انا حصل معايا كدا برضو من يومين كدا
!!
وكنت مستغرب
بس ايه رايك فعلاقة سوالف سوفت بجوجل
انا كتبت لعادل سعود قلت رايي انه مكنش يصح يعمل حوار مع منتدى الغرض منه الربح !!
انت فرايك فعلا فيه محسوبية زي ما فيه ناس بتقول فالتعليقات ؟
الامر ده بالذات متشابك جدا ومعقد بس ححاول احلله على حسب اللى شوفته
فيه فورم ابلاغ عن المواقع اللى بتنتهك سياسات جوجل والفروم بيتيح للموظف انه يعاقب اى موقع مخالف بل يعتبر ده من صميم وظيفته وانا كنت فاكر ان الفورم ده ملهوش لازمه لكن لما جربت 3 مرات ابلغ عن مواقع كانت بتقطع عليا بحشو الكلمات بكثافة كبيرة جدا وبلغت عن كده لجوجل وبالتفصيل فعلا تم حذف صفحات الحشو ( بلغت الدعم الانجليزى مش العربى
)
فبالتالى لو انا مثلا موظف فى جوجل سهل اوى وقتها اعاقب المواقع اللى تم معاقبتها ( ضع فى اعتبارك انهم مخالفين فعليا يعنى مش حخاف من حد يبلغ عليا ادارة جوجل فى امريكا ) وبرضه حيبقى معايا مساحه اسيب بيها المخالفين التانيين لان لو جوجل عاوزه تنظم الويب العربى بحق ربنا مش حيتبقى غير كام موقع فقط غير مخالفين تماما
واكيد برضه ان استضافة سوالف لعادل سعود عملت شبهات كتيرة حواليهم خصوصا ان محمد الفارس كتب مره موضوع بيطلب فيه من الاعضاء وضع اسماء اللى بيعمل سبام لينكات وقال ان الموضوع ده برعاية جوجل لكن طبعا محدش بلغ عن حد وكله هاجم الموضوع لحد ما محمد الفارس زهق وقفله
فالامر فى النهاية مش محسوبية قد ما هوه مجرد توصية من سوالف لمشرفى جوجل حول الاهتمام بمن ينشر لينكات سبام لانه بيخل بمبدأ تكافؤ الفرص
يعنى مش معقوله تبقى انت راجل صاحب منتدى وبتتعب اوى على محتواك ويجى فى الاخر واحد معاه قرشين يروح يصرفهم على شراء روابط نصيه وعلى تأجير ناس تنشر فى المدونات ويتقدم عليك فى نتائج البحث
برضة ضع فى الاعتبار ان العقاب ده الخاص بالساند بوكس طول عمره بيتطبق على الاجانب بدون ما حد فيهم يشتكى ولا يقول ان دى محسوبية ولا يوجه اتهام لموقع زى webpronews مثلا اللى مستضيف دايما مات كاتس
الاجانب عامه فى نشرهم للوصلات فى المدونات مش بيغرقوها بغباء زى العرب
يعنى تلاقى العربى لما ينشر تعليق حاطط مش اقل من 100 لينك فى التعليق
يجى اللى بعده يحط نفس الرقم او اكتر
وهكذا لحد ما الصفحه كلها تموت من كتر التعليقات اللى فيها ويبقى كل واحد فيهم نشر الفين لينك فى اليوم ويثير شبهات جوجل
لكن الاجنبى فى كتابته للتعليق بيحب يضع وصلاته فى سياق التعليق نفسه وبالكتير 5 وصلات علشان هوه وغيره يستفاد من توزيع الباج رانك عليهم بدل ما يتوزع على الفين لينك
----
الخلاصه علشان مكونش صدعتك : جوجل طول عمرها بتعاقب المواقع العربية العادية جدا بل زمان عاقبت مدرسة المشاغبين والجياش بسبب وصلات مخفية وغالبا دلوقتى قامت بكده بناء على مجرد توصية من سوالف خاصه ان كل المعاقبين لو تلاحظ حتلاقى كان فيه موضوعات قديمه فى سوالف كانت نقاش عن اساليبهم الملتويه وخاصه موقع بنات مصر
بس فى نهاية الامر ده فى صالح الويب العربى لان اللى مش مطرود دلوقتى حيخلى باله من نفسه وحيوقف اى عملية نشر وصلات وبالتالى تزيد قيمه المحتوى اكتر ونبطل نشوف شغل الاستسهال اللى بيتم زى لما واحد معاه قرشين يروح ياخد هوست ودومين ويشترى نسخه فى بلاتينيوم على شات على سكربت فيديو وسكربت دليل مواقع وصب دومين ثقافة جنسية ويشترى كام فتحه اجبارية على كام لينك على كام واحد ينشرله لينكات وبعد شهرين تلاته يبقى معاه ترتيب فى اليكسا وباج رانك واعضاء فى المنتدى ويبقى اسمه صاحب منتدى كبير وهوه متعبش فى حاجه اصلا ولا يعرف يعنى ايه محتوى ولا يعنى ايه ويب ماستر اصلا
هيا دى الخلطه اللى كانوا بيعملوها واللى اتضربت دلوقتى بعد حركه جوجل الاخيرة
عامه مجال السيو وكمان مجال الربح من الانترنت سواء ادسنس او ايفيليت كل دول بيتطوروا كل يوم اكتر واكتر والمهمه بتصعب بس بتبقى ممتعة والشاطر هوه اللى يتابع دايما التطورات دى
