يوجدأنواع من الزيوت بتنعم الشعر قلنا عليها قبل كده؛ ودي زي زيت السمسم، وزيت جوز الهند، وزيت الحلبة، ودول بنعملهم حمام زيت عادي، ولكن هنستخدم كل نوع لوحده؛ لأن كل نوع له خواص مختلفة وماينفعش نخلطهم، وبالنسبة لزيت السمسم وزيت جوز الهند بيكون ريحته مقبولة، ولكن زيت الحلبة بتبقى ريحته نفّاذة شوية، والزيوت دي فعلا بتنعم الشعر جدا وهنعملها مرة أو مرتين في الأسبوع حسب الروتين اللي هنمشي عليه؛ يعني لو محتاجين نعمل معاه ماسك تغذية يبقى هنعمله مرة والمرة التانية هنعمل الماسك التاني، أما لو مش محتاجين غير التنعيم يبقى هنعمله مرتين في الأسبوع.
زيت جوز الهند والحلبة
ومن الماسكات اللي فعلا بتجيب نتيجة هايلة لتنعيم الشعر وبتمنع تساقطه وبتغذّيه وتقوّيه، هو ماسك زيت جوز الهند والحلبة.
وده بناخد 1/ 2 كوب صغير من زيت جوز الهند ونسخّنه في حلة على النار، وبعدين نحط 3 ملاعق كبيرة من الحلبة المطحونة ونطبخهم كويس، وبعدين نحط ملعقة بن.
بنحط الماسك ده على الشعر وهو مغسول من الجذور لحد الأطراف ونسيبه من ساعة لساعة ونصف، وبعدين نغسله بالشامبو، وهنكرره مرة أو مرتين في الأسبوع وبجد هيجيب نتيجة هايلة جدا.
ومن المعروف إن البن من الحاجات المفيدة جدا للشعر والكاكاو كمان؛ لأن فيهم نسبة كافيين عالية.
الماسك ده هنستخدمه بعد ما نعمله على طول، وماينفعش نحتفظ بيه في التلاجة.
تقصيف الشعر
- فيه عوامل كتير أوي ممكن تكون سبب في تقصيف الشعر، زي مثلا إننا نعمل له سيشوار كتير، وكتر استخدام البنس، ولو بنستخدم أنواع شامبو مش جيدة ممكن يسبّب التقصيف، كمان الجو المحيط وأشعة الشمس بتأثِّر على الشعر.
- التقصيف ده ممكن نعالجه خصوصا لو هو بنسبة بسيطة في الشعر، أما لو التقصيف كتير؛ فالحل الأفضل هو قص الشعر، وبعد كده نبدأ نعالجه بالماسكات الطبيعية.
والمعدل الطبيعي لقص الشعر هو مرتين في السنة، وده علشان ندي له الفرصة إنه يطول زي ما إحنا عايزين.
- من الحاجات الكويسة جدا لعلاج التقصيف هو المايونيز؛ لأن تركيبة المايونيز هي بيض وخل وزيت، ودي حاجات مفيدة جدا للشعر، وبنحطّه على الجذور وعلى الأطراف، ونسيبه لمدة ساعة وبعدين نغسله.
- كمان من الزيوت المعروفة لعلاج التقصيف هو زيت الجرجير، والزيت ده هنعمله مرة كل أسبوع، وطبعا الجرجير بينشف الشعر، وعلشان نتفادى ده ممكن بعد ما نعمل حمام الزيت ونسيبه ساعة هنغسل شعرنا ونحط حمام كريم أو بلسم، وممكن كمان البلسم الطبيعي اللي قدّمناه في حلقة سابقة.
والبلسم ده عبارة عن مقدار متساوي من شمع البلسم ومية البلسم، ودول بنجيبهم من عند العطار، والشمع ده بيكون شكله زي الفِل، بنحطهم على النار ونقلّبهم لحد ما البلسم يتكون ويبقى لزج.