تعرفو ياجماعة والله العظيم اجمل مكان في الدنيا مصر انا بحب البلد دي جدا بموت عليها ونفسي ارجعلها بتمني سنين الغربة تخلص وارجعلها مصر كلها ذكريات
مفيش اجمل من شعب مصر ولا اطيب منهم ولا اجدع منهم،،،،،،
يعني مثلا عندكم الشباب مع كل اللي بيعملوه من عادات سيئة لكن جدعان اوي وليهم مواقف جميلة اوي
ومش هننسي طبعا البنات ملكات جمال الدنيا المصريات والله مفيش اجمل منكم انا شوفت بنات من كل الجنسيات في الغربة لكن والله اشهد لبنات مصر مش عارف ليهم طعم خاص طعم جميل دمهم شربات
يعني مثلا كنت لما اكون مضايق ايام الجامعة كانت اللي تخليني اضحك وحده صحبتي
يهونو اي شئ بقلبهم الطيب وكلامهم اللي زي العسل،،،،،،،،،، بس بلاش غرور
مفتقد الترماي ابو درورين في اسكندرية اللي اركبه مخصوص عشان اقعد فوق
مفتقد مترو الانفاق و انا طالع اجري و بفتح الباب الكهرباء بايديا و حاشر دماغي لازم اخش, و 2 شباب سنيدة من جوا المترو بيفتحوا معايا
مفتقد باص النقل العام الاحمر اللي ابقى متشعلق فيه و ماسك في بنطلون اللي قدامي و الكومسري لسة موصر ان العربية قدام فاضية
وحشني التاكسي الابيض في اسود اللي اول ما اركبه الضهر يقع بيا و يستأذني السواق اني افضل ماسك الباب في ايدي لغاية ما اوصل المشوار
مفتقد اجمل القصص اللي اسمعها مع سواق التاكسي و البيجو على الصحراوي و الحلاق بتاع حتتنا
مفتقد و اانا بسال على عنوان مش عارفه في منطقة و الاقي 5 وقفوا كل واحد مديني عنوان شكل, و في الاخر بيجي الشهم اللي يقولك طب تعالى ورايا و يوصلك مشي
مفتقد ماكدونالدز التحرير اللي كل ما كنت اكون عايز ادخل الحمام ادخل و امسك المنيو شوية و كأني هشتري حاجة و طيرااااااااااااان بعد كدة على الدور اللي فوق
مفتقد كوز الدرة المشوي و الحلابسة و السوبيا المززة
مفتقد منظر الساعة 6 الصبح و ناس راجعة البيت و ناس نازلة الشغل و الزحمة و المحلات اللي فاتحة 24 ساعة
مفتقد وسط البلد و قعدة في جروبي و الايس كريم اللي في الطبق الاستانليس كأني في سنة 1890]