حل مشكلة دعوات الألعاب اللي بتجيلك على الفيس بوك كل شوية

لو كل دقيقة تلاقي دعوة للعبة المزرعة السعيدة، أو كريمنال كيس، أو فاميلي فارم. لو دا بيخليك تزهق.

جربت قبل كدة تبعت صورة على الفيس بوك عندك وتقول يا جماعة ارحموني أنا مبلعبش المزرعة السعيدة أو أي لعبة غيرها وبرضوا محدش عتقك.

عمرك تمنيت إن المزرعة دي تولع عشان ترتاح؟

دلوقت تقدر تتخلص من كل دا، وبطريقة سهلة وبسيطة

هنخش على الفيس بوك، ولو الفيس عندك بالعربي هتلاقي علامة كدة زي النجمة أو الترس فوق خالص على اليمين ولو بالانجليزي هتلاقيها على الشمال

هتدوس عليها، هيظهر لك قائمة اختار منها بالعربي (إعدادات الخصوصية) ولو بالانجليزي (Privacy settings)

هتفتح لك صفحة هتلاقي فيها على اليمين (ولو انجليزي على الشمال) عمود مكتوب فيه حاجات كتير اختار منهم (الحظر بالعربي) و(block بالانجليزي)

هتفتح صفحة انزل تحت في آخرها هتلاقي حظر التطبيقات (ولو بالانجليزي block application)

وهتلاقي خانة تكتب فيها اسم اللعبة أو التطبيق اللي بيزعجك، وأول ما تبدأ تكتب هوا هيكمل لك اسم التطبيق أو اللعبة تقوم مختاره وبكدة يبقى انت عملت حظر وريحت دماغك ومش هيجيلك منه أي صداع تاني

والفيديو الصغير دا بيشرح الموضوع بطريقة عملية وسريعة وأتمنى يكون الموضوع عجبكم