يا دكتور حضرتك انا متجوزةمن 3 شهور ومش عارفه اتعامل مع زوجى نهائيا
انا بدرس خدمة اجتماعيه والمفروض ان دراستى بتساعدنى ازاى اتعامل مع الناس وبقدر اتعامل مع اى حد بتكلم معاه الا زوجى فشلت معاه بكل الطرق وحاسه ان اما هو مريض واما انا اللى مريضه نفسيا
انا عندى20 سنة بدرس فى كليه خدمة اجتماعيه وساكنين فى منطقه كويسه ومعروفة وبابا وماما خريجين جامعات ومامتى مهندسة وبابا مدرس يعنى مستوانا كويس الحمد لله وعندى اختين بنات
وانا فى ثانوى اتختبط لشاب من وجهه نظر اهلى مش كويس وانا كنت شايفاه كويس كان بيقول دايما احاديث وايات قرأنيه وبيدرس فى الازهر وحسيت انه كويس وحبيته فى فترة خطوبتنا جدا وحصلت مشكله واتفصل من الكليه لانه مكانش بيروح عشان بيشتغل لان والده متوفى ومامته مش بتشتغل ودخل معهد تجارى بعد مشاكل بينه وبين اهلى مكانش عايز يدخله وكان دايما بيحصل مشاكل بينه وبين اهلى على الاتفاقات بتاعة الجواز وانا كنت بحط فى دماغى ان اهلى بيكرهوه وعايزنى اسيبه
والمشاكل كانت بتزيد كل يوم عن اليوم اللى قبله المهم احنا اتجوزنا كتبنا فى القايمة تمن الدهب وجاب نصه بس والمؤخر اتكتب وقال انه بيدفع المؤخر فى حياته مش اتدفعلى حاجة وبعد الجواز حصلت زنقه ماديه وباع جزء من شبكتى كبير من الجزء اللى لسه مكملش اصلا واتبقالى حاجة بسيطة جدا وقالى ان اللى باقى معايا من الشبكه مش هيجى جمبه ابدا المهم بعدها بفترة قولتله انى عايزة مصاريف الكلية بتاعتى لانى لسه بدرس قالى انه هيدينى نصهم ونبعدين نصهم التانى ورحت عند ماما زيارة وبيت عندها وكنت سايبه الانسيال بتاعى على التسريحة ولما رجعت ملقيتهوش وسألته قالى انه مشافهوشوقلبت البيت عليه بس ملقتهوش وبعدها ادانى مصاريف الكليه كامله قالى انا جالى فلوس شغل مش هتدفعى نصهم هتدفعيهم كلهم انا استغربت جدااا لانه كان قايل انه مش معاه
وبعد الجواز حصل سوء تفاهم بينه وبين ماما وقالتله انت معندكش دم راح حلف طلاق عليا ان ماما متدخلش البيت بتاعى تانى ومن ساعتها مدخلتش الشقه وانى هروحلها عادى لان دى صله رحم
كنا قبل الجواز حصل مشاكل بينه وبين مامتى على الشقة كان عايز يسكنى فوق مامته وماما رفضت نهائيا وانا علشان الخطوبة متتفسخش اتفقت معاه نسكن فى شقه ايجار وبعد الجواز ننقل فوق مامته المهم دلوقتى عايز ينفذ الاتفاق ده وانا مش عايزة اسكن فوق مامته لانى مش مرتاحه فى الشقه دى
انااعتبر يعنى لسه عروسه جديده لانى مبقاليش غير 3 شهور متجوزة لكن فعلا بفكر كتييير اوى انى اتطلق
وبعدها بدأ يحصل حاجات تانيه زى اننا لما بنتكلم او نتناقش فى اى مواضيع بيفهمنى غلط وبيحصل مشكله وبيزعقلى وببقى بتكلم معاه بكل ذوق يقولى احترمى نفسك وانتى بتتكلمى معايا وانا والله ببقى بتكلم بكل ادب وزوق واحساس
وكمان بلاقيه لما بيتكلم عن المستقبل وعن ولادنا اللى لسه مجوش كل اللى بيقوله مش بيعجبنى ومش بحس انى هقدر ابدا اتماشى مع اللى هو بيقوله ده
بحسه شديد اووووووى وقت المواقف لكن لو فى العادى مثلا اكل او شرب او قعاد مع بعضنا بيبقى كويس وبيفسحنى فى الاماكن اللى بتمناها وبيشتريلى اللى بحتاجه علطول لكن اول ما بيبقى فى موضوع مصيرى او موضوع جااااااد بلاقى افكارنا متضاربه وفى خناق وزعيق وعدم تفاهم وميدنيش فرصه اتكلم ولما اقاطعه يقولى احترمى نفسك متقاطعينيش وانا بتكلم وبلاقيه بقى شخص تانى خااااااااااالص
ولما بطلب منه طلبات بسيطه زى انى اسيب القطط اللى مربياهم عندىوميمشوش من البيت بيقعد يقولى انتى ليه دايما بتصعبى عليا طلباتك ليه طلباتك صعبه اوووى كده وانا بحس انه مجرد طلب تافه
والحق يتقال هو مش بيدقق اوى فى الاكل لما ببقى تعبانه بيسيبنى اعمل اللى اقدر عليه اسلق بيض او اى حاجه وخلاص لانى ببقى فعلا تعبانه مش قاادره لكن ساعات بيجى من بره يفضل يتمشى فى الشقه يشوف لو فى حاجه مش مظبوطه يفضل يقولى ده متعملش ليه طيب؟امال انتى كنتى بتعملى ايه من الصبح يعنى ويقلب وشه قلبه وحشه ويزعل من حاجات بسيطه والله
ولما يزعل بيقول كلام يضايق ولما يبان على وشى الزعل يقولى انتى نكديه وكل ما تشوفينى تنكدى عليا وهو والله اللى بيجى من بره عايز نكد وانا ببقى مش غلطانه وبتأسف كتيير
وبيحسسنى انى مش بسعده ولا برضيه وانى وحشه فى تصرفاتى
المشكله انى بحبه ومش عايزة اسيبه ومش قادرة اتحمل تصرفاته وبفكر اتطلق وعارفه انى هتجرح وهو هيتجرح من ده بس مش لاقيه حل تعبت من كل شويه خناق ارجوكم شوفولى حل
هو مخنق الدنيا عليا وفى الاخر بيقول هو اللى تعبان وانى انا اللى نكديه
المهم دلوقتى هو عااااايز يروح شقة مامته وماما رافضه وانا مش مرتاحه للشقه ومش عارفه اعمل ايه وخايفه اقوله يزعل لما بحاول افاتحه فى الموضوع بيقول انه مش مرتاح فى الشقة اللى احنا فيها دلوقتى وبيقول انها بتكلفه كتير وانه حاسس انه واخدها غصب عنه وبيطالبنى انفذ اتفاقى بس انا كنت صغيرة مش فاهمة لما اتفقت معاه وانا مش عايزة انفذ ده دلوقتى ولو قولتله كده هيقولى انا جوزك المفروض تمشى على نظامى وحسب فلوسى ما انا مش هسرق
انا مش عايزة اسكن فى الشقه دى وكمان مش عاجبنى اسلوب معاملته معايا وغلبت ومش عارفه اتكلم مع مين قولت اكيد حضرتك هتفيدنى
انا مش لاقيه تفاهم وبحس انه بيحاول يبعدنى عن كل حاجة بحبها ومعرفش السبب ايه
محتاجه اعرف هل العيب فيا انا ان كلامى بيتفهم غلط ولا هو اللى مش قادر يفهمنى ولا ايه
وياريت يادكتور لو فى ايميل للتواصل والعلاج من خلاله يبقى افضل لان زوجى رافض انى اتكلم مع دكاترة نفسيين ومش مقتنع بالموضوع ده
