سيدى الرئيس
قلت لنا فى ما سبق
أننا نقف فى مفترق طرق
فأما أن نعدى وتصبح الدنيا وردى
أو يشيط قفانا ونحترق
وبعد ما يقرب من عام
من وعود سيادتكم بالأمان
لسه بتثبت فى الشارع وبتسرق
والكهربا كل ساعه بتقطع
والمرتب على نفس الحال
والأسعار بتزيد وبترفع
ودروس العيال تهد جبال
عايز تنجح لازم تدفع
شيل يا عم وهاتلك شيال
هى دى همومى يا ريس
وعايز غساله أغسلها
عايز أنزل حمولى اللى شايلها
عايز جاز وعايز غاز
وعايز أعيش كويس
ولو معاليك شايفنى أزاز
أو كلامى بطيخ وبهيس
أحب أقولك بكل أعتزاز
أنا اللى خليتك الريس
أنا اللى اقسمت له فى ميدان التحرير
وهتفنا معاك ثوار أحرار هنكمل المشوار
ولعنت أبو عكاشه بتاع الجرجير
وقلت دماغه دى ولا دماغ الحمار
ربنا أكرمنا براجل أمير
والعيشه هتبقى فل وعال العال
لقيت العيشه نفس العيشه
زى ما تقول كده حد شغل الغساله
ونسى يحط الفيشه
يا ريس الغساله مش شغاله
وعقلنا بقى أخف من الريشه
تلاتين ألف محلل أستراتيجى
على عشرين ألف مذيعه ومذيع
وكله بيفتى يا عزيزى
والبلد رايحه للتقطيع
وأى واحد مع كلمتين أنجليزى
يطلع ع الشاشه ويديها توليع
بيقولك المقطم خلاها أيزى
يعنى البلد بيحكمها بديع
يرد أللى أدامه أر يو كريزى
هى البلد دى ليها كبير
دى ماشيه على حل شعرها
يقوله ما هى دى رياح التغيير
تضحك المذيعه وتقع على ضهرها
جرى أيه يا هانم
هو انتى قاعده مع الضيف
ولا دى مسرحيه لسمير غانم
واللهى فعلاً دمهم خفيف
كل ما أتفرج عليهم اروح نايم
مع ان كلامهم سخيف
بس بيغسل مخ البهايم
قلبوا ربيعنا خريف
والفلول بقوا ثوار
ومبارك لفنا فى رغيف
خايف أروح ألقيه فى الدار
مش قلت لك فوضى ياظريف
ولا كنت فاكر كلامى هزار
أهو كله بقى رز بالملوخيه
زى الحوارات السرعلنيه
كلام مساطيل لمساطيل
دول ضاربين كل حشيش الباطنيه
وفى الأخر أحنا الضحيه
وبعد مايقطعوا الميه
زغردى يا سنيه
الحنفيه بجلده ولا من غير جلده مش هتخر
أثيوبيا هتسد النيل وهتسقينا خلاص المر
وأحنا هنا مشغولين بالأهم
بتاع الثقافه هيلغى الباليه
واللهى دى حاجه تغم
طيب ياسيدى هتلغيه ليه
بيقولك الرقص حرام يا عم
طب بالنسبه للتطبيل وضعه ايه
وضعه وزير زى الفل
يعنى هما يطبلوله
فتطبل على دماغ الكل
وأهله وعشيرته يصقفوله
وأحنا هنا شاربين الذل
اللى أسقطوا مبارك وحلقوله
قادرين يخلوها خل
وقبل ما تتكسر لستميت حته
ويكون السبب سكوتى
يا ريس أنا نازل تلاتين سته
حتى لو فيها موتى
ده مش تهديد ما تفتحش الجاكته
انا عايز اوصلك صوتى
أنا مش عيل صغير برياله
يا ريس الغساله مش شغاله
الغساله مش شغاله
............