بص هي مش شطارة انك تكتب كل حاجة بالانجليزي الناس بتكسل تقرا و خصوصا لو اكتر من سطر , لو عملت فرانكو الموضوع اسوأ , البوستات بالعربي اسهل في القراية و بتوصل المعلومة بسرعة
اكتب اقل
متكتبش ستيتس اكتر من مرة في اليوم الا اذا كان الموضوع يستحق زي احداث بتحصل زي ماتش او انتخابات و كدة, امال هما عملو تويتر ليه ؟ اكتب اكتر من 10 مرات في تويتر عادي
في العادي اكتب مرتين او تلاتة في الاسبوع و البوست يكون قصير الناس هتكسل تقرا , و ممكن باقي الاسبوع تعمل شير لصور من الصفحات و برضو متعملش شير لاي حاجة و خلاص
متكتبش كلام اغاني
الناس ساعات بتكتب كلام الاغاني عشان عجبتهم و خلاص و محدش بيعرف هم قصدهم ايه , ممكن تكتب كلام الاغنية و تكتب بعدها رايك او ليه كتبتها
مثال : " اي كلام مقتبس من اغنيية" .. انا بحب الاغنية دي اوي بتفكرني بذكريات جميلة
كدة الناس ممكن تتفاعل معاك و تقول اه و انا كمان او علا حسب الغنية اللي مشاركها
اكتب حكمة
لو في حكمة عجبتك اكتبها الناس بتحب تتعلم حاجة جديدة
اكتب حاجة مثيرة للجدل
متعملش خناقة بس لو انت حسيت ان مثلا في فيلم معين مش عاجبك و عاجب كل الناس , قول بصراحة ان الفيلم ده مش احسن فيلم للمثل كذا و مش عارف هو عاجب الناس علي ايه بالضبط هتلاقي الناس بتتجادل معاك و هتلاقي نا متعصبة و بتتخانق :d
متكتبش حاجة
بدل ما تقعد تكتب كلام و مستني حد يعمل لايك او كومنت .. شوف الناس بكتب ايه و اعملها لايك و شارك و اكتب تعليقك و حاول تكون ظريف , لما تشارك مع الناس هتشجعهم انهم يشاركو معاك
اكتب بالليل
الناس كلها بتبقي رجعت من شغلها و اغلب الوقت بيبقو موجديين علي الفيس بوك بالليل , انت كدة بتزود الفرصة ان كلامك يتفري , لو كتبت الصبح البوست بتاعك علي بالليل هيببقي تحت خالص في الصفحة الرئيسية للفيس بوك و ممكن محدش يشوفه
متكتبش حاجة كئيبة
وحياة اغلي حاجة عندك يا شيخ متنكدش علي الناس الناس بتفتح الفيسبوك عشان بيعدو شوية عن هموم الدنيا متخليهمش يتقفلو منك
في ناس بتبقي طول الوقت عمالة تكتب كلام عشان يصعبو علي الناس مع الوقت الناس ممكن يكرهوك و يحسوا ان حياتك يائسة , مين عايز يصاحب حد يائس؟ اظن الرسالة وصلت
اخر نصيحة الفيس بوك ده مكان للتواصل الاجتماعي مش نسخة من الحياة الطبيعية متضيعش وقت كتير عليه و حاول تكون اجتماعي في الحياة الطبيعية