد هتشتغل
5- الازاز بتاع القطر طبعا بيكون مكسر ودا ليه فايده انك بتشم هوا نضيف مليان بالتراب والدخان وغيره او لو كان الجو شتا بتاخد نزله برد ودا ليه فوايد كتير ان دكاترة الصدر بتشتغل كويس والاجزخانات بردة علشان انت بتشترى البرشام بتاع البرد منها ومتشتريش ريفو علشان مش هيعملك حاجه
6- وانت واقف بقى هتحس بحاجه غريبه وهيا ان القطر عمال يتهز ومتعرفش ليه وكأنك راكب ملاهى مش قطر ودا طبعا ليه فوايد كتير انه بيعملك مساج لجسمك كله وكمان غير كدا هتخس يا عم
7- لو حسيت انك جعان اوع تقلق لان اصلا كل دقيقة هتلاقى واحد بتاع سلطه وطعميه معدى وبعد ما هتاكل هتلاقى بتاع شاى او بيبسى معدى وكمان لو حبيت تحلى هتلاقى واحد بتاع حلاوة ولو بتسمع الموبايل وعايز تتسلى هتلاقى واحد بتاع لب وأظن مفيش احسن من كدا (نصيحه اوع تأكل اى أكل من القطر لانه بيكون مش صحى ) ولو كلت يبقى اول ماتنزل من القطر هتدور على اقرب دكتور علشان تعمل غسيل معوى
8- لو حبيت تعمل زى الناس (حمام يعنى ) انسى لانك وانت رايح الحمام هتشم الريحه الكريهه من الحمام واللى هتنسيك انت اصلا كنت رايح هناك تعمل ايه
9-اما لو حبيت تنتحر مفيش احسن من كدا اركب اى قطر وهو هيقوم بالواجب ومتخفش مش هتموت كافر لان القطر هو اللى هيعمل الحادثه مش انت
10-حاول وانت رايح تركب القطر اختار اسوأ قميص وبنطلون عندك لانك اول ما هتنزل هترميهم على طول
11- مع كميه التراب والدخان والبهدله والحجات اللى هتحصلك هتاخد دوش اول ماتروح البيت ودا معناه انك هتبقى على الاقل بتستحما كل يوم
12- القطر بقى بيعلمك الصبر لانك مش هتبقى عارف هتوصل امتى او هيتأخر كام يوم على ماتوصل المكان اللى انت رايحه
13-بيعلمك زكر الله لانك على طول بتقول استغفر الله العظيم من كل حاجة الريحه والبياعين وغيره
14-هتلاقى كميه شحاتين كتير متعرفش بيجو من اى حته ودا معناه انك هتاخد ثوابات كتيرررررر
15- اول بقى ما تيجى المحطه اللى انت عاوز تنزل فيها هتبقى بتبوس على ايد ورجل الناس اللى قاعده وقافله الباب ومش عاوزه تفتحه علشان تنزل منه بعد طول عناء هتلاقى باب مفتوح تنزل منه وللاسف مش هتعرف تنزل لان الناس اللى هيبقو على المحطه وعاوزين يركبو القطر مش هيدوك فرصه علشان تنزل منه
بس ممكن تنزل من الشباك او تستنى المحطه اللى بعدها انت وراك حاجه
المرة الجايه احكيلم قصه انا والقطار والمعاناه اللى بعانيها فى القطر انا وكل الطلاب اللى زيي اللى بيركبو القطار المميز مش (المكيف )