المقادير
للعجينة: كيلو فول مدشوش - حزمة كزبرة خضراء - حزمة شبت - حزمة كرات - بصلة وسط - 4 فصوص ثوم
البهارات
معلقة بيكنج باودر كبيرة - نص معلقة صغيرة كزبرة ناشفة ناعمة - معلقة صغيرة كمون ناعم – ملح – معلقتين مياه كبيرة - سمسم وكزبرة ناشفة خشنة للتزيين
الطريقه
انقعي الفول المدشوش في المياه طول الليل (حطيه في الثلاجة لو الجو حر)
تاني يوم، صفّي الفول من المياه
افرمي الفول مع الخضرة والبصل والثوم في الكبة
خدي ربع كمية العجينة عشان تعملي وجبة الطعمية واقسمي الباقي على تلات أكياس وخزنيها في الفريزر
حطي الكزبرة الناشفة والكمون والبيكنج باورد والملح على العجينة اللي هاتقليها واخلطي كويس
حطي عليها المياه واخلطي (المياه هاتخلي الطعمية طرية من جوا ومقرمشة وذهبية من برا)
اعملي العجينة أقراص بالحجم اللي تحبيه
اغمسي أقراص الطعمية بالسمسم و بعدين بالكزبرة الخشنة وسقّطيها في الزيت الحامي لغاية ما تحمر وتبقى مقرمشة وبالهنا والشفا
خدى بالك
ما تحطيش البهارات على العجينة كلها عشان كده هايتغير لونها في الفريزر. حطي البهارات قبل ما تقليها على طول.
ما تزوديش البصل في العجينة عشان ده ممكن يخليها تتفتت لما تقليها
