واتقابلنا وارتمينا
وسط أحضان الأمانى
بعد حيرة وليل فى بعدك
عشت أعده بالثوانى
مش هقولك يوم بحبك
مش هينطقها لسانى
اسمعيها فى نبض قلبى
هتلاقيها شكل تانى
كل مرة أشوف عيونك
ليه بيتزلزل كيانى
والقى صورتك جوه قلبى
محيرانى معذبانى
لو فى مرة تحسى بيها
تسمعيها
وقلبى بيقولها عشانك
مين فى كل الدنيا تقدر
تسكن القلب مكانك
والقى فين تانى ابتسامتك
نورها يملا الدنيا فرحة
كل نظرة من عنيكى
رموشها جارحة
وظلة طرحة
العيون اللى بجمالها دوبتنى
وغرقتنى
فى بحر شوق ما بينتهيش
لما بتغيب عن عيونى
بيسألونى إزاى نعيش
العيون دولا حبايبى
بيوحشونى وانتى جنبى
وأما أقابلك
أفضل اهرب من جمالهم
واخفى حبى
جوه قلبى
وافضل اترجى عيونى
ليفضحونى
وأقول لقلبى
اوعى ياقلبى
تبوح بحبى
يقوللى قلبى
مش بإيدى غصب عنى
شوقى ليها لو غلبنى
سيبنى أقولها بأعلى صوتى
سيبنى أخرج من سكوتى
سيبنى أقول بحبها
سيبنى اعيش فى قربها
سيبنى أغرق جوه بحر أجمل عيون
وألقى شطى جوه حضن اجمل جفون
وان غرقت أكون سعيد
وابتدى مشوار جديد
واشترى لحظة سعادة أهديهالها بألف عمر
دى ابتسامة صافية منها تطفى جوه القلب جمر
رغم بعدك كنت شايفك
كنت سامع همس قلبك
كنت بتكلم معاكى
واشتكيلك شوقى ليكى
واجرى واهرب من همومى
بين ايديكى
اسألى عن شوقى ليكى
نسمة ناعمة تمس خدك
اسألى رعشة شفايفى
لما تنطق مرة اسمك
اسألى حيرتى و آهاتى
لما أشوف نورابتسامتك
اسالى نقطة مطر
من السما نازلة بريئة
نايمة فى حضن الشجر
تحضن الزهرة الرقيقة
اسمعى صوت البلابل
لما تعزف مرة غنوة
قلبى بيغنى معاها
واشتكيلهابشوق وسلوة
اسالى حيرة عيونى
لما تهرب من عيونك
والثوانى والدقايق
أد إيه بيعذبونى
وانت غايبة عن عيونى
كل ثانية
تمر بيه
سنين طويلة
الزهور بيضيع عبيرها
والشموع بتطفى نورها
والنجوم صاحية على رموش السهر
وافضل اشكى للقمر
مر البعاد
نار السهاد
والنجوم فى الليل بيغلبها السواد
اسألى الشوق اللى ياما
كان يعذبنى فى بعدك
اسالى الليل اللى ياما
سهرتو احلم فيه بقربك
اسالى حيرة غريب
نفسه يلقى وطن يلمه
اسالى لهفة حبيب
نفسه قلب حنون يضمه
اسالى صرخة وليد
اتحرم من عطف أمه
اسالى بحار يصارع موج
فى بحر مالوش قرار
انكسر مجدافه منه
زى قلبه
كل حلمه
يعيش ومرة يشوف نهار
كل موجة وحش كاسر
تفترس قلبه الحزين
والسما عيونها تراقبه
والرياح صوتها أنين
كل همه يلقى شطه
يلقى عمره
يلقى قلب فيه حنين
ليكى وحدك
قلبى خاننى
وغصب عنى
قلبى قالها
قلبى عاشها وقال بحبك
قال بحبــــــــــــــــــــــــــك
بحبـــــــــــــــــــــــــــــــك