شاهد عيان
السلام عليكم يا ادمن ياريت لو ينفع تنشر رسالتى من غير اسمى
بس هى حاجه مهمه لازم البورسعيدية يعرفوها
انا ساكنه عند نادى الشرطة عند الباز سبورت وطبعا اللى حصل امبارح كنت عايشة فيه وشوفتو كله
الجنازة وصلت عادى وماكنش فى حاجه بس فجأه حصل ضرب نار وحاجه هرج كبيرة وفزع بين الناس وكان مجهول مين اللى ضرب والناس طبعا اتهمت الشرطة لان مفيش غيرها مسلح
اللى حصل امبارح ده كلو كانت بلطجة مدبرة من ناس مجرمة .. لان الهجوم بدأ من على الكونيش من ورا نوادى الشرطة والجيش وساعدهم ناس كانوا فى الجنازة وكان الهدف السرقه مش اكتر
المحلات اللى عند الجبانه كلها اتسرقت حتى كمان معسكر الشباب
فى عز الضرب مهو شغال جت تروسيكلات اخدت كل الانابيب والمراتب والبتوجازات ده غير المحلات اللى معدش فيها بضاعه
كانوا بيسرقوا عينى عينك وماسكين مسدسات ورشاشات والاهالى شايفين وكنا خايفين نتكلم لانهم كانوا بيضربوا فى الهوا والشرطة كل اللى عملتوا كانت بتضرب غاز خانق وشويه طلقات فى الهوا
من الساعه 12 ونص لحد 4 كان اغلب اللى عندنا فى المنطقه اهالى الضحايا واصدقائهم وكنا بنساعدهم نديهم خل وميه وكمامات وحليب بالخميرة انما هما كعاقلين مشوا بعد ما دفنوا اللى ليهم
بعد الساعه 4 بقا اتبقالنا البلطجية وبس اشكال مايعلم بيها الا ربنا والفاظ قذرة جدا وكسرولنا العربيات وسرقوا منها البنزين عشان يحدفوا بيها ملوتوف ومشوا على الساعه 7 بعد ما اخدوا كل حاجه ممكن تتسرق ومع كده ما شوفناش من الشرطة حاجه وحشة بالعكس باليل كانوا بيأمنوا المنطقه وشافوا الناس وكانوا بيساعدو الناس اللى اتضربت على الطريق وهى داخله من منفذ الجميل لانهم اتبهدلوا على الاخر مش عارفين من مين
ارجوك يا ادمن انشر رسالتى من غير الاسم وفهم الناس .. اهو النهاردة اهو الجنازة عدت ماحصلش حاجه لان اللى كان ليه غرض امبارح فى البهدله دى اخده خلاص وهى البلطجة والسرقه كان المنطقه عندنا كانت غنيمة
وياريت لو الناس العاقله والشباب المتعلم الواعى يبقى يبعد عن الاماكن اللى فيها شغب عشان على الاقل يبان مين المجرم من مين اللى مش مجرم
حمله البلطجة والسرقه دى لازم نقفلها على قد مانقدر وبلاش نظلم الشرطة والجيش كل مرة دول برضو فيهم اهلنا وقرايبنا واللى بيشوفوه مش قليل فلازم على الاقل نساعدهم مش يبقى شتيمة وبهدله مننا ومن قادتهم كمان زى ما سمعنا فى القنوات امبارح استغاثتهم عند السجن
معلش طولت عليك والكلام اللى حكيته حصل بالحرف وربنا يشهد عليا ولازم الناس تعرفو
بــــــــــــــــــورسعيدى مجهول