بنات كتير بتعانى من تقصف الشعر وجفافه وخاصة بعد الجواز والحمل والرضاعة وقله الاهتمام بالشعر ولان الشعر زى ما بيقولوا نص الجمال ولان البنات المحجبات على طول شعرهم متغطى وهما بره البيت واو قدام حد غريب وتقصف الشعر بيبقى عبارة عن تكسر لاطراف الشعر وبيبقى شكله مش حلو مهما حاولتى تسرحى شعرك ومهما حاولتى تستخدمى مستحضرات تجميل وحتى لو حاولتى تقصى نهايات الشعر المتقصف عشان تسمحى للشعر الصحى انه يكبر هتلاقى نفس المشكلة رجعت من تانى وهتلاقى نهايات الشعر بقت متقسمة وهايشة والمشكلة فى التقصف انه مش بيخلى الشعر يكبر بصورة طبيعية وبيمتد الى اعلى الشعر لحد ما يوصل لمنابت الشعر وبكده ممكن يتلف شعرك كله فلازم تتعاملى مع مشكلة تقصف الشعر باهتمام كبير عن طريق تغذية الشعر ةالتخلص من الاسباب اللى بتسبب التقصف وعمل وصفات طبيعية للشعر ترجعه لمعانه وحيويته عشان كده جبتلكم النهاردة وصفتين للشعر

الوصفة الاولى : للشعر المتقصف الجاف
المقادير : 2 بيضة + 2 معلقة خل ابيض + 2 معلقة مية ورد
الطريقة : تخلطى المكونات دى على بعض وبعدين تحطيهم على شعرك من 10 دقايق الى 15 دقيقة وتدلكيهم كويس وعلى فكرة ده شامبو طبيعى لان البيض بيغذى الشعر التالف ويقويه والخل الابيض بينضف الشعر اما مية الورد مش هتخلى فى ايه ريحة للبيض او الخل عشان متقلقيش من موضوع الريحة ده .

الوصفة الثانية : لنعومة الشعر ولمعانة
والوصفة دى تستعمليها بعد ما تغسلى شعرك بالشامبو الطبيعة اللى فى الوصفة الاولى
المقادير : علبة زبادى + 2 معلقة زيت زيتون + موزة
الطريقة تضربى المكونات التلاتة اللى فاتت مع بعض فى الخلاط وتعمليه كأنه حمام كريم وتسبيه على شعرك من 10 دقايق الى 15 دقيقة وبعدين تغسليه بالمية بس
الوصفة دى قال عليها الدكتور سعيد حساسين انها هتخلى شعرك حرير بعد شهر من الاستخدام بمعدل مرتين الى ثلاث مرات فى الاسبوع

انا هجربها ويارب تجيب نتيجه