المراة النصف الحلو فى المجتمع هى اللى بتدى لحياة الراجل طعم وبتحسسه بالبهجة وهى صغيرة بتكون شقية وامورة وكيوت ولما بتكبر بتبقى ام وزوجة وطباخة اللى بيميزها عن الراجل العاطفة اللى ربنا خلقها جواها انوثتها اللى هى سر جمالها اللى تعتبر التاج اللى ربنا حباها به . وعشان كده وعشان كل المميزات اللى ربنا اداها للبنت واللى هى انوثتها لازم عليها انها تحافظ على النعمة دى وتهتم بيها باهتمامها بجسمها ومظهرها وشكلها ولبسها واناقتها ومن اهم الحاجات اللى لازم البنت تهتم بيها هى شعرها لان الشعر بيعتبر موطن المشاكل وخصوصا للبنت المحجبة اللى ربنا اكرمها بلبس الحجاب اللى هو فرض عليها لانها شعرها دايما بيبقى متغطى وعشان كده بيحتاج عناية كبيرة ولان المشكلة الصغيرة بالنسبة للشعر لو اتسابت بتتفاقم لازم على كل بنت انها تعالج شعرها من اى مشكلة بسرعة ومتهملش فى الاهتمام بيه وفى موضوعنا النهاردة هنعرض عليكم اهم الاسئلة حو الشعر واجابتها .
س : ايه هى نتايج استخدام الصبغة على الشعر ؟
ج : ثبت علميا ان جميع الصبغات بتأثر بصورة سلبية على الشعر لانها بتحتوى على مواد قلوية بتتسبب فى اضعاف الشعر عشان كده يفضل عدم استخدام الصبغة كتير وعند استعمالها اتبعى التعليمات عشان متحصلش اى غلطات فى التلوين .
س : ما هى اقل انواع الصبغة ضررا على الشعر ؟
ج : الحنة تعتبر اقل انواع الصبغات ضررا
س : ما اسباب ظهور الشعر الابيض مع تقدم العمر ؟
ج : فى خلايا خاصة فى جسم الانسان اسمها ميلانوسايتس بتنتج مادة اسمها الميلانين وهى المسئولة عن لون الشعر ومع التقدم فى العمر بيقل نشاط المادة دى او بيقل كمان نتيجة صدمة او ضغط عصبى او نفسى فبيظهر الشعر الابيض .
س : هل الربطات بتسبب مشاكل للشعر ؟
ج : شد الشعر بيسبب تلف ونحول للشعر وتلف مادة الكراتين بالشعر على المدى الطويل عشان كده يستحسن انك تسيبى شعرك على طبيعته من غير ما تربطيه من وقت للتانى .
س : هل النظام الغذائى بيأثر على الشعر ؟
ج : طبعا لان التغذية السليمة والصحية بتساعد على تقوية الشعر وصحته ومن الاكلات التى بتساعد على تقوية الشعر هى :
القمح والعسل والبصل والثوم والفاصوليا والاسماك والبندق .
